Abram Na Lot Ŋmaashɔ
14
Kre nyjila kre nu ŋunɔ ka na kun tra kre nu. Shinar ŋunu Amraphel, na Ellasar ŋunu Arioch, na Elam ŋunu Kedorlaomer, na Goiim ŋunu Tidal, 2 na sɛ wi na Sodom ŋunu Bera, na Gomorrah ŋunu Birsha, na Admah ŋunu Shinab, na Zeboiim ŋunu Shemeber, na Bela ŋunu ni, Bela mɛɛ ka na yi Zoar na chɔɔ. 3 Pre ŋulo kunɔ mblɛ pra nyu pe nunu, mna pe sojae ble Siddim nyuɛ tra lawee kre nu, bawa chɔɔ epo ŋga na weŋge wɛ titi kre na nyi. 4 Kie pe yɛlɛ kɛmbɔshiin na ŋunu Kedorlaomer jaara pe nyi, la, yɛlɛ kɛmbɔtaarɛ wo kre na, pra yiri mu u taan. 5 Yɛlɛ kɛmbɔjijirɛ wo na, Kedorlaomer na ŋulo mblɛ wre na pre na nyu nunu pe kre, na sɛ wi na Rephaim leele ni Ashteroth-Karnaim kapɔɔ kre na, mna pe ja. Pan chɔɔ pra wi na Zuzim leele ni Ham na, na Emim leele ni Shaveh Kiriathaim na, 6 na Hori leele ni Seir nyambie lawee yire nu, hali mu sɛ su El-Paran na, mu mbra fimi tra kre na. 7 A pra viŋge mu kna mna sɛ En-Mishpat ŋga praa yeeri Kadesh kre na, mna sɛ wi na Amalek leele, na Amora leele mblɛ praa wa mu tni Hazazon-Tamar na kre ni, mna pe ja.8 A Sodom ŋunu, na Gomorrah ŋunu, na Admah ŋunu, na Zeboiim ŋunu, na Bela ŋunu. Pra pe yɛ kna mna sɛ fni Siddim nyuɛ lawee tra kre nu, 9 mbe wi na Elam ŋunu Kedorlaomer, na Goiim ŋunu Tidal, na Shinar ŋunu Amraphel, na Ellasar ŋunu Arioch ni. Ŋulo kunɔ pra nyu pe nunu, mbe sɛ wi na ŋulo jijirɛ ni. 10 Siddim nyuɛ lalaa tra kre nu wa weele nyjɛ nu praa kotari tru yire na nyi, ki tia ŋga Sodom na Gomorrah ŋulo naa feni ŋunɔ kre nu kre, a pe plɛ na sɛ to to weele yire nu, la, ŋulo taarɛ pre rɛ, pra fɛ mu shɔ mna sɛ nyambie yire na. 11 Ŋulo jijirɛ mblɛ yiɛ pra fɛ pre na sroe, na yirɛ nyjɛ yiraa wa Sodom na Gomorrah na kro koli mna sɛ. 12 Kre nyjila kre, na Lot Abram naa wree wa Sodom na, a pra wre na u yirɛ kro bali mu ya.
13 La, blɔ wa na fɛ mna shɔ pe nu, mna sɛ mandiɛ bɔ Abram Hebrew ndro wre pan. Kre nyjila kre, na uu wa mu tni Mamre Amora ndro wre oak tinyi yire jaara. Mamre na u chinlɛ Eshcol, na Aner, na pe leele mblɛ praa wii na yaa Abram na. 14 Ŋga Abram na loo na pe Lot yii ŋunɔ kre, a wra bilɛ lafɛɛ taarɛ na kɛmbɔkɔɔnatarɛ mblɛ pra nyina wiire, a pra yiri u sele nu pre wru, mna ŋulo jijirɛ pre kɔŋgɔ ni mna sɛ su Dan na. 15 Bawa wra u leele pre yɔɔlɛ feko feko, a pra sɛ loŋgoolo pre tɔ blee, mna wi na pe ni mna pe ja, mna pe ni mna sɛ su Hobah na, Damascus nyjeeri haa wa. 16 Yirɛ nyjɛ leele pre na koli mu sɛ yire, Abram na yi ta mu shɔ, mna Lot na u yirɛ nyjɛ pra koli yire, na chiɛlɛ mblɛ ni pra sɛ, na leele mblɛ pra yii pre kro, Abram na pe shɔ.
Melchizedek Abram Dwan
17 Ŋga Abram na sɛ wi na Kedorlaomer, na u ŋulo mblɛ pra nyu nunu pe na wii pre ja mu kɔ kre, Sodom ŋunu na sɛ u fni Shaveh nyuɛ lalaa tra kre nu. Kre tra kre pe yeeri ŋunu tra ŋga kii wa nyuɛ lalaa kre. 18 A Melchizedek ŋmba wra pe Salem ŋunu, mna ndru mu pe Nyjeeri Nyiɛkpɔɔ wre srawɔfun wre, na pan mna u ŋga paanu, na simi gbɔwo.
19 A wra Abram dwan mbo,
“Nyiɛkpɔɔ ŋmba uu wa nyjeeri,
mu nyjeeri na tra gbeele wre,
u mu dwan.
20 Nyjeeri Nyiɛkpɔɔ
ŋmba u mu loŋgoolo yii,
mu le mu kɛɛ wre wo yi mɛɛ.”
A Abram na yirɛ nyjɛ wra ta ŋunɔ nu yire yɔ kɛ, mna Melchizedek ŋga nunu.
21 Sodom ŋunu wre na yo Abram pan mbo, “Yirɛ nyjɛ mu ta ŋunɔ yire kro wru mu ta, la, ni ŋga ni leele pre kro mbe ni sɛ.”
22 A Abram na yo mbo, “Ni nyu yo o Tafun Nyiɛkpɔɔ, nyjeeri na tra gbeele fun wre pan, 23 na mba mu yaka wru mbe ta, hali mu maŋa, ndee mu kpawrɛ maŋa kɔɔn fiɛn kuraa wa kro ni pan. Na kre ma mu kɔɔ yo mbo, ‘Mi ni tia Abram uyɛ ta.’ 24 Ni n na yaka shio fɔna nyjɛ ni leele pre ka mu kɔ yire. La, ni yafɛɛnlɛ, Aner, na Eshcol, na Mamre ŋga yirɛ nyjɛ pe fna mbe ta.”