Nyiɛkpɔɔ Na Abram Nyu Nunu Pee
15
Yire kee nyjɛ kɔkro kre, Abram na nya nyiɛlɛ na, na Nyiɛkpɔɔ paara u pan mbo,“Abram, maa shia fiɛ,
mbe kɛ tɔ mu na,
mbe mu wɔ mbe yili
kee sisaa kro nu,
a tnu ŋga mu ta we kpɔɔ.”
2 La, Abram na kna mbo, “O Tafun Jaŋgafun Nyiɛkpɔɔ, tnu ŋga mu ni ŋga kre, mni kie ni pe hin? Na mi wi ŋmba, pɔ n wa ni pan, a ndro ŋmba we ni krɔ li wi Eliezer ŋmba u yiri Damascus na kre.” 3 A Abram na ndru mu yo mbo, “Na mu n ni ŋga biile a ni se, ni tnu ŋmba mi na wree wa katoo wre, we kaari ni krɔlifun.”
4 A wra loo na Nyiɛkpɔɔ paara u pan na mbo, “Mu tnu Eliezer wa mu krɔ li, la, ŋu titi pɔ we mu krɔ li.” 5 A Nyiɛkpɔɔ na yili na u ni fimi na, mna yo mbo, “Yiɛ yire mu nyiɛ yiɛ le, mu wɔɛlɛɛ tɔɔnri, na mu jaa yi tɔɔnri wala, pan mu nɔɔ leele we nɛɛ mbe da.”
6 Abram na o Tafun Nyiɛkpɔɔ shɔnli, kre ki tia wra yo na u fraka. 7 A Nyiɛkpɔɔ na yo u pan mbo, “Mi wi Nyiɛkpɔɔ ŋmba ndaa mu wɔ mu yili Ur, ŋga kii wa Chaldea tra nu kre na, mu pan mbe mu ŋga tra ŋga, mbe ki pe mu wo.” 8 La, Abram na u wie mbo, “O Tafun Jaŋgafun Nyiɛkpɔɔ, kena mni mbe pee chin na ni wo yi hin?”
9 A Nyiɛkpɔɔ na yo u pan mbo, “Pan mu ni ŋga napɔlɔ, na sikalo, na mbaplɔ. Pre yurɛ mblɛ fna mbe li yɛlɛ tataarɛ, mbe mu katoo kotro, na liilio ya pe na.” 10 Abram na pan na yurɛ pre ni mu Nyiɛkpɔɔ ŋga, mna pe gbo, mna pe yɔɔlɛ shiin shiin, mna pe yɔɔlɛɛ yire tɛɛ a yira yiɛ kan kan yi yɛ na kalie na kamɛŋɛ. La, hanyiɛlɛ pre rɛ, u nsra pe yɔɔlɛ. 11 Apɛtee plɛ na pan mbe pe li, a Abram na pe ni.
12 Ki ble kre yilakɔŋgɔ, nyjila ŋga ni yila naa shie mbe sɛ to kre, Abram na sni na ŋunu, mna wɔmu kprikpri ka nya, a fiɛrɛ na u yii. 13 A Nyiɛkpɔɔ na yo u pan mbo, “Ni chaa mbe mu chin na, mu nɔɔ leele we kɔɔ pe fumblɔ waŋgra ka nu, a pie pe tinlɛ, mbe pe pe fiŋge yɛlɛ lafɛɛ jijirɛ. 14 La, waŋgra ŋga nu pie sɛ pe tinlɛ kre, mbe waŋgra kre leele ndie tini, a kre kɔkro ni pie yili wa na krɔyirɛ ni tataara. 15 A ŋu rɛ, mu lɛ, mbe ku mbe pe mu le wejinyiŋge ni, mbe mu mu tolɛɛlɛ kɔŋgɔ ni. 16 Semtaalaa jijirɛ wo na mu nɔɔ leele pre we ndruu pan kre tra ŋga nu mna. Ŋgi na hin? Mba Amora leele pre ni mbe yili tra kre na mbe sɛ su na pe ndra we sheli titi imi ki fna, mbe ni jaa pe ndie tini.”
17 Ŋga yila na to, a ble na wɔ kre, Abram na kanhun nya chɔ ka nu, a kraa wree yili, na nyini na tro yurɛ mblɛ wra yɔɔlɛ pre lalaa. 18 Ki ble kre Nyiɛkpɔɔ na nyu nunu pe Abram ni mna yo mbo, “Ni mu nɔɔ leele ŋga tra ŋga ki yire Egypt lɔɔ kre na mu sɛ su Euphrates lɔɔ kpɔɔ kre na.