Is Teruen he Menunudlù
2
Duen dengan menge teruen he etew he uvag kun ebpeneuven te Megbevayà ne iring din ded daan,
duen menge etew he edlepew ǥuntaan he ebpenurù te tarù diyan te keniyu.
Sayep is ibpenurù dan te meeles ne ebpekezezaat heini te upakat niw te menge tumutuu.
Ibpenurù dan he kenà Nengazen tew si Jesus he iyan pezem mibelukas kandan ne tenged dutun egketik-awan sikandan ke edsilutan dan.
2 Ne minsan pa zutun mezakel is edsunud te meremerik he menge ulaula zan,
ne pinaaǥi zutun egkesawey kiw is edsunud te tutuu he tuluuwen su kunaan te menge etew ke zuma tew sikandan.
3 Tenged te suat dan te selapì,
ebpenepian kew zan pinaaǥi te penurù dan he tarù.
Daan en he midteǥana is silut kandan;
andam en is Megbevayà te kedsilut kandan.
4 Su wazà pesegdana te Megbevayà minsan is menge velinsuǥuen din dengan he nekesalà,
kekenà,
intimbag din diyà te Iveyaan.
Ne ziyè dan pa te utew merusirem he mibakus te kedina su idtaǥad sikandan taman te andew te kedsilut.
5 Wazà daan pesegdana te Megbevayà is tivuuk he menusiyà dengan su impelapey zin is daǥat ne nengelened is langun he wazè dan kedtahud kandin.
Iyan dà midlibri zin si Noe he nekepenurù te metazeng he ulaula wey zuen pa pitu he etew he midlibri zin daan.
6-8 Elin daan midsilutan dengan te Megbevayà is menge etew ziyà te menge inged he Suduma wey Gumura.
Iyan dà meǥinged dutun he midlibri zin ensi Lut su metazeng mulà si Lut.
Nerasey si Lut he ed-isip-isip te meremerik he ulaula te menge mesinupaken he zuma zin.
Andew-andew utew mezaat he ulaula is egkengezineg din wey egkengeehè din ne zutun utew mibmesakit is gehinawa zin.
Ne tenged dutun te utew menge lalung mibinsulan te Megbevayà is inged dan su wey mesavut te minsan hentei ke hengkey is kedsiluti zin keuzemà dutun te menge etew he kenà ebpemineg te menge suǥù din.
9 Iyan,
is menge etew mulà he ed-azap te Nengazen,
metau sikandin he edtavang kandan wey kenè dan mekesalà ke ebpenulayen sikandan.
Metau zaan sikandin he ebakus te menge nemematey he lalung su wey itaǥad sikandan taman te andew te kedsiluti zin kandan.
10 Utew meveǥat keuzemà is kedsiluti zin dutun te menge etew he ebpeniguduwan dan te edtuman is menge meremerik he kebayà te lawa zan wey edsumpeliten dan is minsan hentei he zuen din keǥehem.
Ne heini is migkaǥi ku he menge etew he ebpenurù te tarù,
utew zan memevurut wey memepelevawen.
Kenè dan edtehuzen is menge kedesenan diyà te langit,
kekenà,
edsumpeliten dan.
11 Ne minsan is menge velinsuǥuen te Megbevayà he lavew pa is gehem dan kenà dutun te menge teruen he menunudlù,
kenè dan mulà ebpekeaku he edsudì te menge kedesenan emun idsumbung dan is menge kedesenan diyà te etuvangan te Megbevayà.
12 Iyan,
heini is menge teruen he menunudlù,
kenè dan egkeisip he igkehandek heini su zaan he ulaula zan is kedsudì.
Iring sikandan te menge langgam he wazà keeled he iyan intuvad kandan is kedekepa wey kedhimetayi kandan.
Edsumpeliten dan is kenè dan egkesavut.
Ne iyan egkezungguan dan is kemetayen he wazà pidtemanan.
13 Utew merasey is silut he egkeantus dan keuzemà iring te merasey zaan is ibpeantus dan te menge etew.
Iyan kelenganan he egkesuatan dan is kedtumana zan te minsan maandew pa te minsan hengkey he meremerik he kebayà te lawa zan.
Igkeeled niw wey igkesudii sikandan keniyu su minsan ke ebpekidtuǥen dan keniyu ziyà te menge keemuran niw utew zan egkesuati is kedtarùtarù keniyu.
14 Egkeeriǥan dan te minsan hentei he vahi;
kenà egkepenù is suat dan te mezaat he ulaula.
Ebpeeyatan dan is menge etew he kenè pa ebpekesavut te hustu.
Utew zan leǥezen,
iyan,
kenà egkehimu he kenà sikandan egkesilutan te Megbevayà.
15 Nengetazin en is isip dan su midsuwey zan en te tutuu he ibayà.
Iyan ibayà he ed-ikulen dan is mezaat he paaǥi zengan ni Belaam he anak ni Busur.
Iyan dekelà diyà te ǥehinawa ni Belaam is selapì he idsuhul kandin ke mezaat is ed-ul-ulahan din.
16 Duen kudè din he asnu he kenà pezem ebpekekaǥi,
iyan,
impekaǥi te Megbevayà ne indawey zin ki Belaam haazà is mezaat he ed-ul-ulahan ne tenged dutun wazà melaus ni Belaam is ketuturebungi zin.
17 Ne haazà is menge etew he ebpenurù te tarù,
iring sikandan te kalut he nemezahan.
Iring sikandan te ǥapun he ebpegwisen te keramag su wazè dan menge pulus.
Inteǥana te Megbevayà is egkeubpaan dan diyà te Impirnu he utew merusirem.
18 Uvag mezalem is menge lalag dan,
iyan,
wazà pulus te egkeǥiyen dan.
Duen menge etew he ed-engkezan dan pezem is menge zaan he zuma zan he ed-ulaula te sayep,
iyan,
ebpenulayen sikandan dutun te menge menunudlù pinaaǥi te meremerik he kebayà te lawa zan.
19 Egkeǥiyen dutun te menge menunudlù he egkelibri ki pinaaǥi te kedsunuza kandan su idtuǥut kun kenita is minsan hengkey he ulaula,
iyan,
nasì nengeuripen pa sikandan te menge ulaula he ebpekezezaat su netuenan ta he uripen is etew te minsan hengkey he ebpekevayàbayà kandin.
20 Ke zuen menge etew he nekesavut en mehitenged te Nengazen tew he si Jesu Kristu,
egkelibri zan en pezem te mezaat he ulaula zini te kelibutan he ebpekezezaat kandan.
Iyan,
ke egkepenulayan sikandan ne edlikuan dan en maan haazà is daan he kegkeuripena kandan te mezaat he ulaula,
tuwas pa he merasey is egketemanan dan.
21 Meupiya pa ke wazè dan meturedu is paaǥi te kegkehimu kandan he metazeng,
kenà te neturedu zan ne mid-iniyuǥan dan ne wazè dan medtuman te suǥù kandan te Megbevayà he impesavut kandan.
22 Netuman en pinaaǥi kandan sikan is erubasa he edhenduen te,
“Migkaan te asu is in-utè din ne sikan is neziǥù he vavuy,
midtunè en maan.”