Mebpekevantey kew! Iyan heini petizaan ni Pedro ziyà te menge etew he mibpesuratan din. Duen te nehuna he surat din midsembaǥan din sikandan he mebpekevantey sikandan ki Setanas su iring sikandin te erimaung he edriǥuriǥu su ebpen-ahà te edewiyen din. Ne kayi he surat, mibpetizeenan din sikandan he mebpekevantey zan su wey zan kenà melimbungi zuen te menge etew he egkaǥi he ibpepenudtul sikandan te Megbevayà, iyan, tarù is menge penurù dan.

Heini he menge menunudlù, ebpenudtul sikandan te menge tudtul he mibeelan dà te etew he megana he ebpemineǥen, ne haazà egkeǥiyen dan he impetuenan kandan te Megbevayà. Iring sikandan te menge teheb he kenà ebpekeinum duen is egkemezahan su nengemezahan en. Iring daan sikandan te menge kivel he kunaan te ebasuk ke egkehimu he uzan he ebpekevinyag te pinemula zin, iyan, wazà haazà meulaula. Iring pa zaan sikandan te menge leew he langgam he kenà ebpemekesavut he melemu zà is kedhingutela zuen te edlapà kandan. Utew kinahanglan is kedlikayi keniyan he menge etew su is edsunud kandan ebpekehendiyà daan te kezeetan.

Duen daan duma he menge etew he ebpenurù he kenè kun edlikù dini te kelibutan is Nengazen he si Jesus. Ne kenà sikandan ereg he ebpemineǥen su tutuu he egkeuma iyan is andew te kedlikù te Nengazen, ne zutun edsilutan din is langun he kenè din sakup. Ne iyan heeyan timpu te kedezeeti zin te langit wey kelibutan ne ed-ilisan din te veǥu he iyan dà mula ebpekeubpà dutun is menge metazeng.