Is Kelibriyanan
2
Ne tenged kayi,
kinahanglan he edhemenan tew ebpurungi is tutuu he tuluuwen he impenurù kenitew wey tew kenà melekai su kela ke mekesuwey kiw te tutuu he ibayà.
2 Su is kesuǥuan he imbeǥey zengan te Megbevayà pinaaǥi te menge velinsuǥuen din,
netuenan tew he is minsan hentei he nekesupak kayi,
midsilutan te Megbevayà sumalà is supak din.
3 Ne iring din ded daan,
sikitew is menusiyà,
kenè kiw zaan ebpekelikey te silut te Megbevayà emun ebey-anan tew,
ne kenè tew edtumanen is impenurù kenitew mehitenged te mekeǥeǥehem he kedlibriya zin kenitew te silut.
Is nehuna he nekepenudtul kayi,
ne iyan en is Nengazen tew he si Jesus.
Ne is menge etew he nemekezineg kandin,
edtistiǥusan dan dini te kenitew he tutuu heini.
4 Ne is Megbevayà,
midtistiǥusan din daan haazà is impenurù dan su mibeǥayan din sikandan te ǥehem wey zan ikepaahà is menge singyal,
wey menge egkein-inuwan he kenà ed-iring-iring.
Ne zuen daan menge ketau he imbeǥey zin diyà te menge tumutuu pinaaǥi te ked-ulini kandan te Waǥas he Mulin-ulin sumalà is egkesuatan din he ebeǥayan.
Si Jesus Nehimu he Iring te Menge Suled Din
5 Ne ibpesavut ku keniyu is kelibutan keuzemà he id-ilis te Megbevayà kayi te kelibutan tew ǥuntaan.
Ne wazà pilia te Megbevayà is menge velinsuǥuen din he ebayàbayà dutun keuzemà he kelibutan,
6 kekenà,
iyan mibpilì din is menge etew.
Su zuen insurat he lalag he egkeehè ta kayi te menge surat dengan he edhenduen te,
“Sikew,
Megbevayà,
maan is kenè nu egkelipatan is menusiyà?
Etew zà duen,
ne maan is ebpurungan nu?
7 Midhimu nu he lavew kandin is menge velinsuǥuen nu,
iyan,
taman te mevavè dà he timpu
su migkaǥi nu he zuen timpu keuzemà he kinahanglan
he edtulusen wey edtehuzen is menusiyà.
8 Ne migkaǥi nu zaan he kinahanglan
he keuzemà edhimuwen nu he mekevayàbayà sikandin te minsan hengkey.”
Iyan haazà insurat dengan.
Ne ǥeina te migkaǥi zutun he edhimuwen te Megbevayà is menusiyà he ebayàbayà te minsan hengkey,
egkesavut ta zutun he zuen timpu keuzemà he wazà minsan hengkey he linimbag he kenà egkeveyveyaan te menusiyà.
Ne ǥuntaan netuenan ta he kenè pa ebpekevayàbayà is menusiyà te iring dutun.
9 Ne minsan pa zutun,
mibpeetew si Jesus ne pinaaǥi kayi midhimu he lavew kandin is menge velinsuǥuen taman te mevavè dà he timpu su wey tenged te zekelà he ǥaǥew te Megbevayà,
mebpehimatey sikandin he elili te tivuuk he menusiyà.
Ne tenged kayi te kebpehimatey zin,
ne nehimu en sikandin guntaan he utew telehuzen wey utew belentuǥen ne imbeǥey kandin te Megbevayà is kebayàbayà te minsan hengkey.
10 Is Megbevayà he nenlimbag te langun su wey mehimu is langun he igkezeliǥi kandin,
ne utew hustu is kedtuǥuta zin he mekeantus si Jesus te merasey su pinaaǥi kayi impeehè din he wazà igkesawey ziyà te ki Jesus,
ne egkehimu he mezakel kiw is edhimuwen din he menge anak te Megbevayà su wey kiw metulus iring te kedtulusa kandin.
Nehimu si Jesus he ibayà wey kiw melibri te silut.
11 Si Jesus,
mibpalis din en is menge salè tew.
Ne ǥuntaan sikitew is nepelisan te salà wey sikandin is mibpalis te salà,
sebsevaha zà is Amey tew he iyan is Megbevayà.
Ne tenged kayi kenè kiw igkeeled ni Jesus,
kekenà,
egngezanan kiw zin te menge hazi zin.
12 Su zuen insurat he lalag din he edhenduen te,
“Sikew is Megbevayà,
edtudtulan ku is menge hazi ku mehitenged kenikew.
Egkentahan ku is kedalig ku kenikew ziyà te etuvangan te langun he ed-azap kenikew.”
13 Ne ǥeina te menusiyà daan sikandin migkaǥi sikandin te,
“Edseriǥan ku is Megbevayà.”
Ne ke sikandin daan te,
“Heini e zed he edumahan te menge zuma ku he menge anak te Megbevayà he insarig din kedì.”
14 Ne sikitew is menge anak te Megbevayà,
menge etew kiw zà duen he zuen din kemetayen.
Ne tenged kayi mibpeetew zaan si Jesus wey mehimu sikandin he iring tew.
Umba mid-ulaula zin heini su wey mehimu he ebpehimatey sikandin ne wey pinaaǥi te kebpatey zin mezaag din si Setanas he iyan mibayàbayà te kemetayen,
15 ne wey pinaaǥi kayi metevangi kiw zin ne libriya kiw zin te kemetayen.
Su zengan te wazè kiw pa libriya,
kenà egkeawà dini te kenitew is kegkehandek te kemetayen ne iring te menge uripen kiw zutun te kegkehandek.
16 Ne kenà iyan is menge velinsuǥuen din midtevangan din,
kekenà,
iyan kiw zin midtevangan is menge kevuwazan ni Abraham.
17 Umba kinahanglan he ebpeetew sikandin su wey mehimu sikandin he iring kenitew te menge suled din te minsan hengkey he paaǥi.
Ne mid-ulaula zin heini su wey mehimu sikandin diyà te etuvangan te Megbevayà he iring te lavew he memumuhat tew he utew hihizuwen wey metinumanen su wey zin mepalis is menge salè tew.
18 Ne egkehimu en he egketevangan din is ebpenulayen ni Setanas su neseǥazan din en is kemereǥenan tenged te kebpenulaya kandin.