Nepurung mahalin si Pedro. Hein kemulu pa sikandin edumazuma ki Jesus egkahalinhalin is kedtuu zin, iring penenglitan te kebpemarew zin mehitenged ki Jesus. Iyan, hein minatey wey nevanhew si Jesus, mibmelig-en is kedtuu ni Pedro ne kenè din en human igkahandek is kegkeǥiya zin diyà te zuma he kinahanglan mebpekelig-en dan minsan ke ebpesipelahan sikandan. Egketuusan te en human diyà te kandin is kegkeiringa kandin te vatu he iyan ibpesavut duen te ngazan he Pedro he ingazan kandin ni Jesus, su is kedtuu zin te Megbevayà, kenè en human egkewaleng.

Nehimu si Pedro he pengulu te menge tumutuu ne zekelà is tinguhè din he meheǥet is kedtuu te zuma zin he menge tumutuu. Insurat din heini su ǥeine te mezakel he menge tumutuu is egkengaawà is kezasig dan tenged te kebpesipelahi kandan te menge etew he ebpekigkuntada te menge sakup ni Jesus. Impesavut din kandan he is kebpatey wey kegkevanhew ni Jesus, iyan tuus he kenà egketarù he zuen menge meupiya he egkaangken dan diyà te langit. Umba kinahanglan he entusa zan is menge kemereǥenan iring te menge penggezam he id-ahà ke tutuu ve is kedtuu zan.