Abraham Na Abimelech Kee
20
Abraham na kɔ Mamre na mna sɛ tni tapan haa Kadesh, na Shur lalaa. Mbakɔ wra yiri mna sɛ tni chia ŋga praa yeeri Gerar kre na. 2 Abraham na yo bawa leele pan na u jaa wi Sarah, kra tia Gerar ŋunu Abimelech na tia pra sɛ Sarah bali mna sɛ u ŋga u katoo. 3 La, ki ble kre blee, Nyiɛkpɔɔ na u yɛ wɔ mna Abimelech nyina ŋunɛ nu, mna yo u pan mbo, “Ŋu, gboo wi ŋu. Ŋgi na hin? Chlɔ ŋmba mu wru ŋga, blɔɔ wa u pan.”4 La, na Abimelech n ta mu sni na u ni tun, ki tia wra yo mbo, “Ni Tafun, na ndro n kee sisaa ka pimi li mu u kuu ra? 5 Abraham wre titi u yo ni pan na u jaa wi, a pan Sarah yo ni pan chɔɔ na u lɛm wi. Kena kee ŋga ni pe ŋga, sisaa ŋgi ni pe hin?”
6 A Nyiɛkpɔɔ na yo u pan ŋunɛ yire nu mbo, “Ni chin na mu n sisaa pe. Kre ki tia ni n tia mu punu ni na kre. Mi ni tia mu n da u na kre. 7 Ti mbe u ndruu sɛ u plɔ pan, Nyiɛkpɔɔ keenyanyofun wi blɔ wre, a we nyiɛtali mbe mu ŋga, mbe mu ŋmaa ta. La, na mu n tia u ndru mu sɛ u plɔ pan, chin na ŋu na mu katoo leele we ku peii.”
8 Ŋga nyiŋge na se bnimi, a Abimelech na u loplombo pre kro yeeri mna kala ŋga kra pan kre yo pe pan, a fiɛrɛ na pe kro yii kpɔɔ. 9 A Abimelech na Abraham yeeri mna u wie mbo, “Kala ŋgi mu o pe ŋga hin? Sisaa ŋgi nyini ni pe mu na, a mu tia kre keesaa ŋga nyini pan mi na ni leele na ma hin? Kee ŋga mu pe ŋga n fna mbe mna ki pe ni na.” 10 A wra ndru mu u wie mbo, “Yira ŋgi na mu kaan mu kre kee ŋga pe hin?”
11 A Abraham na kna mbo, “Ni jawa na ndro n wa mna na Nyiɛkpɔɔ fiɛ. Kena aada pie ni gbo mbe ni chɔ wre bali. 12 Na ni kre tɛɛ mbɛɛ na kuraa kre, ni jaa titi wi yɛŋgɛ. Ni lɛ pɔ wi, la, ni lo pɔ ma, a ni u leŋge. 13 Ŋga Nyiɛkpɔɔ ni wɔ mu yili ni lɛ katoo, a ndaa kila na tro kre, ndaa yo u pan na, ‘Mna oo sɛ kro, nyu ni na, mu yo na ni jaa wi ŋu.’”
14 A Abimelech na ndru mu Sarah wru mu Abraham ŋga, mna u ŋga mbaala, na nui, na sumifɛɛnlɛ bilɛ na chiɛlɛ mna ya. 15 Wra yo Abraham pan mbo, “Le, tra ŋga kro ni wo yi, lawee ŋga mu chaa le mu wɔ mu sɛ tni wa.” 16 A wra kna mu yo Sarah pan mbo, “Ni mu lɛm wre kaan swafiŋge kagbeŋge, mbe ki pe dansiɛrɛ yira mbe mblɛ ŋu na pre nyaari pre kro ŋga, na mu n sisaa ka pe, a mu n pimi li.”