Abram Yeeree
12
Kre nyjila kre nu O Tafun Nyiɛkpɔɔ na yo Abraham pan mbo, “Yili mu waŋgra, na mu sele leele, na mu lɛ katoo, mu sɛ tra ŋga mbe mu nyina ŋga nu.2 Mbe ti mu nanae,
kaari waŋgra kpɔɔ.
A mbe mu dwan,
mbe ti mu pe lekpɔɔ,
a ŋu na plɛ we yire
mbe dwamu ta.
3 Mbe ŋmba we mu dwan wre dwan,
a mbe ŋmba we mu sun wre sun.
Ŋu na waŋgra leele kro,
we yire mbe dwamu ta.”
4 Ŋga kra pan ma kre, Abram na yili Haran na, imi na o Tafun Nyiɛkpɔɔ na yo u pan kre, a wre na Lot na sɛ. Kre nyjila kre, na Abram li yɛlɛ fuloe taarɛ na kɛ. 5 Abram na u chɔ Sarai, na u naa Lot, na pe tinlɛ, na pe yirɛ kro koli Haran na, mna to kolo na shie Canaan tra nu.
Ŋga pra sɛ le Canaan na kre, 6 Abram na nyaari mu tro tra kre nu, mna sɛ da Moreh oak tiŋge cheche ŋga kii wa Shechem na kre jaara. Kre nyjila kre, na Canaan leele pee wa mu tni kre tra kre nu.
7 Bawa o Tafun Nyiɛkpɔɔ na u yɛ wɔ mna Abram nyina mna yo u pan mbo, “Kre tra ŋga mbe mu nanae ŋga.” A Abram na sragbunu sin wa mu o Tafun Nyiɛkpɔɔ ŋmba wra uyɛ wɔ mu u nyina wre ŋga. 8 Mbakɔ, Abram na yiri wa mna sɛ u yoŋgo nyuŋgo ka sin nyuɛ lawee yire nu, Bethel na Ai lalaa, mna tni wa, Bethel naa wa yila tohaa, a Ai naa wa yila finhaa. Bawa wra sragbunu sin mnaa Nyiɛkpɔɔ mɛɛ cheche kre yeeri na u sumi. 9 A Abram na ndru mu yiri wa mu yiɛ le na shie Negev fimi tra kre nu wa chɛchiɛri.
Abram Na Sarai Na Sɛ Egypt Na
10 Kre nyjila kre, na klo shelee ka to, ki tia Abram na sɛ tni Egypt na nyjila chiɛri. 11 Ŋga kra kro chiɛri mbe pe da Egypt samu na kre, Abram na yo u chɔ Sarai pan mbo, “Mu pe chlɔ ŋmba mu nyu. 12 Na Egypt leele mblɛ waa mu nya pie yo mbo, ‘U chɔ wi kre.’ Na ki pan ma, pie ni gbo mbe mu ti. 13 La, na pe waa mu wie, yo na ni jaa wi ŋu. Kie ti pe le mu na, mbe nyu ni na, mbe pia ni gbo.” 14 Yɛŋgɛ na, ŋga pra sɛ le Egypt na kre, Egypt leele pre na u chɔ wre nya na u nyu titi yɛŋgɛ. 15 Ŋga ŋunu katoo loplombo pre na Sarai nya kre, a pra sɛ u nyumu kre kee yo ŋunu Pharaoh pan. Ki tia pra u bali mna sɛ ŋunu katoo. 16 A ŋunu wre na Abram pe chichie Sarai ndra na. Wra u kɛ mbaala, na nui, na bubunlɔ chiɛlɛ na bilɛ, na sumifɛɛnlɛ bilɛ na chiɛlɛ, na nyuuma.
17 La, o Tafun Nyiɛkpɔɔ na tia yira sisaa na ŋunu Pharaoh na u katoo leele gbun, Abram chɔ Sarai ndra na. 18-19 Ki tia ŋunu wre na Abram yeeri mna u wie mbo, “Kena kala ŋgi mu ni pe ŋga hin? Ŋgi ki tia mu n yo ni pan na mu chɔ wi, a mu yo na mu jaa wi, mbe ndaa u wru mbra leŋge ŋga hin? Mu chɔ wi kre, u bali mu sɛ!” 20 A ŋunu wre na tia u leele pre na Abram ni, a wra yiri waŋgra kre nu, wre na u chɔ na u yirɛ kro ni.