Is Surat Diyà Te Menge
Hibriyuhanen
Is Anak te Megbevayà Lavew te Velinsuǥuen Din
1
Dengan duen impesavut te Megbevayà diyà te menge ǥin-epuan tew pinaaǥi te menge etew he ebpeneuven din.
Mezakel is menge paaǥi te kebpeneuva kandan ne mezakel zaan is impesavut din pinaaǥi kandan.
2 Iyan,
guntaan,
duen impesavut te Megbevayà kenitew pinaaǥi te Anak din.
Ne heini is Anak din,
pinaaǥi kandin ne nelimbag te Megbevayà is minsan hengkey;
ne midhimu sikandin te Megbevayà he Nengazen te minsan hengkey.
3 Pinaaǥi kayi te Anak din ibpezayag is mekeǥeǥehem he anlag te Megbevayà su neked-iring dan.
Ke hengkey is Megbevayà ne iyan ded daan sikan is Anak din.
Ne pinaaǥi te ǥehem te kegkaǥi kayi te Anak ebeyveyaan din is minsan hengkey he linimbag.
Ne hein nepasad din en is ked-ewaa zin te menge salè tew,
mid-ulì diyà te langit ne mibpinuu ziyà te egkekewanan te Megbevayà su edhadì.
4 Impaahà kenita te Megbevayà he utew lavew is Anak din,
kenà is menge velinsuǥuen din diyà te langit,
ne iring din ded daan,
lavew is inggerar zin te Anak din,
kenà is inggerar zin kandan.
5 Su zuen insurat he Lalag te Megbevayà diyà te Anak din he edhenduen te,
“Iyan ka Anak ku ne egkeǥiyen ku kenikew
he ǥuntaan ibpeehè ku
he Amey a kenikew.”
Iyan,
wazà belinsuǥuen din he migkeǥiyan din te iring dutun te minsan keenu he timpu.
Ne zuen pa insurat he Lalag te Megbevayà he edhenduen te,
“Egkehimu he iyan a Amey zin
ne iyan sikandin Anak ku.”
Ne kenà iyan is belinsuǥuen egkeǥiyen din dutun.
6 Ne migkaǥi zaan is Megbevayà mehitenged te kakey he Anak din dutun te timpu te kedsuǥua zin kandin dini te kelibutan,
ke sikandin te,
“Kinahanglan he ed-ezapen sikandin te langun he menge velinsuǥuen te Megbevayà.”
7 Ne iyan mulà migkaǥi te Megbevayà mehitenged te menge velinsuǥuen din is:
“Menge suǥù ku zà sikandan,
ne egkehimu ke edhimuwen ku
sikandan he iring te keramag,
ne emun kenà,
ne iring te hapuy
ke iyan egkesuatan ku.”
8 Ne iyan lalag din diyà te Anak din is:
“Iyan ka Megbevayà ne wazà pidtemanan te kedhadì nu.
Metazeng is kedumala nu te ǥinhedian nu.
9 Iyan egkesuatan nu
is metazeng he ulaula ne igkeepes nu is mezaat he ulaula.
Tenged kayi,
siak is Megbevayà nu,
midhimu ku sikew he lavew te menge zuma nu ne imbeǥey ku kenikew
is utew zekelà he kelipey.”
10 Ne zuen pa insurat he Lalag te Megbevayà he edlelaǥan din is Anak din he edhenduen te,
“Sikew is Nengazen,
iyan ka nenlimbag te tanà,
ne kenikew he velad is mibaal te langit.
11 Ne minsan pa te egkehanew keuzemà is langit wey tanà,
kenè ka mulà egkehanew.
Iring dan te manggad he egkezeetan.
12 Iring te kedlumpia te kumbalà,
edlumpien nu is langit wey tanà ne ed-ilisan nu.
Iyan,
sikew,
kenè ka mulà egkehalin;
is untung nu ne wazè din pidtemanan.”
13 Wazà belinsuǥuen te Megbevayà he migkeǥiyan din te,
“Dini ke zè pa pinuu te egkekewanan ku
taman te kenè ku pa ibpeluhud
diyà te kenikew is menge kuntada nu.”
14 Iyan,
is menge velinsuǥuen te Megbevayà,
menge suluǥuen dà sikandan te Megbevayà.
Kenè tew egkeahà,
iyan,
edsuǥuen din sikandan wey kiw zan metevangi is menge etew he edtulusen keuzemà.