7 Nyu nunu ŋga ni pini na mu ni ŋga we kro mi na ŋu, na mu nanae lalaa mbe sɛ su nyjila kro nu, mbe yire semtaalaa na mbe sɛ su semtaalaa na. Imi mbe pe mu Nyiɛkpɔɔ, pan chɔɔ mbe pe mu nanae Nyiɛkpɔɔ. 8 Mbe ŋu na mu nanae ŋga Canaan tra ŋga na e pe fumblɔ fuŋgaami ŋga kro. Mbe ŋu na mu nanae ŋga ki yi, mbe ki pe e krɔ yira nyjila kro nu, a mbe pe e Nyiɛkpɔɔ.”

9 Nyiɛkpɔɔ na yo Abraham pan mbo, “Ki fna mbe ŋu na mu nanae li nyu nunu ŋga mi na ŋu pe kre na, mbe sɛ su pe mbakɔ semtaalaa na. 10 Nyu nunu ŋga mi na ŋu, na mu nanae kro pini, mbe e li ki na yi na, Ki fna mbe e biblɔ ŋmba uu wa e nu kro fɛŋgɛ kun. Fɛkɔɔnrɔ kre yi nyu nunu pee kre. 11 Fɛkɔɔnrɔ kre kie pe nyu nunu ŋga mi na ŋu pini kre sɛmbɛɛrɛ yira. 12 Hali mu sɛ su mu nanae kro na, biblɔ ŋmba we li ble kɔɔnatarɛ kro, ki fna mbe pe u fɛŋgɛ kun, pre na sumifɛɛnlɛ mblɛ pee wa mu tni mu katoo kro, na leele mblɛ mu swa tɔɔnri mu lɔ, pre na mblɛ pe n pe mu nanae kro. 13 Ki fna mu pre leele mblɛ kro fɛnyi knumu, kre kie pe wejikaara sɛmbɛɛrɛ nyibie na, mbe pe ni nyu nunu ŋga kie kro ma blenyini. 14 Blɔ ŋmba fɛŋgɛ pe n shia kun kena ufun n pe ni leele pre wa, ŋgi na u n li ni nyu nunu pee kre na.”

15 Nyiɛkpɔɔ na yo Abraham pan mbo, “Maa shia mu chɔ yeeri Sarai na, mu yire aŋga na shie u mɛɛ Sarah. 16 Mbe u dwan, a mbe ti mbe ŋu na wre biblɔ se. Mbe u dwan mbe u paan pe waŋgrɛ nɛɛrɛ lelɛɛ, a u nanae plɛ we pe ŋulo.”

17 Abraham na to mu yiɛ juule tra, mnaa juu na tɛɛ, mnaa paara u jawala nu mbo, “Na blɔ li yɛlɛ lafaa we jaa se ra? Kena ŋga Sarah li yɛlɛ fuloe jijirɛ na kɛ ŋga, we jaa se na ŋgaa?” 18 A wra kna mu Nyiɛkpɔɔ wie mbo, “Ŋgi ki tia ma ti mbe Ishmael pe ni krɔ lifun hin?”

19 A Nyiɛkpɔɔ na yo mbo, “Mu chɔ Sarah we biblɔ se, mbe mu u mɛɛ tɛɛ Isaac. Mbe nyu nunu pe wre, na u nanae ni, mbe nyu nunu kre kro ma blenyini. 20 Kala ŋga mu yo mu wru Ishmael haa kre na, mbe u dwan, mbe u ŋga biile na nanae tataara. We pe ŋulo kɛmbɔshiin lɛ, a mbe ti u kaari waŋgra kpɔɔ ka. 21 La, mu pɔ Isaac ŋmba mu chɔ Sarah we se yelibaŋga imi nyu kre, wre ni mbe nyu nunu kre pe.” 22 Ŋga Nyiɛkpɔɔ na paara Abraham ni mu kɔ kre, a wra u ti wa mna sɛ nyjeeri.

23 Ki ble kre lam, Abraham na li Nyiɛkpɔɔ nyu kee na, mna u pɔ Ishmael, na u sumifɛɛnlɛ mblɛ praa wa u katoo, na tinlɛ mblɛ wra swa tɔɔnri mu lɔ, na biblɔ ŋmba wraa wa u katoo kro, wra pe fɛnyi knumu. 24 Abraham na li yɛlɛ fuloe jijirɛ na kɛmbɔkɔɔnanyjirɛ mna chin mu fɛŋgɛ kun, 25 na u pɔ Ishmael li yɛlɛ kɛmbɔtaarɛ. 26 Kre ble ŋga na Nyiɛkpɔɔ na Abraham ti mu sɛ nyjeeri kre na chɔɔ, Abraham na wre na u pɔ Ishmael fɛnyi knumu. 27 A ki ble kre lam, wra u sumifɛɛnlɛ, na u tinlɛ mblɛ wra swa tɔɔnri mu lɔ kre, na biblɔ ŋmba wraa wa u katoo kro fɛnyi knumu.