Is Insaad te Nengazen
3
Minahal he menge suled ku,
ikezuwa en heini te kebpesurati ku keniyu.
Iyan tuyù ku kayi te kezezuwa ku kebpesurati keniyu is:
wey kew mekeisip te hustu pinaaǥi kayi te menge sambag ku keniyu.
2 Egkesuatan ku he meisip-isip niw is menge lalag he insurat dengan te ebpemeneuven te Megbevayà wey is suǥù te Nengazen tew he Menluluwas tew he imbeǥey zin kenitew pinaaǥi kenami te menge epustul.
3 Idhuna ku keniyu ibpesavut he keuzemà te ketepusan he timpu duen ebpemenlepew he menge etew he iyan ebayàbayà kandan is menge mezaat he kebayè dan.
Edsumpeliten kew zan he egkaǥi te,
4 “Hendei vuwa si Kristu su impenaad din dengan he edlikù dini te kelibutan,
iyan,
kenè key ebpeketuu te iring dutun su puun pa te timpu zengan te kebpatey te menge tipehuna he kepuun tew taman en guntaan,
wazà mahalin is minsan hengkey;
iyan ded gihapun genat dà te kedtukuza te kelibutan taman en guntaan.”
5 Is egkaǥi te iring kayi,
iyan edlipatan dan is:
dengan midlimbag te Megbevayà is langit pinaaǥi zà te lalag din,
ne is tanà daan,
midlimbag din pinaaǥi te wahig ne impelepew zin is tanà puun dutun te wahig.
6 Ne pinaaǥi zaan te wahig,
midlimas dengan te Megbevayà is tivuuk he menusiyà dini te lumpad.
7 Ne haazà is Lalag te Megbevayà he iyan inlimbag din dengan,
pinaaǥi zutun midteǥenahan din en is langit wey tanà su wey melimas din te hapuy keuzemà dutun te andew te kedsusiya zin wey kedsiluti zin te menge etew he wazè dan kedtahud kandin.
8 Minahal ku he menge suled,
tentenuzi niw he ziyà te Megbevayà,
neked-iring is sengeandew zà wey is nengkelibu he tuig su ziyà te kandin meǥaan dà utew haazà is dezuwa.
9 Kunaan te zuma ke edlanganlangan is Nengazen su maan is kenè din edtumanen is pesarig din he edlikù sikandin.
Kenà sikandin edlanganlangan,
kekenà,
utew sikandin mepelevayen keniyu su kenè din egkesuatan he zuen minsan sevaha he kenà egkelibri te silut.
Egkesuatan din he meiniyuǥi te langun is menge ulaula zan he mezaat.
10 Ne minsan pa zutun,
edtumanen gihapun te Megbevayà is kedlimasa zin te kelibutan.
Egketik-awan is menusiyà he iring te kegketik-awi kandan te tekawen.
Dutun he andew egkezineg is kerekatak ne egkehanew is langit.
Egkeǥevà ne egkeamin egketutung is minsan hengkey.
Egkevinsulan is tivuuk he kelibutan wey is langun he taǥù din.
11 Ne ǥeina te zuen andew keuzemà he zutun egkehanew is langun te iring kayi,
kinahanglan he ebpurungan tew is kedsunud tew te Megbevayà para wazà igkesewayi kenitew.
12 Su edteǥazan ta is andew te kedlimasa te Megbevayà te kelibutan.
Edhimuwen ta is taman te egkehimu ta su wey meǥaan metuman.
Dutun he andew egkeamin egketutung is langit,
wey egkengetunew is langun te utew meinit.
13 Iyan,
sikitew mulà,
ebperetengen ta is beǥu en he tanà wey langit he impenaad kenitew te Megbevayà.
Iyan dà ebpekeubpà dutun is memetazeng is ulaula zan.
14 Na menge suled,
geina te kemulu tew pa edteǥazi haazà is andew,
kinahanglan he ebpurungan tew edtengkai is menge ulaula tew su wey wazà igkesewayi kenitew te Megbevayà ne wey melinew is kedepità te uman sevaha kenitew ziyà te kandin.
15 Kenè niw lipati he iyan ibpelevaya te Megbevayà kenitew su wey melibri ki te silut din.
Iyan daan heini impesavut keniyu te emiǥu tew he si Pablo zutun te surat he impeuwit din keniyu.
Impinted heini kandin te Megbevayà.
16 Ibpenurù din layun is andew te kedlimas diyà te langun he menge surat din.
Duen daan ibpenurù ni Pablo he mereǥen he edsevuten ne is menge etew he kenà edsavut te hustu wey wazà meheǥet is kedtuu zan,
edhelinen dan haazà is memereǥen ne nesayep is kedseysaya zan duen iring te nesayep daan is kedseysaya zan te zuma he insurat he Lalag te Megbevayà.
Ne tenged dutun edsilutan sikandan te Megbevayà.
17 Minahal ku he menge suled,
geina te netuenan niw en heini he zaan,
andam kew su wey kenè kew meketuu te menge tarù he ibpenurù te menge lalung he etew ne egkelipatan niw is tutuu he tuluuwen he midtuuwan niw.
18 Kinahanglan he pinaaǥi te kegkeǥeǥawi keniyu te Nengazen tew wey Menluluwas tew he si Jesu Kristu,
med-iseg is kedsevuta niw te ibpesavut din.
Berakat he iyan sikandin edeliǥen guntaan wey te wazà pidtemanan.