Si Jesus Lavew ki Moises
3
Ne tenged kayi,
menge suled ku te kedtuu,
mid-umbita kew zaan te Megbevayà wey kew mekeubpà keuzemà diyà te langit.
Purungi niw isipa si Jesus.
Iyan sikandin kes midsuǥù te Megbevayà dini te kelibutan wey sikandin mehimu he lavew he memumuhat he edtavang kenitew kayi te kebpesakup tew te Megbevayà.
2 Su si Jesus,
ne mibpurung medtuman te langun he ebpeveelan kandin te Megbevayà,
iring te si Moises,
nepurungan din daan te edtuman is langun he mibpeveelan kandin dutun te kebeyveyai zin te valey te Megbevayà,
he ke và dà egkeǥiya,
menge etew he sakup te Megbevayà.
3 Iyan,
si Jesus,
ed-isipen sikandin te Megbevayà he utew pa lavew kenà si Moises,
iring te lavew is ebevaley kenà te valey.
4 Netuenan ta he ke zuen baley ne zuen daan mibaal zutun te valey,
ne is mibaal te minsan hengkey ne iyan is Megbevayà.
5 Ne si Moises,
suluǥuen sikandin he metinumanen is kebayàbayè din te valey te Megbevayà ne nehimu is menge vaal zin he alung te ibpaahà te Megbevayà te egkeuǥet pa zutun he timpu egketuman.
6 Ne si Jesus mulà,
Anak sikandin te Megbevayà he metinumanen is kebayàbayè din te valey.
Ne iyan kiw valey zin emun edhemenan tew is kedsundan tew kandin wey is melipayen he kedteǥazi tew te langun he impenaad kenitew ni Kristu.
Is Kedhimeley he Inteǥana te Megbevayà
7 Su zuen insurat he lalag te Waǥas he Mulin-ulin he edhenduen te,
“Guntaan emun egkezineg niw is lalag keniyu te Megbevayà,
8 kinahanglan he kenà mezesen is gehinawa niw
iring te ǥehinawa niw zengan
hein midsukulan niw is Megbevayà dutun te timpu he migezaman niw is ked-antus din keniyu
zutun te tanà he wazà meubpai te etew.”
9 Su migkaǥi is Megbevayà te,
“Minsan pa te seled te kepatan he tuig nengeehè dan is menge egkein-inuwan he mibeelan ku,
ne migezaman dan pa ke hendei taman is kebpelevaya ku te menge mezaat he ulaula zan.
10 Umba,
utew a zutun
nepauk kandan,
ne ke siak te,
‘Layun egkesayep is ed-isipen dan ne kenè dan egkesuat he edtuman te menge suǥù ku.’
11 Ne utew a nepauk ne migkaǥi ku he utew tutuu he kenè dan en ebpekeseled
dutun te inteǥana ku he inged wey zan mekehimeley zuma kediey.”
12 Umba,
menge suled,
susiya niw is gehinawa niw.
Kinahanglan he wazà minsan sevaha keniyu he mezaat is ed-isipen din nè wazè din kedtuu,
su pinaaǥi kayi egkeengkezan din is wazè din kemetayen he Megbevayà.
13 Ne ǥuntaan te kemulu pa egkehimu he egkekuwa is keluwasan he imbeǥey kenitew te Megbevayà,
kinahanglan he ebpesemsembaǥè kiw su wey kiw kenà melimbungi pinaaǥi te salà he iyan is kenà kedtuu ne wey kenà mebmezesen is gehinawa tew.
14 Su sikitew,
emun edhemenan tew is daan he kedsarig tew ki Kristu,
duen tew pudu upakat kandin.
15 Su iring te Lalag te Megbevayà he insurat ku en he edhenduen te,
“Guntaan,
emun egkezineg niw is lalag keniyu te Megbevayà,
kinahanglan he kenà mezesen is gehinawa niw iring te ǥehinawa niw zengan hein midsukulan niw is Megbevayà.”
16 Ne hentei heini is menge etew he minsan nezineg dan is Lalag te Megbevayà midsukulan dan gihapun sikandin?
Iyan sikandan sikan is menge etew he kevuwazan ni Israyil he mid-uwit ni Moises puun diyà te tanà he Ihiptu.
17 Ne hentei is menge etew he nepeukan dengan te Megbevayà seled te kepatan he tuig?
Iyan ded heini is menge zuma te kevuwazan ni Israyil he mibaal te salà diyà te Megbevayà ne tenged kayi midsilutan din sikandan ne minatey sikandan dutun te tanà he wazà meubpai te etew.
18 Iyan ded sikandan kes menge etew he mehitenged kandan migkaǥi is Megbevayà te,
“Kenè dan ebpekeseled dutun te midteǥana ku he inged wey zan mekehimeley zuma kediey.”
Umba migkaǥi zin heini su wazè dan mebpemineg te lalag din.
19 Ne netuenan tew he wazè dan mekeseled dutun su wazè dan tuuwi is Lalag te Megbevayà.