Abraham Na Biile Plɛ Se Na
25
Abraham na tnichlɔ wa wru na, u mɛɛ na yi Keturah. 2 Bibilɛ mblɛ Keturah na se Abraham na kre na lɛ, Zimran, na Jokshan, na Medan, na Midian, na Ishbak, na Shuah. 3 Jokshan bibilɛ na lɛ, Sheba na Dedan. A Dedan nɔɔ leele na lɛ Asshur leele, na Letushite leele, na Leummite leele. 4 Midian bibilɛ na lɛ, Ephah, na Epher, na Hanoch, na Abida, na Eldaah. Pre leele mblɛ krɛrɛ, Keturah nɔɔ leele na lɛ.5 Abraham na u krɔyirɛ kro bali mu Isaac ŋga, 6 la, nyjila ŋga nu wraa wa ŋmaa ni kre, wra u bibilɛ mblɛ wra se se bichilɛ na kre ŋga yirɛ, mna pe ni, a pra sɛ yila finhaa tra ka nu, mna laa u pɔ Isaac na.
Abraham Kumu Na U Lemu
7-8 Abraham na lɛ blɛlɔɔ titi mna chin mu ku, na u li yɛlɛ lafaa na fuloe taarɛ na kɛmbɔkunɔ. 9 A u bibilɛ Isaac, na Ishmael na u le Machpelah dnɛ wee kre nu, kre dnɛ wee ŋga, Zohar Hittite ndro wre pɔ ŋmba praa yeeri Ephron wre tra nu kra nyi, a kraa wa mu mbra Mamre na. 10 Abraham na kre tra kre lɔ Hittite leele pan, mna u chɔ Sarah le, bawa chɔɔ pra wre Abraham le na. 11 Abraham kumu kɔkro kre, Nyiɛkpɔɔ na u pɔ Isaac dwan na uu wa mu tni mu mbra Beer-Lahai-Roi na.
Ishmael Nɔɔ Leele
12 Abraham pɔ Ishmael ŋmba Sarah tnichlɔ Hagar, Egypt wo wre na se wre nɔɔ leele mɛɛ yi kre. 13 Ishmael bibilɛ na lɛ kre, imi pe mɛɛ nyi mu taala ŋga, pan wra pe se, pe lopom na wi Nebaioth, na Kedar, na Adbeel, na Mibsam, na 14 Mishma, na Dumah, na Massa, na 15 Hadad, na Tema, na Jetur, na Naphish, na Kedemah. 16 Pre Ishmael bibilɛ kɛmbɔshiin mblɛ, pra tni trɛ nu peyɛ yɛ, a pre na lɛ lawee nyjɛ nu pra nyi mu tni yire lefɛɛnlɛ. 17 Ishmael na li yɛlɛ lafaa, na fulo na kɛmbɔkɔɔnashin mna chin mu ku. 18 U nɔɔ leele pre na tni tra ŋga kraa wa Havilah lawee yire nu mu sɛ su Shur na, mu mbra Egypt sam na, na shie Asshur haa wa. Pre na pe lɛbiile hamblɛ pre nsra tni chiriri.
Esau Na Jacob Semu Kee
19 Abraham pɔ Isaac wre kee yi kre. 20 Ŋga Isaac na li yɛlɛ fuloe shiin kre, wra Laban jaa ŋmba praa yeeri Rebekah, Bethuel pɔ wre leŋge. Bethuel na pe Aramean ndro, mna yiri Mesopotamia na. 21 Rebekah nsraa sii, kre ndra na Isaac na nyiɛtali mna u ŋga. A o Tafun Nyiɛkpɔɔ na u nyiɛtalaa kre loo, a u chɔ Rebekah na siire ta. 22 Na atae lɛ biile pre, a biile shiin pre naa wii na peyɛ ni pe lo lɛɛ wa. A Rebekah na yo mbo, “Yira ŋgi kee sembremu yi ni na ŋga hin?” Ki tia wra sɛ O Tafun Nyiɛkpɔɔ wie.
23 A O Tafun Nyiɛkpɔɔ na yo u pan mbo,
“Waŋgrɛ nyini shiin pee wa mu lɛɛ,
kena leele nyini shiin mu se,
a pie yɔɔlɛ,
mbe waŋgra nunu sheli,
mbe wɛ nunu kre na.
Biile pre,
lopom wre we
ble wre sumi.”
24 Ŋga Rebekah se nyjila na da kre, pra nya na atae bilɛ pee wa u lɛɛ. 25 Pɔ jlo ŋmba wra to wre na nyina, a yooro na u wejiŋge tɔ poŋgo, mna pe na dodoŋgi ŋga pe mbayooro tɛɛ mu pe yi, ki tia pra u mɛɛ tɛɛ, Esau. 26 Ŋga pɔ shiinwo wre na to, na uu wa mu Esau yeŋmbele yii, ki tia pra u mɛɛ tɛɛ Jacob. Nyjila ŋga ni Rebekah na pe se kre, na Isaac li yɛlɛ fuloe taarɛ.
Esau Na U Lopom Prɛ
27 Biile pre na lɛ, a Esau na pe bɔfɔ titi ŋmba wraa nyaa kila chaa, la, Jacob rɛ, wre na nyjii, mnaa katoo tnɛɛ chaa. 28 Nyaa kaara na tna Isaac pan, ki tia wraa Esau kee chaa, a Rebekah rɛ, Jacob kee wre naa chaa.
29 Ki ble ka Esau na yiri nyaa mu le mu fna, na klo u ta. Kre nyjila kre, na Jacob chiin yɛ soori, 30 a wra yo Jacob pan mbo, “Klo ni ta, ni ŋga mu chiin nyiɛ nyjɛ yɛ mbe ni gbɔ, ni chaa ku.” Kre ndra na praa u yeeri Edom.
31 Jacob na kna mbo, “Mu semu lopom kre kna mu ni ŋga, mbe mu ŋga chiin yire yɛ.”
32 A Esau na yo mbo, “Le, fuŋgaami klo chaa ni gbo. A yira chichie ŋgi kuraa semu lopom we ni ŋga hin? Ni ŋga mbe ni gbɔ!”