Sodom Na Gomorrah Leele Sisam
19
Ŋga bilɛ shiin pre na sɛ le Sodom na ki ble kre yila kɔŋgɔ kre, na Lot wa mu tni chia kre jlonwee nyu na. Ŋga wra pe nya to, a wra yiri mna sɛ pe fni, mna lɛɛlɛ pe yiɛ, 2 mna yo mbo, “Ni tafɛɛnlɛ, nii wa mu tni mna na e sumifun wi, jande e pan e sɛ le ni pan. E e jeelee je, e ŋunu ni katoo, na nyiŋge se bnimi pupu mbe e yiri mbe sɛ mna e shie.”La, leele pre na kna mbo, “Ɔɔhɔn, oo jaa sni lete na.”
3 A Lot na pe tali chiin, a pra kɔ mna nɔɔloo ta, mna taa u na mu sɛ u katoo wa. Lot na tia u sumifɛɛnlɛ na sro chichie pe, mna paanu ŋga nu yiisi n wa fɔ mu ya, a pra li, mna ka.
4 Fumblɔ pre nsra ta mu sni, a Sodom bilɛ kro na pan mna katoo kre fɛ mu kun. Chia kre nyanyjɛbɛɛlɛ, na blɛlɛɛlɛ kro na pan wa. 5 A pra Lot yeeri mna u wie mbo, “Sena bilɛ mblɛ pe le mu katoo mna yilakɔŋgɔ ŋga pre nyi hin? Pe wɔ mu o ŋga, mbe o sni na pe ni.”
6 Lot na yili fimi na mna pe fni, mna krɔ kre yii mu tɔ, 7 mna yo pe pan mbo, “Jande, o wolo, yaa shia kre ndra shelee kee ŋga pe. 8 E le, bichabɛɛlɛ shiin wa ni pan, a pe n bilɛ chin. E ti ni pe wɔ mbe e ŋga, mbe e ŋga e chaa pe na pe ni. La, bilɛ mblɛ rɛ, yaa pe pe sisaa ka, fumblɔ lɛ ni katoo mna, a ki fna ni pe le chichie.”
9 A pra kna mu yo u pan mbo, “Flo o yiɛ.” A pra kna na yuu peyɛ pan mbo, “Wre blɔ ŋmba fuŋu wi chia ŋga na, a wra chaa mbe o nyina kee ŋga oo pe.” A pra kna mu yo Lot pan mbo, “Na mu n flo o yiɛ, kala ŋga mu nya we wɛ pe wo na.” A pra Lot tini mu wa kro, mbe sɛ krɔ kre ka mbe le. 10 La, bilɛ shiin pre na yili mna Lot tini mu le katoo lam, mna krɔ kre yii mu tɔ. 11 A pra tia Sodom nyanyjɛbɛɛlɛ na blɛlɛɛlɛ pre kro na fun nyiɛlɛ na, a pe nsraa krɔ kre nyu nyaa. Ŋgi na hin? Pra pe chiin mu pra.
Lot Na Yili Chia Kre Na
12 Bilɛ shiin pre na yo Lot pan mbo, “Na muu wa bibilɛ, ndee bichiɛlɛ, ndee nafɛɛnlɛ, ndee sele leele plɛ ni chia ŋga na kre, pe le mu pe wɔ mna fufuŋgaami. 13 Ŋgi na hin? O paan mbe lawee kre kla. O Tafun Nyiɛkpɔɔ leele pre sisam kpɔɛ nyjɛ pe pini yire kee loo, mu o tun na o paan chia kre kla.”
14 A Lot na yili mna sɛ ki yo u nafɛɛnlɛ bilɛ mblɛ wra u bichiɛlɛ pre wru mu ŋga mbe pe leŋge pre pan mbo, “E pe nyaanyaa e yili mna. Ŋgi na hin? O Tafun Nyiɛkpɔɔ paan mbe chia kre kla.” La, u nafɛɛnlɛ pre naa jawa na kaha u lii.
15 Ŋga nyisee nyu na da kre, a nyjeeri bitumblɔ pre na yo Lot pan mbo, “Pe nyaanyaa mu mu chɔ, na mu bichiɛlɛ shiin pre wru mu yili, na kre ma, na o chia kre leele klai oo kɔɔ e kla mbe chaa.”
16 Ŋga Lot nsraa chaa mbe yili chia kre na kre, bilɛ pre na wre, na u chɔ, na u bichiɛlɛ pre kɛ yii mna yili na pe ni chia kre na, yaka nsra pe ta. Ŋgi na hin? O Tafun Nyiɛkpɔɔ wre na nyu pe na. 17 Ŋga nyjeeri bitumblɔ pre na yili na pe ni kre, a pe wa na yo mbo, “E fɛ e eyɛ ŋmaa shɔ. Yaa shia kna mbe le e kro, a yaa shia yire lawee mbrɛrɛ kre nu. E fɛ e sɛ nyuɛ yire na, na kre ma oo e kla mbe chaa.”
18 La, Lot na yo mbo, “Ɔɔhɔn, ni tafɛɛnlɛ, 19 E nyu ni na, mu ni fooro le, mu ni ŋmaashɔ. La, nyuɛ yire haa le titi, mi naa yo mbe da wa, na ni ku. 20 Mu chia fiɛn ŋga wa nyaa? Ki mbra mna, kena ti mbe ni sɛ wa. Ŋu titi mu nya na chia fiɛn ka yi, a na ni da wa mbe ŋmaa ta.”
21 A wra kna mbo, “Ni loo, mba kre chia kre kla, mu jaa sɛ wa. 22 La, fɛ mu sɛ wa nyaanyaa! Mba jaa kala ka pe fɔna mu le wa tun.” Ŋga Lot na chia kre yeeri chia fiɛn kre ndra na, pra ki mɛɛ tɛɛ Zoar.
Sodom Na Gomorrah Klaa
23 Pan yila naa fini to, a Lot na le Zoar na wa. 24 A Nyiɛkpɔɔ na tia kanhun, na pua tuwe chaara na yiri nyjeeri mna pan mu wo Sodom na Gomorrah leele na. 25 Imi o Tafun Nyiɛkpɔɔ wre na yire chiɛ yire, na yi leele, na tra mbrɛrɛ kre, na yirɛ nyjɛ yira fin yi na yire kro kla na yi kre. 26 La, Lot chɔ wre na kna mna le kro, mna kaari weŋge tee.
27 Ŋga nyiŋge na se bnimi pupu kre, Abraham na yiri mna ndru mu sɛ lawee ŋga nu wre na Nyiɛkpɔɔ na yire kre, 28 mna yiɛ wa mu Sodom na Gomorrah le, mna tra mbrɛrɛ kre le mu fɛ mu kun, mna nya na wree yilii tra kre nu poŋgo, na fnunu wre yi.
29 Ŋga o Tafun Nyiɛkpɔɔ na yo we yire chiɛ yire, na tra mbrɛrɛ kre kla kre, wra Abraham sɔɔnri, mna Lot wɔ mu yili ki nu soo.
Moab Leele Na Ammon Leele Yiri Haa
30 Lot naa fiɛ na we tni Zoar na, ki tia wre na u bichiɛlɛ shiin pre na yiri mna sɛ nyuɛ yire na, mna sɛ tni dnɛ weele nu. 31 U pɔ chlɔ lopom wre na yo ble wre pan mbo, “O lɛ lee na paan, a bilɛ n wa tra ŋga nu mbe o leŋge mbe se, imi na waŋgra paala nyi kre. 32 Ti mbe o u ŋga simi mbe u gbɔ mbe to, mbe u sni na o ni. Na o pe ma, kre o sele nɔɔ wa fun.” 33 Ki tia ki ble kre blee, pra tia wra simi gbɔ mu to, a lopom wre na pe lɛ na sni. Lot nsra chin nyjila ŋga ni wra sni na u pɔ wre ni. Ŋgi na hin? Na u gbɔ mu to titi.
34 Ŋga nyiŋge na se kre, lopom wre na yo u chunu wre pan mbo, “Aŋge ndaa tia o lɛ na sni na ni ni. Kena ti mbe o u ŋga simi mbe u gbɔ mbe to aŋga blee ŋga na, mbe mu sɛ mbe ŋu na wre sɛ sni. Na o pe ma, kre o sele nɔɔ wa fun.” 35 Ki tia ki ble kre blee, pra u ŋga simi a wra gbɔ mu to na, a ble wre na sɛ a wre na pe lɛ na sni. Imi na kra Lot pe jle kre, u nsra chin nyjila ŋga nu wra sni na u pɔ wre ni. Ŋgi na hin? Na u gbɔ mu to titi. 36 Ki tia Lot biile pre kro shiin na siire ta pe lɛ na. 37 Lopom wre na biblɔ se, mna u mɛɛ tɛɛ Moab, wre wi Moab leele tolɛɛ. 38 A ble wre na biblɔ se, mna u mɛɛ tɛɛ Ben-Ammi. Wre wi Ammon leele tolɛɛ.