5 A u sumifun wre na u wie mbo, “A na chlɔ wre waa je mbo wa pan hin? Na ki pan ma, kena ni ndru mbe sɛ na mu pɔ wre ni mu waŋgra ŋga nu mu yiri mu pan mna kre nu ree?”

6 A Abraham na yo mbo, “Dɔɔta, mbe ma ndru mbe sɛ na ni pɔ wre ni wa. 7 O Tafun Nyiɛkpɔɔ nyjeeri na tra tafun wre wra ni wɔ mu yili ni lɛ katoo, na tra ŋga nu pra ni se nu, mna paara na ni ni, mna u nyu yo ni pan mbo, ‘Mu nanae mbe ŋga tra ŋga.’ Kena wre Nyiɛkpɔɔ wre we u nyjeeri bituŋu tun, mbe u yiɛ klu mu pan, mbe mu chlɔ ta wa mbe paan ni pɔ wre ŋga mbe u leŋge. 8 A na chlɔ wre waa je na wa taa mu na mbe pan naa, kena mu shɔ ni daŋga ŋga kɛɛ. La, dɔɔta mbe ma ndruu sɛ na ni pɔ wre ni wa.” 9 Ki tia Abraham sumifun wre na kɛ le Abraham jekpɔlɔ jaara, mna da mu u ŋga na we kee ŋga u yo kre pe.

10 A u sumifun wre na u tafun wre nyuuma kɛ, na u yirɛ chichiele nyini nyini wru mbe sɛ kɛ. Wra to kolo na shie kakpɔɔ ŋga na Nahor na tni na shie Mesopotamia nyjeeri haa kre na. 11 Ŋga wra sɛ le wa kre, a wra tia nyuuma pre na sɛ sni sni kɔlɔ ka mbɛɛ na, chia kre mbookrɔ. Yilakɔŋgɔ nyu na yi, a na kre nyjila kre, chiɛlɛ shie lɔɔ. 12 A wra yire wa mna nyiɛtali mbo, “O Tafun, ni tafun Abraham Nyiɛkpɔɔ, ti mbe aŋga ble ŋga nyu ni na, mu ni tafun Abraham sɔɔnri mu nyu u na. 13 Nii wa mu yire kɔlɔ ŋga jaara, a chia ŋga chiɛlɛ na paan lɔɔ nyumu ko haa. 14 Ti mbe bichable ŋmba pan mbe yo na, ‘Jande tuu, mu ni ŋga nyumu mbe ni gbɔ.’ A waa yo na, ‘Ka shɔ mu gbɔ, mbe ni ka ko mbe nyuuma pre ŋga na kre.’ Ti mbe u pe chlɔ ŋmba mu wɔ mbe mu sumifun Isaac ŋga. Na ki pan ma, kie ti mbe ni chin na mu nyu ni tafun Abraham na.”

15 U nyiɛtalaa kre nyu nsra ta mu to, na Rebekah pan mu yire chɔkoo ni patia na, nyumu ko haa. Rebekah lɛ na wi Bethuel, a Abraham chunu Nahor na u chɔ Milcah pɔ na wi Bethuel. 16 Na mu Rebekah nya, wra nyu titi, a na u n ta mu blɔ chin tun.

Ki ble kre yilakɔŋgɔ, wra sɛ kɔlɔ kre nyu na, nyumu ko haa na u chɔkoo ni. Ŋga wra ko mna yili fimi na to, 17 a Abraham sumifun wre na fɛ mna sɛ u fni, mna yo u pan mbo, “Jande, ni ŋga nyumu kre ka mbe ni gbɔ.”

18 A wra nyumu kre laa u patia na nyaanyaa mna yo mbo, “Ni tafun, gbɔ ɛ!” A Rebekah na ki yii, a wraa gboo. 19 Ŋga wra gbɔ mu kɔ kre, a bichable wre na yo mbo, “Mbe nyumu kre ka ko mbe paan mu nyuuma pre ŋga, mbe sɛ su na pie gbɔ mbe yɔɔ.” 20 A wra nyumu kre kna nyaanyaa mu le wee ŋga nu yurɛ gboo kre nu, mna ndru mu fɛ mna sɛ ka ko mu pan mu le pe pan, wra ko mu pe ŋga mna sɛ su na yurɛ pre na gbɔ mu yɔɔ. 21 Blɔ wre na pieri komm na bichable wre le, na aada o Tafun Nyiɛkpɔɔ we ti mbe u kolo ŋga u nyaari kre nyu mbe u ŋga ree, mni hin?

22 Ŋga yurɛ pre na gbɔ mu kɔ kre, a blɔ wre na swanyiɛ feelee, na swanyiɛ kɛgbrɛ badɛnyi shiin yɛ wɔ mu yii kɛɛ, 23 mna u wie mbo, “Mu lɛ wi ŋmbi hin? A oo nyuŋgo ta mbe sni u katoo blee ŋgaa?”

24 A bichable wre na kna mbo, “Ni lɛ wi Bethuel, Nahor, na u chɔ Milcah biblɔ wre. 25 Nyaa nyjɛ yurɛ pre we kaa wa, a lawee wa mbe yire na yurɛ pre kro ta mbe sni.”

26 A blɔ wre na kosie kan tra mna o Tafun Nyiɛkpɔɔ wre ŋga mboo. 27 Wra yo mbo, “Ni O Tafun, ni tafun Abraham Nyiɛkpɔɔ wre kaan mɛɛ. Ŋgi na hin? Wre u nyu ni na, mu li u nyu kee ŋga wra yo ni tafun Abraham pan kre na, mu yiɛklu ni pan ni kolo ŋga ni kun ŋga nu, mu pan mu le na ni ni u sele wolo katoo.”

28 Titɛɛ kre nu, a bichable wre na fɛ mna sɛ mandiɛ kre kro bɔ u lo katoo leele pan. 29-30 Rebekah lɛm Laban naa wa wa. Ŋga wra feelee kre nya Rebekah mana, na kɛgbrɛ yire ni u kɛnyi na, na imi Rebekah na blɔ wre mandiɛ nyjɛ wra bɔ u pan yire kee yo kre, a Laban na fɛ mna sɛ kɔlɔ kre jaara, na Abraham sumifun wree wa mu yire u nyuuma pre jaara kɔlɔ kre mbɛɛ na. 31 A Laban na yo sumifun wre pan mbo, “Yira ŋgi mu yire mna na pini hin? Pan mbe o sɛ katoo. Mu pe ndro ŋmba o Tafun Nyiɛkpɔɔ dwan. Ni nyuŋgo gbeele mu tɛɛ e pan, a lawee wa mu nyuuma pre pan na.”

32 A blɔ wre na taa u na, a pra sɛ katoo, a Laban na tuuro yire laa yurɛ pre na mu tɛɛ, mna pe ŋga nyaa a pra ka, a wra nyumu ko mu Abraham sumifun wre na u leele pre ŋga, a pra pe jeelee je. 33 Ŋga pra pan na sro ni mbe pe li kre, a blɔ wre na yo mbo, “Mba li, fɔna ni kee ŋga na ni pan kre yo tun.” A Laban na yo mbo, “Ki yo ɛ!”

34 A wra yo mbo, “Abraham sumifun wi mi. 35 O Tafun Nyiɛkpɔɔ wre ni tafun dwan kpɔɔ, mu tia u uyɛ ta. Nyiɛkpɔɔ u ŋga mbaala, na sikaala, na nui, na swafiŋge, na swanyiɛ, na tinlɛ chiɛlɛ na bilɛ, na nyuuma, na bubunlɔ. 36 Ni tafun chɔ Sarah wre na biblɔ wa se u chalɛm nyjila, a ni tafun u yirɛ kro bali mu u pɔ wre ŋga. 37 Ni tafun na tia ndaa da mu u ŋga na mbe li u nyu kee na. Wra yo mbo, ‘Maa shia bichabɛɛlɛ mblɛ pee wa Canaan leele tra ŋga nu ni nyi mu tni ŋga wa cha mbe ni pɔ ŋmba ŋga mbe u leŋge. 38 La, sɛ ni lɛ leele nu, pre lɛ ni sele leele titi, mu sɛ chlɔ cha wa mu u ŋga mbe u leŋge.’ 39 A ndaa ni tafun wie na, ‘Na bichable wre waa je na wa taa ni na mbe sɛ hin?’ 40 A wra kna mbo, ‘Nyiɛkpɔɔ ŋmba nyu kee na ni lii nyjila kro nu wre, we ti u nyjeeri bituŋu yiɛklu mu pan, mbe mu kolo kro nyu mbe mu ŋga, mbe mu chlɔ ta ni lɛ katoo, mi titi sele leele nu mbe paan ni pɔ wre ŋga mbe u leŋge. 41 Kolo nunu na mu jaa tro mbe shɔ ni daŋga kre kɛɛ, kre yi na, na maa sɛ ni sele leele pre pan, a pe waa je mu pan chlɔ wre na, kena mu shɔ ni daŋga kre kɛɛ.’

42 Ki tia ŋga ni pan mu da kɔlɔ kre jaara, a ni nyiɛtali mu yo, ‘O Tafun, ni tafun Abraham Nyiɛkpɔɔ, jande nyu ni na kolo ŋga ni kuun ŋga nu. 43 Ŋga ni yire kɔlɔ ŋga jaara ŋga, ti mbe bichable ŋmba we pan nyumu ko haa, a ndaa yo u pan na, Jande ni ŋga nyumu chiɛri mbe ni gbɔ. 44 A waa yo ni pan na, Shɔ mu gbɔ ɛ! Maa ndru mu yo na, Mbe nyumu kre ka ko mbe mu yurɛ pre ŋga kre. Ti mbe u pe chlɔ ŋmba o Tafun Nyiɛkpɔɔ wɔ mbe ni tafun pɔ wre ŋga.’ 45 Ni nsra ta mu nyiɛtali mu kɔ, na Rebekah da na u chɔkoo ni patia na nyumu ko haa kolo kre nu, a ndaa yo u pan na, ‘Jande, ni ŋga nyumu kre ka mbe ni gbɔ.’ 46 A wra nyumu kre laa u patia na nyaa nyaa mna yo mbo, ‘Shɔ mu gbɔ, mbe ni sɛ ka ko mbe paan mu nyuuma pre ŋga na.’ A ndaa ka gbɔ, a wra ndru mu sɛ ka ko mu pan mu ni yurɛ pre ŋga na. 47 A ndaa u wie na, ‘Mu lɛ wi ŋmbi hin?’ A wra yo mbo, ‘Ni lɛ wi Bethuel, Nahor na u chɔ Milcah biblɔ wre.’ A ndaa feelee kre wɔ mu le u mana, mna kɛgbrɛ yire le u kɛnyi na. 48 A ndaa kosie kan tra mna ni tafun Abraham Nyiɛkpɔɔ wre sumi, mna u ŋga mɛɛ. Ŋgi na hin? Wre wra yiɛklu, mu kofrakaa yii na ni ni, mbe paan ni tafun chunu nana cha mbe u pɔ ŋga mbe u leŋge. 49 Kena fuŋgaami, na mu nyu ni na, mbe kpra li mbe ni tafun wre ŋga kre, kena yo ni pan, a na kia pe ma naa, yo ni pan, mbe ni chin kolo ŋga na mbe tro.”

50 Laban, na Bethuel na kna mbo, “Ŋga Nyiɛkpɔɔ titi pan kala ŋga yiri ŋga, o n kee ka ni mbe yo. 51 Rebekah wi kre, u bali mu sɛ mu tafun pɔ wre ŋga mbe u leŋge, imi na o Tafun Nyiɛkpɔɔ wre yo kre.” 52 Ŋga Abraham sumifun wre na kee ŋga loo kre, a wra lɛɛlɛ mna o Tafun Nyiɛkpɔɔ wre ŋga mboo. 53 Mna yonyi, na swafiŋge, na swanyiɛ lagboo jlɔnyi, na ndiile yirɛ wɔ mna Rebekah ŋga. A wra ndru mna yirɛ nyjɛ ndrɔ yi sheli wɔ mna u lɛm wre, na u lo ŋga.

54 A Abraham sumifun wre na u leele pre na li, mna gbɔ, mna sni wa a nyiŋge na se. Ŋga nyiŋge na se a pra yiri bnimi kre, a wra yo mbo, “E ti mbe ni ndru mbe sɛ ni tafun pan.”

55 A Rebekah lɛm wre, na u lo na yo mbo, “Ti mbe bichable wre tni o jaara kranu, ndee ble kɛ yɛ mbe o u wa kolo mbe e sɛ.”

56 A blɔ wre na yo mbo, “Yaa ti mbe o kro mna. O Tafun Nyiɛkpɔɔ tia ni kolo ŋga ni kun ŋga nyu mu ni ŋga, kena e ti ni ndru mbe sɛ ni tafun pan.”

57 A pra kna mbo, “Ti mbe o Rebekah yeeri mbe u wie, mbe loo kala ŋga we yo.” 58 Ki tia pra Rebekah yeeri mna u wie mbo, “Mu chaa mbe ŋu na blɔ ŋmba sɛ ree?” A wra kna mbo, “Mbe sɛ.”

59 Ki tia pra pe jaa Rebekah, na sumifun chlɔ ŋmba wra u pɔɔri wre, na Abraham sumifun wre na u leele pre wa kolo, a pra sɛ. 60 A pra dwan mu Rebekah ŋga mu yo mbo,

61 A Rebekah na u sumifɛɛnlɛ chiɛlɛ pre na peyɛ kna mna nduu pe nyuuma na, a pra taa Abraham sumifun wre na mna sɛ.

62 Kre nyjila kre na Isaac yiri Beer-Lahai-Roi na, mu pan mu tni Negev tablɔ tra kre nu. 63 Ki ble ka yilakɔŋgɔ wra yili mna sɛ nyaa mna sɛ na uyɛ jawai. Ŋga we nya na nyuuma plɛ paan. 64 A Rebekah na yire mna wra nyi kre, mna Isaac nya, a wra tii u nyuuma wre na, 65 mna Abraham sumifun wre wie mbo, “Blɔ ŋmbi u nyaari wa na paan mbe o fni ŋga hin?”

A sumifun wre na kna mbo, “Ni tafun wre wi.” Ki tia wra u sata laa mna u yiɛ tɔ na ki ni.

66 Ŋga pra fni kre, a u sumifun wre na kee ŋga wra sɛ pe kro bɔ Isaac pan. 67 A Isaac na sɛ Rebekah le yoŋgo nyuŋgo ŋga nu u lo Sarah na nyi mna chin mu ku kre nu, a wra pe u chɔ. Isaac na Rebekah kori titi, ki tia ŋga wra u ta kre, wra u lo kumu kre kee fɛɛ, a u yiɛ na ndru mna shɔ na.