Abram Na Lot Na Yɔɔlɛ
13
Ŋga kra pan ma kre, Abram na yili Egypt na mna yiɛ le Negev na, wre na u chɔ na pe yirɛ kro ni. Ŋga praa shie kre, pre na Lot pra sɛ. 2 Kre nyjila kre, na Abram u yɛ ta titi. Na katoo yurɛɛ wa u pan, na swanyiɛ, na swafiŋge ni kro. 3 Ŋga wra le Negev na wa kre, wra kila chiin mna chin mu sɛ da lawee ŋga kraa wa Bethel na Ai lalaa, mna wra klu mu u yoŋgo nyuŋgo kre kan fa kre. 4 Kre lawee kre nu chɔɔ wra sragbunu sin jle, mnaa o Tafun Nyiɛkpɔɔ mɛɛ cheche kre yeeri na u sumi kre.5 Nyjila ŋga Abram naa kila na tro kre, na wre na Lot wi, a na Lot wa na leele na yurɛ, na yonyi nyinyi ni na chɔɔ. 6 Ki tia ŋga pra tni titɛɛ kre, pra nyjira tra kre nu. Ŋgi na hin? Na yirɛɛ wa pe kro shiin pan, a ki tia pe nsra ja mbe tni mbe chaa. 7 Ki tia kakrɔ na kun Abram yurɛ lefɛɛnlɛ pre, na Lot wolo pre lalaa. Kre nyjila kre, na Canaan leele, na Perizzite leele pee wa mu tni tra kre nu.
8 Ki tia Abram na yo Lot pan mbo, “Leele nunu lɛ wre, kena ki n fna mbe o tun, ndee mbe ni yurɛ lefɛɛnlɛ na mu wolo pre na tuni. 9 Tra kre ki sni mu sɛ kre, ti mbe o yɔɔlɛ, na mu wru kamɛŋɛ, mbe wru kalie, a na mu wru kalie naa, mbe mi wru kamɛŋɛ.”
10 Lot na yiɛ wa mna le mu nya na nyjiimu wa mu yire Jordan Lɔɔ mbɛɛ tra mbrɛrɛ kre na, mu sɛ su Zoar na. Lawee kre na pe na Eden tra kre, ndee Egypt tra yi, nyjila ŋga nu Nyiɛkpɔɔ nsra ta mu Sodom na Gomorrah kla kre. 11 Ki tia Lot na Jordan mbɛɛ tra mbrɛrɛ kre le mu wɔ, a wre na Abram na yɔɔlɛ, a Lot na yiɛ le yila fin haa wa, 12 mna sɛ u yonyi nyinyi kan kakpɔɛ yɛ lawee, tra mbrɛrɛ ka nu, mu mbra Sodom na. A Abram na tni Canaan tra nu. 13 Sodom leele pre ndra na sheli, a praa sisam kpɔɛ pini o Tafun Nyiɛkpɔɔ na.
Abram Na Yiri Mna Sɛ Hebron Na
14 Ŋga Lot na sɛ mu kɔ kre, o Tafun Nyiɛkpɔɔ na yo Abram pan mbo, “Yire mna mu nyi ŋga, mu yiɛ wa mu lawee ŋga le mu fni. 15 Tra ŋga mu nyaa ŋga kro, mbe ŋu na mu nɔɔ leele ŋga ki yi, mbe ki pe e wo nyjila kro nu. 16 Mbe ti mu nɔɔ leele nɛɛ titi na tablɔ yi, a na ndro we jaa tablɔ tɔɔnri naa, kena we jaa mu nɔɔ leele tɔɔnri. 17 Kena yiri mu nyaari tra kre na mu ki valam, na ki titnɔmu le. Ŋgi na hin? Ŋu mbe ŋga ki yi.” 18 A Abram na yiri mna u yonyi nyinyi yire klɔ mna sɛ tni Mamre na, mu mbra oak tinyi yire na Hebron na. Bawa wra sragbunu sin mu o Tafun Nyiɛkpɔɔ ŋga.