Babel Nyuŋgo Gedeŋge Kre Kee
11
Jle kre yolo nunu chom waŋgra ŋga leele kro naa yuu. 2 Ŋga praa kila na tro yila finhaa wa kre, pra sɛ da lawee mbrɛrɛ ka nu Shinar tra nu mna tni wa. 3 Bawa pra yo peyɛ pan mbo, “E ti o tofae kun, mbe yi fɔ kanhun ni mbe yi sheli.” Ki tia pra tofae yire kun, mna kotari cha ŋga ni pie tɛɛ mbe yi sin, pe n sra dnɛ ndee pooro tɛɛ mu sin. 4 Ŋga pra kɔ kre, a pra yo mbo, “E ti o kakpɔɔ ka kun mbe nyuŋgo gedeŋge titi ka sin mbe ki gede mbe sɛ su nyjeeri nyjeeri, mbe ki ti o mɛɛ ta, mbe tni titɛɛ mbe waa nyina tra yiɛ na poŋgo.” 5 La, O Tafun Nyiɛkpɔɔ na tii mna pan kakpɔɔ kre, na nyuŋgo gedeŋge ŋga leele pre sin kre le haa. 6 Ŋga wra yi nya kre, a wra yo mbo, “Kena na leele nunu lɛ leele mblɛ, a pra yolo nunu yuu, a ki tia pe ja na kre kee ŋga pini wala, kena kee ka n wa na pe yo pie ki pe, mbe pe pra ki pee na. 7 Kena e pan mbe o tii mbe sɛ pe yolo kna mbe yi yili yi yɛ yɛ, mbe pia na peyɛ nɔɔ ndru na.” 8 Ki tia o Tafun Nyiɛkpɔɔ na pe gbun mu nyina tra yiɛ na poŋgo, a pe nsra ja mna kakpɔɔ kre sin na. 9 Kre kra tia praa kakpɔɔ kre yeeri Babel. Ŋgi na hin? Bawa o Tafun Nyiɛkpɔɔ na waŋgra ŋga leele kro yolo kna, mna yire wa mu pe gbun mu nyina tra yiɛ na poŋgo.
Shem Nɔɔ Leele Kee
10 Shem nɔɔ leele mɛɛ yi kre. Ŋga nyumu na waŋgra kla kre kɔkro yɛlɛ shiinwo na, na Shem li yɛlɛ lafaa, mna biblɔ wa se. U mɛɛ na yi Arphaxad. 11 Kre kɔkro Shem na li yɛlɛ lafɛɛ kunɔ, mna biile plɛ se mu ya.
12 Ŋga Arphaxad na li yɛlɛ fulo na kɛmbɔkunɔ kre, wra biblɔ wa se, u mɛɛ na yi Shelah. 13 Kre kɔkro Arphaxad na li yɛlɛ lafɛɛ jijirɛ na taarɛ, mna biile plɛ se mu ya.
14 Ŋga Shelah na li yɛlɛ fulo na kɛ kre, wra biblɔ wa se, u mɛɛ na yi Eber. 15 Kre kɔkro Shelah na li yɛlɛ lafɛɛ jijirɛ na taarɛ mna biile plɛ se mu ya.
16 Ŋga Eber na li yɛlɛ fulo na kɛmbɔjijirɛ kre, wra biblɔ wa se u mɛɛ na yi Peleg. 17 Kre kɔkro Eber na li yɛlɛ lafɛɛ jijirɛ na fulo na kɛ mna biile plɛ se mu ya.
18 Ŋga Peleg na li yɛlɛ fulo na kɛ, wra biblɔ wa se u mɛɛ na yi Reu. 19 Kre kɔkro Peleg na li yɛlɛ lafɛɛ shiin, na kɔɔnanyjirɛ mna biile plɛ se mu ya.
20 Ŋga Reu na li yɛlɛ fulo na kɛmbɔshiin, wra biblɔ wa se, u mɛɛ na yi Serug. 21 Kre kɔkro, Reu na li yɛlɛ lafɛɛ shiin na kɔɔnashin mna biile plɛ se mu ya.
22 Ŋga Serug na li yɛlɛ fulo na kɛ, wra biblɔ wa se u mɛɛ na yi Nahor. 23 Kre kɔkro, Serug na li yɛlɛ lafɛɛ shiin, mna biile plɛ se mu ya.
24 Ŋga Nahor na li yɛlɛ fulo na kɔɔnanyjirɛ, wra biblɔ wa se u mɛɛ na yi Terah. 25 Kre kɔkro Nahor na li yɛlɛ lafaa na kɛmbɔkɔɔnanyjirɛ, mna biile plɛ se mu ya.
26 Ŋga Terah na li yɛlɛ fuloe taarɛ na kɛ kre, kre wra Abram, na Nahor, na Haran se.
Terah Nɔɔ Leele Kee
27 Terah wra Abram, na Nahor, na Haran se, a Haran na Lot se. 28 Terah naa wa na le, a u pɔ Haran na ku chia ŋga praa yeeri Ur kre na, a bawa chɔɔ pra wre Haran se. Kre chia kre naa wa Chaldea leele tra nu. 29 Abram, na Nahor, na chiɛlɛ leŋge leŋge. Abram chɔ mɛɛ na yi Sarai, a Nahor chɔ mɛɛ na yi Milcah. A Haran bichiɛlɛ na lɛ Milcah na Iscah. 30 Sarai na pe gbende, ki tia u nsraa sii.