Is Kegkeveǥu te Menge Ulaula
4
Ne netuenan ta he si Kristu,
hein dini pa te kelibutan,
nekeantus sikandin te merasey.
Tenged dutun kinahanglan he andam kew zaan te ked-antus te merasey su is etew he ebpekeantus te merasey,
egkeawè en diyà te kandin is suat din te ked-ulaula te mezaat.
2 Ne tenged kayi,
puun dutun taman te kebpatey zin egkehimu he kenè din en human edtumanen is mezaat he kebayà te lawa zin,
kekenà,
iyan din edtumanen is egkesuatan te Megbevayà.
3 Su kinahanglan he kenè niw en maan ul-ulaha sikan is mezaat he ed-ul-ulahan he egkesuatan te menge etew he wazà medtuu te Megbevayà.
Su zengan meremerik is ulaula niw;
mezaat is egkesuatan te lawa niw;
lelenguten kew ne mezaat is kelenganan he ibpelepew niw ziyà te menge keemuran he zutun kew ebpenginum.
Utew kew egkeepesi te Megbevayà su kenà tutuu he megbevayà is ed-ezapen niw.
4 Iyan,
guntaan,
is menge etew he kenà edtuu te Megbevayà,
utew zan egkeinuinu su maan is kenè kew en edtampu kandan te ed-ulaula te utew memezaat wey memahawag ne tenged dutun edsumpeliten kew zan.
5 Keuzemà ke ziyà sikandan ibpeetuvang te Megbevayà ed-insaan din sikandan ke maan is mid-ulaula zan te mezaat.
Andam en sikandin te kedsusi te nengeulaula te nemematey en wey te menge uuyag pa.
6 Sikan is menge etew he nemematey en,
impesavut en kandan dengan is Meupiya he Tudtulanen he ebpuun diyà te Megbevayà su wey meveǥayi sikandan te untung he wazà pidtemanan minsan pa te kenè dan egkelikayan is kebpatey te lawa zan su iyan silut te Megbevayà diyà te tivuuk he menusiyà.
7 Kenè en utew egkeuǥet is ketepusan te kelibutan.
Ne tenged dutun,
kinahanglan he hustu is ked-isip-isip niw.
Kinahanglan daan he purungi niw is menge ulaula niw su wey mehustu is ked-ampù niw ziyà te Megbevayà.
8 Kinahanglan he iyan lavew he edhemenan niw is kebmahala niw ziyà te ǥehinawa niw te minsan hentei he zuma niw he tumutuu su emun ebmahalen ta is menge zuma ta melemu ki zà ebpekepesaylu te menge salè dan kenita.
9 Kinahanglan he utew kew metulanged is ebpepemenahik te menge humehulevungà diyan te valey niw.
10 Is minsan hengkey he ketau he imbeǥey te Megbevayà diyà te kada sevaha keniyu,
kinahanglan he ǥemita zin wey metevangi is menge zuma zin he tumutuu su wey hustu is kegemita niw te minsan hengkey he intavang keniyu te Megbevayà.
11 Sikita is edwali,
kinahanglan he is kedwali ta,
ne utew hustu he iring te iyan en edwali is Megbevayà.
Sikita is edtavang,
ne kinahanglan he kenè ta edlipatan he is idtavang ta,
ne ziyà ebpuun te Megbevayà su wey pinaaǥi te ǥehem ni Jesu Kristu iyan mevantug is Megbevayà te minsan keenu su iyan dait he edeliǥen wey zait he ebayàbayà te wazà pidtemanan.
Is Menge Elentusen
12 Minahal ku he menge suled,
kenè kew meinuinu tenged te utew merasey he penggezam he egkeantus niw en tenged te kedtuu niw.
Su emun tumutuu ki,
ebpekeantus ki layun te merasey.
13 Kenè kew meinuinu,
kekenà,
lipey kew utew su pinaaǥi kayi ebpekeambit kew te menge kemeresayan he naantus ni Kristu ne tenged dutun utew kew zaan egkelipey keuzemà ke ibpezayag din kenitew haazà is bulawan he ed-ulian.
14 Utew kew zeyzey ke edsudien kew tenged te menge sumusundan kew ni Kristu su tuus heini he mid-ulinan kew te mekeǥeǥehem he Mulin-ulin he iyan is Megbevayà.
15 Kinahanglan he kenè niw iyan igkerasey is kedsiluti keniyu tenged te kebpemumunù,
kebpemenakew,
ked-ulaula te minsan hengkey he mezaat,
wey te kebpenhilavet dutun te wazè niw ketenged.
16 Iyan,
ke iyan niw ibpekeantus te merasey is tenged te neketuu kew ki Kristu,
kenè niw haazà ikeeled,
kekenà,
utew zekelà is kebpeselemati niw te Megbevayà su neǥaked kew ni Kristu.
17 Iyan heini,
menge suled,
timpu he pinaaǥi te merasey he egkeulaula ebpuunan te Megbevayà is kedsusiya zin te menge ulaula te menusiyà.
Edhunaan din edsusiya is menge sakup din.
Ne emun iyan kiw zin is menge tumutuu edhunaan din,
utew pa merasey is egketemanan te menge etew he kenà ebpemineg te Meupiya he Tudtulanen he impesavut kandan te Megbevayà.
18 Su zuen insurat he Lalag te Megbevayà he edhenduen te,
“Emun mereǥen he edlibriyen te silut is menge metazeng he etew,
iyan pe be melibri sikan is menge etew he edsukul te Megbevayà wey memezaat is ulaula!”
19 Ne tenged dutun,
menge suled,
ke ebpekeantus kew en te merasey su iyan intuvad keniyu te Megbevayà,
isarig niw is gehinawa niw ziyà te kandin he iyan metinumanen he nenlimbag wey hemeni niw is memeupiya he ulaula.