Isaac Semu Nyu Yoo
18
O Tafun Nyiɛkpɔɔ na u yɛ wɔ mna Abraham nyina Mamre oak tiŋge kre jaara wa, na uu wa mu tni u yoŋgo nyuŋgo nyu na lafo chrichri ka na. 2 Ŋga wra yiɛ yire mu le, na bilɛ taarɛ plɛɛ mblɛ pe paan. Ŋga wra pe nya to, a wra fɛ mna sɛ pe fni, mna to mu yiɛ juule tra, 3 mna yo mbo, “Ni Tafun, jande, na ni kee mu yiɛ nyi wala, maa shia mu sumifun wa mbe tro. 4 E ti mbe ni pan na nyumu ni mbe e e jeelee je, mbe tni tiŋge ŋga jaara mbe wuu. 5 A mbe paan e ŋga sro chiɛri mbe e li, mbe faŋga ta mbe chiin jaa e kolo kre haŋa nyaari. Imi e ni ŋga buuro, mu pan mu le e sumifun pan ŋga, e ti ni yaka pe mbe e ŋga.”A pra yo mbo, “O kee ŋga mu yo kre loo, imi mu yo kre ki pe ma.”
6 A Abraham na fɛ nyaanyaa mna sɛ le Sarah kro yoŋgo nyuŋgo kre nu, mna yo u pan mbo, “Mu mimi kre kɔɔŋgɔɔ taarɛ le mu ki bri mu tɛɛ mu paanu pe.” 7 A Abraham na fɛ mna sɛ u yurɛ kahaa, mna sɛ nabie ŋmba nu nyina nyi yii, mna pan mu u sumifɛɛnlɛ pre wa ŋga, na u u gbo mbe u pe nyaanyaa. 8 Ŋga pra yirɛ kro pe mu kɔ kre, a Abraham na naara, na nɔnɔ, na kaara nyjɛ pe fɔ yire wru mna sɛ tɛɛ fumblɔ pre yiɛ tiŋge kre jaara. Nyjila ŋga nu praa lii kre, na uu wa mu yire tiŋge kre jaara na, na pe sri.
9 A pra u wie mbo, “Sena mu chɔ Sarah nyi hin?” A wra kna mbo, “Wre wi yoŋgo nyuŋgo wa kre.”
10 A pe wa na yo mbo, “Yelibaŋga imi nyu, mbe ndruu pan mbe e le. Mi naa paan na Sarah biblɔ se.” Na Sarah wa mu yire Abraham kro krɔ nyu na, na ndru pe pan. 11 Na Abraham na Sarah lɛ titi, na Sarah paaraa kun. 12 A Sarah na laa mu to mu tɛɛ mna yo mbo, “Imi mi lɛ mu da ŋga, blɔ niŋge ŋgi kii wa mi na na hin? A na o kre tɛɛ mbɛɛ na kuraa kre, pan ni plɔ lɛ na.”
13 A o Tafun Nyiɛkpɔɔ na Abraham wie mbo, “Mni a Sarah tɛɛ mu yo na, ‘Kena mbe jaa se na, imi na mi lɛ mu da ŋgaa hin?’ 14 Kala kaa wa, a ki pee sheli o Tafun Nyiɛkpɔɔ pan ra? Imi na ni yo kre, yelibaŋga imi nyu, mbe ndruu pan mbe e le. Mi naa paan, na mu chɔ Sarah biblɔ se.”
15 Fiɛrɛ na Sarah yii, a wra kaala mbo, “Na ni n tɛɛ.” A wra kna mbo, “Mu fni, mu tɛɛ.”
Abraham Tali Mu Sodom Ŋga
16 A bilɛ pre na yili wa mna yiɛ le Sodom na, a Abraham na sɛ pe tro chiɛri. 17 A o Tafun Nyiɛkpɔɔ na yo mbo, “Mba kala ŋga ni paan mbe pe ŋga ndra Abraham na. 18 Mbe ti Abraham nanae kaari waŋgra kpɔɔ, mbe sheli. A wre na mbe yire mbe waŋgrɛ dwan tra ŋga na kro. 19 Ŋgi na hin? Mi ni u wɔ, imi kie pe mbe u u biile, na u nanae nyina mbe pe li u kee na, mbe taa mi pe Tafun Nyiɛkpɔɔ wre na, mbe jaa kee ŋga ki fraka, na kee ŋga ki nyu pe. Na pe pe ma, Mi pe Tafun Nyiɛkpɔɔ wre nyu ŋga ni yo Abraham pan kre, mbe ki pe ma mbe u ŋga.”
20 A o Tafun Nyiɛkpɔɔ na yo Abraham pan mbo, “Ni Sodom na Gomorrah leele pre sisam kpɔɛ nyjɛ pe pini yire kee loo. 21 Kena ni shie mbe sɛ pe le, na kee nyjɛ ni ndru yire pe kpra ree, yi n pe kpra.”
22 A bilɛ shiin pre na yire wa mna yiɛ le Sodom na na shie, la, o Tafun Nyiɛkpɔɔ na kro Abraham mbɛɛ na. 23 Abraham na flo mu da u na, mna u wie mbo, “Kena yɛŋgɛ yi na, mu leele sisaala, na pe chichiele chaa mbe kla ŋgaa? 24 A kena na maa leele fuloe shiin na kɛ mblɛ pe fraka da chia kre na, mu ki kla ree? Kena ma ki ti leele fuloe shiin na kɛ pre pe fraka pre saara naa? 25 Kpra na ni chin na ma sisampefɛɛnlɛ na frakafɛɛnlɛ chaa mbe kla. Kia jaa pan ma. Ŋu wi tra ŋga kro kpra kunfun, a ŋu mu kefrakaa pini.”
26 A o Tafun Nyiɛkpɔɔ na yo mbo, “Na ni leele frakafɛɛnlɛ fuloe shiin na kɛ nya Sodom na, pe ndra na, mba chia kre kla.”
27 A Abraham na ndru mna yo mbo, “Jande ni Tafun, ni sisam ti mu ni kɛ, na ni gbun ta na paara na mu ni. Lewo na nyjuro wi mi, a kaa ni n fna mbe paara na mu ni. 28 La, aada leele fuloe shiin na kunɔ pe fraka chia kre na, na ki pan ma, kena mu chia kre kla ree?” A Nyiɛkpɔɔ na yo mbo, “Na frakafɛɛnlɛ fuloe shiin na kunɔ wa chia kre na, mba ki kla.”
29 Abraham na ndru mu paara mbo, “A na frakafɛɛnlɛ fuloe shiin gbi pee wa wa hin?” A wra yo mbo, “Frakafɛɛnlɛ fuloe shiin pre ndra na, mba ki kla.”
30 A Abraham na yo mbo, “Ni Tafun jande, maa ti mbe mu krɔkun, ti mbe ni paara na. A na ki pan na pee fulo na kɛ gbi hin?” A wra yo mbo, “Na pe da fulo na kɛ mba ki kla.”
31 A Abraham na yo mbo, “Ni Tafun, jande yɛleere ma, na ni gbun ta mu kro na paara na mu ni suwi. A na ki pan na pee fulo gbi hin?” A wra yo mbo, “Na pe da fulo, mba ki kla.”