Naawà is kezasig te menge tumutuu he mibpesuratan kayi he surat. Heini sikandan menge Hudiyu piru mid-engkezan dan en is neǥimeratan dan he menge tuluuwen su iyan dan midtuuwan si Jesus. Iyan, egkereǥenan sikandan su edsudien sikandan te zuma zan he menge Hudiyu su iyan kun mid-iniyuǥan dan is tinuuwan he iyan midtukud duen is Megbevayà.

Wazà metueni ke hentei is midsurat kayi, piru egketuusan ta he Hudiyu ǥihapun he neketuu en ki Jesus. Mibpesuratan din sikandan su edlig-enan din is kedsarig dan ki Jesus su para kenè dan meiniyuǥi is kedtuu zan.

Diyà te nehuna he timpu, midsuǥù te Megbevayà si Moises he penguluwi zin is menge Hudiyu, ne pinaaǥi ki Moises imbeǥey te Megbevayà diyà te kandan is menge suǥù din. Migkeǥiyan daan sikandan te Megbevayà he mebpenilbi sikandan kandin pinaaǥi te kebpemuhat te menge ayam he edtutungen para te salè dan. Ne iyan heeyan ed-ul-ulahan te menge Hudiyu he wazè pa mekesarig ki Jesus. Piru is teǥisurat kayi, nekaǥi zin he is langun dutun, menge alung dà te nengeulaule en diyà te ki Jesu Kristu. Ne maan is egketintal zan pa he edlikù edsarig te kenà ebpeketavang kandan, te lavew man si Jesus te langun dutun?

Umba emun ebpesipelahan sikandan tenged te kedtuu zan, kinahanglan he kenè dan iniyuǥi is kedtuu zan, kekenà, iringi zan is menge kepuun dan he si Abel, si Inuk, si Noe, wey si Abraham wey te zuma pa he nengekilala tenged te kedsarig dan te Megbevayà minsan pa te nekesaǥad sikandan te menge kemereǥenan.