Is Menge Tumutuu te Megbevayà
5
Sikiyu is ebmeǥurangen te menge tumutuu,
duen idhangyù ku keniyu su ebmeǥurangen a zaan.
Nekevantey a te kedresaya zengan ki Kristu ne iring keniyu,
ebpekeseled a zaan te vulawan he ed-ulian he ibpeǥawaǥawa keuzemà.
2 Ne iyan idhangyù ku keniyu is:
purungi niw elimahi is menge tumutuu he insarig keniyu te Megbevayà.
Iring sikandan te menge kerehidu zin.
Iyan kew edumala kandan,
kenà iring te ebpeǥesen kew,
kekenà,
kinahanglan he ebpuun te meliwanag he ǥehinawa niw su iyan haazà egkesuatan te Megbevayà.
Kinahanglan he kenà iyan dà id-elimahi niw kandan is tenged te edsuhulan kew zan,
kekenà,
tenged te egkesuat kew he edtavang kandan.
3 Kenè kew medhadìhadì kandan te insarig keniyu,
kekenà,
eǥaka niw sikandan su wey iyan kew zan edsunuzen te menge meupiya he ulaula.
4 Ne emun edlikù si Jesus,
sikan is lavew he ed-elima te menge kerehidu te Megbevayà,
duen idsuhul zin keniyu he iyan is kebpekeambit niw te utew zin kegkelavew he kenà egkehanew.
5 Sikiyu menge menguhed,
edhengyuan ku sikiyu he pevayàbayè kew te menge ebmeǥurangen.
Kinahanglan he kenè kew mepelevawen,
kekenà,
mebpetebtevangè kew su zuen insurat he Lalag te Megbevayà he edhenduen te,
“Kuntada te Megbevayà is mepelevawen,
iyan,
igkehizu zin is kenà ebpelavew.”
6 Ne tenged dutun kinahanglan he kenè kew mepelevawen,
kekenà,
pevayàbayè kew te Megbevayà he mekeǥeǥehem ne edhimuwen kew zin he utew lavew keuzemà te hustu he timpu.
7 Isarig niw ziyà te kandin is minsan hengkey he seeng niw su iyan sikandin ed-elima keniyu.
8 Med-andam kew,
mebantey kew su is kuntada tew he si Setanas,
edriǥuriǥu en he iring te erimaung he edhiniǥer su ebpen-ahà te edewiyen din.
9 Sukuli niw sikandin,
ne hamen kew sarig te Megbevayà su netuenan niw he is menge zuma niw he tumutuu zini te tivuuk he kelibutan,
ebpekeantus dan daan te merasey he iring te egkeantus niw.
10 Mevavè dà is ked-antus niw ne edheǥeten te Megbevayà is kedsarig niw kandin.
Ebiǥeran kew zin,
edlig-enan kew zin wey ebeǥayan kew zin te zesen.
Iyan sikandin puunà te minsan hengkey he tavang kenitew.
Midhimu kiw zin he tumutuu su wey pinaaǥi te kebpekidsevaha tew ki Kristu mekeambit kiw te wazà pidtemanan he utew kegkelavew zin.
11 Berakat he zeliǥa sikandin te wazà pidtemanan su iyan sikandin mekeǥeǥehem.
Is Pengemusta
12 Mid-uǥupan a ni Silvanu te edsurat kayi.
Suled tew sikandin he utew egkeseriǥi.
Iyan insurati ku keniyu kayi su wey ku meheǥet is kedtuu niw.
Ibpesavut ku keniyu he impenurù ku en keniyu he tutuu is gaǥew te Megbevayà keniyu.
Ne kenè niw heini lipati.
13 Ebpengemusta keniyu is menge tumutuu zini te inged he Bebilunya.
Pinilì sikandan te Megbevayà iring te pinilì kew zin daan.
Ebpengemusta zaan keniyu si Marcos he iyan iring te tutuu he anak ku.
14 Mebpelimlimuey kew.
Mebmelinawen is gehinawa te uman sevaha keniyu he nekidsevaha ki Kristu.