Kayi te surat ni Santiago wazè din en ipelivedlived is ibpesavut din. Midsawey zin is menge etew he egkaǥi he tumutuu sikandan te Megbevayà, iyan, kenà meupiya is menge vaal zan. Ke sikandin te, “Wazè din pulus emun egkaǥi is etew te midtuu sikandan te Megbevayà piru wazà meupiya he menge vaal zin.” Kayi te surat ni Santiago migamit sikandin te menge petug-iringan iring kayi: is etew he eduwazuwa impetug-iring din te vaǥel he minsan hendei zà duen hiyupa te keramag. Is etew he sepian impetug-iring din te vulak su meǥaan dà heini egkeǥangu su emun ebpatey haazà is sepian segugunè dà egkahanew ne egkeewaan din is ketiǥeyunan din. Ne impetug-iring din daan is dilà te etew te hapuy su segugunè dà heini ebpekevinsul te meluag su mahabet he menge etew is ebmezaat is gehinawa zan tenged te lalag he egkezineg dan. Duen daan nekaǥi ni Santiago kayi te surat din he igketingkemed te ebpekevasa zuen. Ke sikandin te: “Is tumutuu ki Jesus kinahanglan he medlipey emun egkeumahan te kenè en ebpeked-iiring he penggezam.” Nekaǥi zin daan he kenà meupiya ke ibpelavi ta is sepian, ne is sepian he edluplupiǥen din is egkaayuayu siguradu he edsilutan sikandin te Megbevayà.