2 A Nyiɛkpɔɔ na yo mbo, “Mu pɔ nunu chom Isaac ŋmba mu kori wre wru mu sɛ Moriah tra nu. Na maa sɛ da wa, mbe mu nyina nyua ka, mbe mu u gbo, mbe u sro nyua kre na, mbe sra wɔ mbe ni ŋga.”

3 Ŋga nyiŋge na se bnimi kre, a Abraham na kenyi cha, mna yi pɔ mu taa u bubnɔ na, wre na Isaac, na u sumifɛɛnlɛ pre shiin. A pra yiɛ le lawee ŋga Nyiɛkpɔɔ na u nyina kre nu na shie. 4 Ŋga praa shie kre, pe ble taarɛ ble na Abraham na yiɛ yire mna lawee kre nya haalee. 5 A wra yo u sumifɛɛnlɛ pre pan mbo, “E yire mna na bubnɔ wre ni. Mi na pɔ wre we sɛ mna wa mbe sɛ sumi mbe pan.”

6 Abraham na tia Isaac na kenyi yire tio, a wre titi na brɔfiɛn na kanhun yii. Ŋga praa shie kre, 7 Isaac na yo mbo, “Ndoo!” A Abraham na yo mbo, “Ni pɔ?” Isaac na yo mbo, “Ni kanhun na kenyi nya rɔ, a sena mbɔɔ ŋmba ni oo sra wɔ wre nyi hin?”

8 A Abraham na yo mbo, “Nyiɛkpɔɔ wre titi we o ŋga wa mbe o u tɛɛ mbe sra kre wɔ.” A pe kro na chaa mnaa shie.

9 Ŋga pra sɛ da lawee ŋga Nyiɛkpɔɔ na Abraham nyina kre nu kre, a Abraham na sragbunu sin, mna kejenyi yire taa taa yi yɛ na sragbunu kre na, mna Isaac pɔ mna u bali mu taa kenyi yire na sragbunu kre na. 10 A wra brɔfiɛn kre bali, mbe u pɔ wre gbo na ki ni. 11 La, ŋga wra yo we u gbo to, a Nyiɛkpɔɔ bituŋu na yire nyjeeri mu u yeeri mbo, “Abraham, Abraham!” A wra kna mbo, “Ni we.”

12 A bituŋu wre na yo mbo, “Maa shia kɛ taa pɔ wre na, a maa shia u pe yaka. Fuŋga ni chin na mu Nyiɛkpɔɔ fiɛ. Ŋgi na hin? Mu n je ni pan mu pɔ nunu chom wre na.”

13 Ŋga Abraham na yiɛ yire kre, wra mbaplɔ wa nya u kro, na u nyamblɛ nyjira kɛɛn yɛ nu, nyaa ka nu. A wra sɛ u wɔ mna pan mu u gbo, mu u sro, mu tɛɛ mu sra wɔ mu Nyiɛkpɔɔ ŋga, u pɔ wre titɛɛ. 14 Abraham na lawee kre mɛɛ tɛɛ mbo, “O Tafun Nyiɛkpɔɔ ŋmba u kee.” Hali mu pan mu su aŋga na, leele lawee kre kee yuu mbo, “O Tafun Nyiɛkpɔɔ nyua kre na wa we o kɛ.”

15 Nyiɛkpɔɔ nyjeeri bituŋu wre na ndru mna Abraham yeeri shiinwo na, mna yo mbo, 16 “Mu Tafun Nyiɛkpɔɔ wre yo na, ‘Ni da mu niyɛ ŋga na, ŋga mu ni kee loo, a mu n je ni pan mu pɔ nunu chom wre na kre ndra na, 17 mbe mu dwan yɛŋgɛ, mbe ti mu nanae nɛɛ na wɔɛlɛɛ nyjɛ yii wa nyiɛ yiɛ na, ndee na epo nyu tanyiɛ yi. Mu nanae we wi mbe pe loŋgoolo chiɛ shɔ mbe tni. 18 A u nanae na waŋgrɛ kro we yire mbe dwamu ta tra yiɛ na, ŋga mu ni nyu kee loo kre ndra na.’” 19 Abraham na ndru mna sɛ u sumifɛɛnlɛ pre pan lawee ŋga nu wra pe ti kre nu, a pe kro na chaa mna sɛ Beersheba na, mna Abraham na nyi kre.

20 Mbakɔ, Abraham na loo na Nahor chɔ Milcah bibilɛ kɔɔnatarɛ se. 21 Lopom wre mɛɛ na yi Uz, ŋmba wra taa na wi Buz, ŋmba wra taa na na wi Kemuel, Aram lɛ na wi wre. 22 A hamblɛ pre na lɛ, Kesed, na Hazo, na Pildash, na Jidlaph, na Bethuel. 23 Bethuel wra kɔ mu Rebekah se. 24 Nahor na bichrɔ wa wru, u mɛɛ na yi Reumah, a wre na wre na bibilɛ jijirɛ se. Pe mɛɛ na yi, Tebah, na Gaham, na Tahash, na Maacah.