Si Milkisidik
7
Su heini si Milkisidik,
ne hadì sikandin dengan te inged he Selim,
wey memumuhat sikandin he ed-azap te lavew he Megbevayà.
Ne zuen timpu zutun he si Abraham,
mibpekidtebek te menge hadì he kuntada zin ne mibpenhimetayan din.
Ne zutun te ked-ulì ni Abraham,
midsinuǥung sikandin ni Milkisidik,
ne migkaǥi ni Milkisidik pinaaǥi te kebpenuvadtuvad he edtuvazan si Abraham te Megbevayà te meupiya he tuvad.
2 Ne si Abraham,
imbeǥey zin diyà te ki Milkisidik is ikesepulù he vahin te langun he nengetavan din.
Ne heini is ngazan he Milkisidik,
dezuwa is kehuluǥan din.
Is egkehuna ne “hadì he ebpekeveǥey te ketazeng.”
Ne tenged te hadì sikandin te inged he Selim,
he ke và dà egkeǥiya,
kelinew,
elin daan kehuluǥan din is “hadì he ebpekeveǥey te kelinew.”
3 Ne kenà duen dà taman su wazà guǥud ke hentei is amey zin wey iney zin wey menge kepuun din,
ne wazà daan guǥuza is kegkeetew zin wey is keaǥi te kemetayen din.
Umba heini si Milkisidik,
ebpekeiring sikandin te Anak te Megbevayà su iring te wazè din puunà,
ne wazè din ketepusan,
ne wazà pidtemanan te kegkememumuhat din.
4 Isipa niw he utew lavew si Milkisidik su is kepuun tew he si Abraham,
imbeǥey zin kandin is ikesepulù he vahin te netavan din dutun te kebpekezaag din te menge hadì.
5 Ne is menge memumuhat te menge Hudiyu he menge kevuwazan ni Levi,
ne menge kevuwazan daan sikandan ni Abraham.
Ne insuǥù kandan te kesuǥuan he imbilinbilin ni Moises he kuwaa zan is ikesepulù he vahin te langun he ketiǥeyunan te menge zuma zan he Hudiyu minsan pa te menge kevuwazan daan heini ni Abraham.
6 Iyan,
si Milkisidik,
kenà mulà sikandin kevuwazan ni Levi ne minsan pa zutun midawat din is ikesepulù he imbeǥey kandin ni Abraham ne zutun,
si Abraham,
is mibpenaazan te Megbevayà,
mibpenubtuvazan ni Milkisidik.
7 Ne netuenan te minsan hentei he is etew he ebpenubtuvazan din is sengeeetew en,
ne lavew sikandin kenà haazà is etew he ebpenubtuvazan din.
8 Ne is menge memumuhat he kevuwazan ni Levi,
ne edewaten dan is ikesepulù ne ebpatey zan gihapun,
iyan,
si Milkisidik he mibeǥayan dengan ni Abraham te ikesepulù,
sumalà is kedsevuta ta zutun te Lalag te Megbevayà,
iring te kemulu pa sikandin uuyag.
9 Ne si Levi,
iyan kepuun te langun he menge memumuhat te menge Hudiyu,
ne egkesavut ta zaan he zutun te kebeǥaya ni Abraham te ikesepulù diyà te ki Milkisidik,
nekeveǥey zaan si Levi ziyà te ki Milkisidik.
10 Su zutun te kebpeked-uma ni Abraham wey si Milkisidik wazè pa zutun ianak si Levi,
kekenà,
diyè pa sikandin te lawa ni Abraham he apù din.
Si Jesus is Iring ki Milkisidik
11 Ne netuenan ta he zutun te kebeǥaya te Megbevayà te kesuǥuan diyà te menge Hudiyu,
midtendek din is menge memumuhat he iyan is menge kevuwazan ni Levi he iyan ed-uwit te kesuǥuan.
Ne emun egkehimu he ebmetazeng is menusiyà pinaaǥi te kandan he menge vaal,
wazè en kinahanglan he zuen pa maan memumuhat he iring ki Milkisidik.
Iyan,
duen en mibpilì te Megbevayà he selakew en he memumuhat.
Ne heini,
ne kenà iring ki Arun he kevuwazan ni Levi,
kekenà,
iring sikandin ki Milkisidik.
12 Ne emun ed-ilisan is menge memumuhat,
kinahanglan he ed-ilisan daan is kesuǥuan he mibenteyanan dan.
13-14 Ne is Nengazen tew he si Jesus he iyan memumuhat he nekeilis te zaan he menge memumuhat,
kenà sikandin kevuwazan ni Levi su kevuwazan ni Huda.
Ne te langun he menge kevuwazan ni Huda,
iyan dà sikandin nehimu he memumuhat.
Ne wazà ipesavut ni Moises dengan he zuen kevuwazan ni Huda he egkehimu he memumuhat.
15 Ne keladu en utew he emun mid-ilisan en is menge memumuhat he kevuwazan ni Levi ne mid-ilisan daan is kesuǥuan su zuen selakew en he memumuhat he iring ki Milkisidik.
16 Ne wazà heini is beǥu himuwa he kelibutanen he memumuhat pinaaǥi te menge kelibutanen he kesuǥuan,
kekenà,
midhimu sikandin he memumuhat tenged te mekeǥeǥehem sikandin su wazè din kemetayen.
17 Su zuen insurat he Lalag te Megbevayà he zutun migkeǥiyan sikandin te Megbevayà te,
“Memumuhat ka he wazà pidtemanan te kegkememumuhat nu iring te kegkememumuhat ni Milkisidik.”
18 Ibpesavut kenitew kayi he is daan he kesuǥuan,
in-awè en te Megbevayà su wazè din pulus ne kenà ebpeketavang kenitew te menusiyà,
19 su kenà egkehimu he ed-isipen kiw he metazeng pinaaǥi te kedtumana kayi.
Ne tenged kayi,
imbeǥey en kenitew te Megbevayà is meupiya pa he egkeseriǥan he paaǥi.
Ne pinaaǥi kayi,
egkehimu he pinaaǥi te ked-azap tew ebpekeetuvang kiw en te Megbevayà.
20 Ne kenà duen dà taman su utew zeyzey heini is beǥu he paaǥi su zutun te kedhimuwa te Megbevayà ki Jesus he memumuhat,
mibpenaazan sikandin te Megbevayà.
Iyan,
hein nehimu zengan he memumuhat is menge kevuwazan ni Levi,
wazà sikandan penaazi te Megbevayà.
21 Iyan,
si Jesus mulà,
mibpenaazan te Megbevayà su zuen insurat he Lalag te Megbevayà he edhenduen te,
“Siak is Megbevayà,
impenaad ku
he egkehimu ka he memumuhat ne wazà pidtemanan te kegkememumuhat nu,
ne kenè en heini ebperis.”
22 Ne tenged kayi te penaad te Megbevayà,
pinaaǥi ki Jesus egkesiguru tew he utew pa meupiya heini is beǥu he paaǥi he midtukud te Megbevayà te kedlibriya zin kenitew kenà is daan.
23 Ne kenà duen dà taman su haazà is menge memumuhat dengan he menge kevuwazan ni Levi,
kinahanglan he utew zan mezakel su emun ebpatey is duma kandan,
kinahanglan he ed-ilisan dutun te zuma.
24 Iyan,
si Jesus,
wazà pidtemanan mulà te kandin he untung ne kenà sikandin egkeilisan he memumuhat.
25 Ne tenged kayi,
egkehimu te minsan keenu he timpu he edlibriyen din te silut is minsan hentei he menge etew emun pinaaǥi kandin ed-aput sikandan diyà te Megbevayà su wazà pidtemanan te untung din,
ne layun din egkehimu te edtavang sikandan diyà te etuvangan te Megbevayà.
26 Iyan si Jesus lavew he memumuhat he egkinehenglanen tew su wazà igkesewayi te menge ulaula zin,
wazè din salà,
ne wazè din sayep.
Ne kenà sikandin iring te menge mekesesalà he menusiyà,
ne midhimu sikandin te Megbevayà he lavew te minsan hentei ziyà te langit.
27 Kenà sikandin iring te menge zaan he lavew he memumuhat su wazà kinahanglan he ebpemuhat sikandin andew-andew iring kandan.
Su andew-andew ebpemuhat dan.
Edhuna zan ebpemuhat tenged te kandan he keugelingen he salà,
ne human dan ebpemuhat tenged te menge salà te menge etew.
Iyan,
si Jesus mulà,
kesevaha zà is kandin he kebpemuhat ne wazè din en umani.
Midhimu zin heini zutun te kebpehimatey zin diyà te krus.
28 Haazà is nengehimu he menge lavew he memumuhat pinaaǥi te kesuǥuan he imbilinbilin ni Moises,
ne layun duen igkesewayi kandan.
Iyan,
neuǥet pa zutun nehimu is Anak te Megbevayà he memumuhat tenged te kebpilia kandin te Megbevayà wey tenged te penaad te Megbevayà he nekeilis te zaan he kesuǥuan.
Ne heini si Jesus he Anak te Megbevayà he wazà igkesewayi kandin,
nehimu en sikandin he memumuhat he wazà pidtemanan is kegkememumuhat din.