Hagar Na Ishmael
16
Abram chɔ Sarai nsraa sii, la, na uu wa tnichlɔ wa ni, a wra yiri Egypt na, a praa u yeeri Hagar. 2 Ki tia Sarai na yo Abram pan mbo, “Ŋga Nyiɛkpɔɔ ni kun biseere na ŋga, ŋgi ki tia ma sni na ni tnichlɔ wre ni, aada we se mbe ni ŋga?” Abram na kee ŋga Sarai na yo kre nɔɔloo. 3 Ki tia Sarai na tia Abram na u tnichlɔ Hagar ŋmba wra yiri Egypt tra nu wre leŋge. Kre nyjila kre na pe li yɛlɛ kɛ Canaan tra kre nu. 4 Abram na sni Hagar ni a wra siire ta. Ŋga Hagar na nya na u siire ta kre, a wra Sarai yiɛ le.5 A Sarai na yo Abram pan mbo, “Mu kepele yi a ndaa kala nyaa. Mi titi ndaa ni tnichlɔ bali mu mu ŋga, fuŋga ŋga u nya na u siire ta kre, a u ni yiɛ le. Nyiɛkpɔɔ we kee ŋga kpra kun mi na ŋu lalaa, na ŋu mu sisaa pe ndee, na mi wi o! Oo ki chin.”
6 A Abram na yo mbo, “Mu tnichlɔ wi, u pe imi na mu chaa.” Ki tia Sarai na Hagar le nyibie a wra fɛ mu yili wa.
7 O Tafun Nyiɛkpɔɔ bituŋu na sɛ Hagar fni fimi tra kre nu wa blo ka jaara Shur kolo mbɛɛ na, 8 mna yo mbo, “Hagar, Sarai tnichlɔ, sena mu yiri, a sena mu shie hin?”
A wra kna mbo, “Feni ni feni mbe yili ni tafun chlɔ Sarai pan.”
9 A Nyiɛkpɔɔ bituŋu wre na yo mbo, “Ndru mu sɛ u pan, mu muyɛ nyjii mu u ŋga.” 10 A bituŋu wre na ndru mna yo na mbo, “Mbe ti mu nɔɔ leele nɛɛ, mbe ndro wa jaa pe tɔɔnri.
11 Fuŋgaami siiree wa mu pan,
mu biblɔ se,
mbe u mɛɛ tɛɛ Ishmael.
Ŋgi na hin?
Nyiɛkpɔɔ mu fooro nyɛnɛɛ loo.
12 Mu pɔ wre we pe na,
bubnɔ nyaa wo wi,
we yiri mbe ndro kro taan,
a ndro kro we yiri mbe u taan,
A wa ti wre na u tnifɛɛnlɛ
tni wejinyiŋge nu.”
13 Hagar na o Tafun Nyiɛkpɔɔ ŋmba wra paara na u ni wre yeeri mbo, “Ŋu wi Nyiɛkpɔɔ ŋmba mu ni nyaa.” Ki tia wra yo mbo, “Fuŋga ni ŋmba u ni nyaa wre nya.” 14 Kre ki tia leele na kɔlɔ ŋga kii wa Kadesh na Bered lalaa kre yeeri Beer-Lahai-Roi, ki nyina na ŋmba uu wa ŋmaa ni na ni nyaa wre kɔlɔ, a kii wa tɛ.