2 Berakat he ikeǥaǥew kew utew te Megbevayà wey mebmelinawen is gehinawa niw pinaaǥi te kegkesevuta niw te Megbevayà wey te Nengazen tew he si Jesus.

3 Pinaaǥi te ǥehem te Megbevayà edtevangan kiw zin te mezakel he paaǥi wey kiw meketuman te menge suǥù din kayi te ked-ubpè tew zini te kelibutan.

Umba egkehimu heini su impekilala en kenitew si Jesu Kristu he iyan mibpetuu kenitew wey kiw mekeambit te ketazeng din wey te utew zin kegkelavew.

4 Iyan heini kedtumana zin te penaad din he utew zekelà wey mahal is idtuvad din kenitew.

Umba impenaad din heini su wey mekeiring is menge ulaula tew te menge ulaula te Megbevayà ne mekelikey kiw zini te kelibutan te kedtumana te menge mezaat he kebayè tew su ebpekezezaat heini kenitew.

5 Ne ǥeina te iyan heini intavang din kenitew kinahanglan he edhimuwen ta is taman te egkehimu ta su wey meheǥeti is kedtuu ta kandin te menge meupiya he ulaula.

Ne is menge meupiya he ulaula,

kinahanglan he edheǥetan ta te kegkesevuta te hustu.

6 Ne is kedsavut,

edheǥetan ta te edtengkaan he ed-ul-ulahan.

Ne haazà daan,

edheǥetan ta te kebmeinentusen.

Ne is kebmeinentusen,

edheǥetan ta te kebpevayàbayè ta te Megbevayà.

7 Ne haazà daan,

edheǥetan ta te kegiǥineǥawè tew ne is kegiǥineǥawè tew,

edheǥetan ta zaan te kebmahala ta te menge zuma ta.

8 Ne emun ed-iseg layun is ked-ul-ulaha niw kayi te langun,

kenà egkehimu he kenà utew zekelà is pulus te kedtuuwi niw te Nengazen tew he si Jesu Kristu.

9 Iyan,

ke zuen tumutuu he kenà ed-ulaula kayi,

henduen be te nelakap is isip din su kenè din egkesavut is hustu.

Nelipatan din en buwa he nepelisan en sikandin te menge zaan he ulaula zin he mezaat.

10 Menge suled,

geina te mibpilì kiw ne midhimu kiw te Megbevayà he menge tumutuu kandin,

edhimuwen tew is taman te egkehimu tew wey maahà he tutuu iyan is kebpilia zin kenitew wey is kedhimuwa zin kenitew he menge tumutuu zin.

Su emun iyan heini ed-ul-ulahan tew kenè kiw ebpekesuwey te hustu he ibayà,

11 ne zekelà is kelipey tew keuzemà su egkeǥalew is Megbevayà kenitew zutun te kebpeseleza zin kenitew zutun te wazà pidtemanan he ǥinhedian te Nengazen tew he si Jesu Kristu he iyan Menluluwas tew.

12 Minsan pa te nesavut niw en heini is langun wey meheǥet en is kedtuu niw te tutuu he tuluuwen,

kinahanglan he layun ku heini ibpezineg keniyu.

13 Su taman te kemulu e pa zini te kelibutan meupiya ke igkepezineg ku keniyu heini su wey kenè niw melipati.

14 Netuenan ku he meǥaan e en egkeumuri sumalà is impesavut kedì te Nengazen tew he si Jesu Kristu.

15 Ne tenged kayi edhimuwen ku is taman te egkehimu ku su wey kenè niw melipati is impenurù ku.

16 Sikan is impenurù dey keniyu mehitenged te egkeulaula keuzemà ke edlikù is Nengazen tew he si Jesu Kristu he utew zekelà is gehem din,

ne kenà heini tetezemen dà he midhimu te etew zà duen.

Netuenan dey su nemesahan dey en is mekeǥeǥehem he anlag din.

17 Duma key zin dengan hein impaahà te Amey tew he Megbevayà is mekeǥeǥehem he anlag din wey is utew zin kegkelavew.

Nezineg dey is lalag te mekeǥeǥehem he Megbevayà he migkaǥi te,

“Iyan heini sikan is Anak ku he utew ku minahal;

ingkesuat ku utew sikandin,”

ke sikandin.

18 Nezineg dey is laǥeng te Megbevayà he ziyà ebpuun te langit hein miduma key zengan ni Jesus pehendiyà te vuntud he mibulusan te Megbevayà.

19 Ne utew zutun neheǥet is kedtuu zey te nengetagnà dengan te ebpemeneuven te Megbevayà mehitenged ki Jesus ne kinahanglan he purungi niw zaan tuuwi.

Su is impenurù dan,

ne iring te sulù he ebpenganlag diyà te merusirem taman te kenè pa egkeriwaswas.

Ne emun egkeriwaswas en,

egketeyawan kiw te mekevugwas,

20 Ne kinahanglan utew he sevuta niw he wazà etew he hustu is kedseysey zin te penurù he insurat te ebpemeneuven dengan te Megbevayà emun wazà ipesavut kandin te Waǥas he Mulin-ulin.

21 Su heini is penurù,

wazà diyà dà mebpuun te isip te etew zà duen,

kekenà,

impinted te Megbevayà.

Mid-ulinan te Waǥas he Mulin-ulin is ebpemeneuven dengan,

ne is menge lalag dan,

iyan impekaǥi kandan te Megbevayà.