Genesis 23

Sarah Kumu Na U Le Haa

Sarah na li yɛlɛ lafaa na fulo na kɔɔnashin, 2 mna ku Hebron ŋga kii wa Canaan tra nu kre na, a Abraham na le u chɔ kro yoŋgo nyuŋgo kre nu, mna u nyɛni chichie.

3 Abraham na kɔ mu yiri u chɔ gboo wre jaara, mna sɛ paara Hittite leele pre pan mbo, 4 “Fuŋu wi mi e nu, a ni n tra ni mna, kena e ni ŋga tra, mbe ni lɔ, mbe ni chɔ le.” 5 A Hittite leele pre na yo u pan mbo, 6 “O tafun, loo! O mu le na Nyiɛkpɔɔ lekpɔɔ wi ŋu o nu, kena o dnɛ weele nyjɛ nu o leele leni yire ŋga mu chaa le mu wɔ, mu mu chɔ wre le, o wa n wa mbe je mu pan na maa mu chɔ wre le u wo nu.”

7 A Abraham na yiri mna lɛɛlɛ Hittite leele mblɛ wo yi tra kre yiɛ mna yo mbo, 8 “Na e chaa mbe ni ni chɔ le mna, kena e jande, e Ephron Zohar pɔ wre tali ni pan, 9 mbe u u dnɛ wee ŋga kii wa Machpelah na, mu mbra u see na kre prɛ ni pan. E yo u pan mbe u ki prɛ ni pan na ndrɔ ŋga ni e yi prɛ mna ni, mbe ni ki ta mbra ni leele leni.”

10 Na Ephron Hittite ndro wre na u chia leele pree wa mu tni u chia kre jlonwee nyu na wa, a wra kna mu yo Abraham pan leele pre kro yiɛ na mbo, 11 “Ni tafun, loo! Ni mu kɛ tra kre, na dnɛ wee kre kro. Ni mu kɛ ki yi ni leele mblɛ yiɛ na, sɛ mu chɔ wre le wa.”

12 Abraham na ndru mna lɛɛlɛ leele pre yiɛ, 13 mna paara Ephron pan, a leele pre kro na ki loo mbo, “Loo! Kena na mu li ki na, mbe tra kre fɔlɔ tɔ mbe mu ŋga, mbe ki ta mbra ni leele leni.”

14 A Ephron na yo mbo, 15 “Ni tafun loo ni pan! Tra kre ndrɔ we pe swafiŋge lafɛɛ jijirɛ, a yira ŋgi yira yi kre swa ŋga mi na ŋu lalaa hin? Tra kre wru mu mu chɔ wre le.” 16 A Abraham na yire Ephron nyu kee ŋga wra yo kre na, imi na wra tra kre ndrɔ nyini, a leele pre na loo kre, mna swa kre kra swafiŋge lafɛɛ jijirɛ, imi na jafalifɛɛnlɛ pre naa ki chinɛ kre, mna Ephron ŋga.

17 Kena imi kra pe a Ephron tra ŋga kraa wa Machpelah na, mna mbra Mamre na kre, na kɔ mna pe Abraham wo na yi kre. Tra kre, na dnɛ wee ŋga kraa wa ki nu kre, na tinyi nyjɛ yiraa wa lawee kre nu mu sɛ su tra kre sam na kro, 18 wra Abraham ŋga yi yi Hittite leele mblɛ pra pan mu fni chia kre jlonwee nyu na wa pre kro yiɛ na.

19 Ŋga pra paara mu kɔ kre, a Abraham na sɛ u chɔ Sarah le dnɛ wee ŋga kraa wa Machpelah tra nu, mna mbra Mamre, ŋga pe yeeri Hebron Canaan tra nu kre nu. 20 Ki tia Machpelah tra kre, na dnɛ wee ŋga kraa wa ki nu kre, Hittite leele pre na ki prɛ Abraham pan, a kra pe u krɔyira, a wraa u leele leni wa.