Isaac Semu Kee
21
O Tafun Nyiɛkpɔɔ na nyu Sarah na, imi na wra nyu yo u pan kre, 2 mna tia wra siire ta, mna biblɔ se mu Abraham ŋga, u blɛlɛm nyjila. Nyjila ŋga Nyiɛkpɔɔ na tɛɛ na pie pɔ wre se kre nu to, pra u se, 3 a Abraham na u mɛɛ tɛɛ Isaac. 4 Ŋga Isaac na li ble kɔɔnatarɛ kre, Abraham na u fɛŋgɛ kun, imi na o Tafun Nyiɛkpɔɔ na yo u pan kre. 5 Nyjila ŋga nu pra Isaac se kre, na Abraham li yɛlɛ lafaa. 6 Sarah na yo mbo, “Nyiɛkpɔɔ tia ni yiɛ shɔ, a ndaa tɛɛ. Ŋmba we kala ŋga loo kro we yɛshɔɔrɔ li mbe tɛɛ na.” 7 A wra ndru mu yo na mbo, “Kaa ndro ŋmbi we yo Abraham pan na Sarah we jaa se hin? A nde ni biblɔ se mu Abraham ŋga u blɛlɛm nyjila.”8 Pɔ wre na lɛ, a ki ble ŋga pra u kun nyinimi na kre, Abraham na sukpɔɔ pe mna kɛ wa mu leele yeeri a pra pan mu li.
Pe Hagar Na Ishmael Ni
9 La, Sarah na nya na Ishmael, Abraham biblɔ ŋmba u se Hagar Egypt chlɔ wre na kre Isaac pini na tɛɛ. 10 Sarah na pe nya mna yo Abraham pan mbo, “Tnichlɔ wre na u pɔ wre ni mbe pe sɛ. Ŋgi na hin? Tnichlɔ wre pɔ wre wa mu krɔyirɛ yɔ na ni pɔ Isaac ni fio.” 11 Kre kee ŋga na Abraham lamu kla kpɔɔ. Ŋgi na hin? Na Ishmael pe u pɔ na. 12 La, Nyiɛkpɔɔ na yo Abraham pan mbo, “Maa shia ti mbe pɔ wre, na mu tnichlɔ Hagar wre kee mu lɛɛ kla. Imi na Sarah yo mu pe kre, pe ma. Ŋgi na hin? Isaac nu mu nanae titie pre we yili mbe pan. 13 Mbe ti mu tnichlɔ pɔ blɔ wre kaari waŋgra kpɔɔ ka na. Ŋgi na hin? Mu pɔ wi wre na.”
14 Ŋga nyiŋge na se bnimi pupu, Abraham na Hagar ŋga sro, na nyumu yurɔ hlɛ gbolo nyini, a Hagar na u pɔ wru mu taa patia na, a Abraham na sɛ pe wa kolo. Pra yiɛ le Beersheba tablɔ tra kre na, mna sɛ na kila na tro. 15 Ŋga nyumu kre na kɔ yurɔ hlɛ gbolo kre nu kre, a wra sɛ pɔ wre tɛɛ wrɛ yɛ nu, 16 mna sɛ yiɛ chiɛri, kie pe yaadi lafaa nyu na, mna sɛ tni wa mna yo mbo, “Mba jaa tni mbra ni pɔ le, mbe u ku ni yiɛ na.” A wra tni wa na nyɛni.
17 Nyiɛkpɔɔ na loo na pɔ wre nyɛni, a Nyiɛkpɔɔ nyjeeri bituŋu wa na yire nyjeeri mu paara Hagar ni mbo, “Hagar, yira ŋgi ki mu ta hin? Maa shia fiɛ, Nyiɛkpɔɔ pɔ wre nyɛnɛɛ loo mna mu u sniŋge kre. 18 Yiri mu sɛ u bali, we ti u nɔɔ leele kaari waŋgra kpɔɔ ka.” 19 A Nyiɛkpɔɔ na u nyiɛlɛ nyaa, a wra kɔlɔ ka nya. Titɛɛ kre nu a wra sɛ nyumu ko mna le u yurɔ hlɛ gbolo kre nu, a kra nyi, a wra pɔ wre ŋga ka, a wra gbɔ. 20 Nyiɛkpɔɔ kɛ naa wa pɔ wre na, a wraa lee. Wraa wa mu tni Paran fimi tra kre nu, mna snimi wa mu chin. 21 Nyjila ŋga ni wraa wa Paran na wa kre, u lo na sɛ Egypt chlɔ cha mna pan mu u ŋga, a wra leŋge.
Abraham Na Abimelech Na Nyu Nunu Pe
22 Kre nyjila kre nu Abimelech na sɛ na u sojae lopom Phicol ni Abraham shaari haa. A Abimelech na yo Abraham pan mbo, “Ki pe kpra na kala ŋga mu pini kro Nyiɛkpɔɔ wa mu kro. 23 Ni chaa mbe mu da mbe ni nyina Nyiɛkpɔɔ yiɛ na fuŋgaami, na ma daa mi, na ni biile, na ni nanae wa fana. Imi na ni mu pe chichie kre, ni chaa mbe mu ni pe chichie ma na, mbe mu waŋgra ŋga na mu nyi mu tni na fuŋu wi ŋga jawa chichie ni na.”
24 A Abraham na kna mbo, “Ni da, na mbe kpra li na mu ni.”
25 Abraham na kɔlɔ ŋga Abimelech sumifɛɛnlɛ na shɔ u pan pɔɔrɔ na kre kee yo u pan. 26 Abimelech na yo mbo, “Ni n chin ndro ŋmba u kre kala ŋga pe. A mu n ki yo ni pan, aŋga lam ni ki ndru kre.” 27 A Abraham na Abimelech ŋga mbaala, na nui, a pe kro shiin na nyu nunu pe. 28 Abraham na mbaala biile kɔɔnashin wɔ u mbaala pre nu mna tɛɛ, 29 a Abimelech na u wie mbo, “Mbaala biile mblɛ mu wɔ mu tɛɛ mbɛɛ na ŋga, yira ŋgi mu pe na pe ni hin?”
30 A Abraham na kna mbo, “Mbaala biile kɔɔnashin mblɛ shɔ, mbe ki pe dansiɛrɛ yira o lalaa, mbe nyina na mi ndaa kɔlɔ ŋga tuu.” 31 Ki tia praa lawee kre yeeri Beersheba. Ŋgi na hin? Bawa pe kro shiin na da mna pe yɛ ŋga.
32 Ŋga pra kre nyu nunu ŋga pe mna kɔ Beersheba na wa kre, Abimelech na Phicol u sojae lopom wre, na ndru mna sɛ Philistine tra nu. 33 A Abraham na tamarisk tiŋge luu Beersheba na wa, mnaa o Tafun Nyiɛkpɔɔ ŋmba uu wa blenyini wre mɛɛ cheche kre yeeri na u sumi. 34 Abraham na tni Philistine tra kre nu mna mu.