Is Huziyan he Menge Telaan
13
Kinahanglan he peniguduwi niw is kebmahala niw ziyà te ǥehinawa niw te menge zuma niw he tumutuu.
2 Kenè niw lipati he kinahanglan he ibpeehè niw is gaǥew niw ziyà te menge etew he kenè niw kilala.
Gelǥelawa niw ziyà te valey niw su zuen dengan menge etew he zuen menge meǥeliyug dan,
iyan,
wazè dan metueni he menge velinsuǥuen bes haazà te Megbevayà he ebpuun diyà te langit.
3 Kenè niw lipati is kedtavang niw te menge tumutuu he pirisu.
Purungi niw sikandan he iring te iyan kew nepirisu.
Tevangi niw zaan is menge tumutuu he ebpesipelahan he iring te iyan is keugelingen niw he lawa nepesipelahan.
4 Kinahanglan he tehuza niw te langun is ked-es-esawa niw.
Kinahanglan he wazà minsan hentei he edselselaan din is esawa zin.
Edsilutan te Megbevayà is etew he meremerik is ulaula zin wey is etew he edselselaan din is esawa zin.
5 Bantey kew su kela ke utew subra is suat niw te selapì.
Kinahanglan he imeupiye en te ǥehinawa niw is naazen niw,
su migkaǥi is Megbevayà te,
“Kenè ku sikiyu ed-ewaan ne kenè ku sikiyu ed-engkezan.”
6 Umba,
menge suled,
dekelà is kedsarig ta te Megbevayà ne ebpekekaǥi ki te,
“Iyan edtavang kedì is Megbevayà,
umba kenà a egkehandek te minsan hengkey he ed-ul-ulahan te etew zà duen dini te kediey.”
7 Kenè niw lipati is menge egalen niw te nengehuna he timpu he nekepenurù keniyu te Lalag te Megbevayà.
Isipa niw is meupiya he nehimu pinaaǥi te menge ulaula zan ne iring kandan hemeni niw is kedtuu niw ki Jesu Kristu.
8 Su si Jesu Kristu,
ne kenà egkehalin.
Iyan ded sikandin gihapun dengan,
wey ǥuntaan,
wey keuzemà te wazè din pidtemanan.
9 Umba,
kenè niw tuuwi is menge selakew he tuluuwen he kenà iyan kes tutuu he impenurù keniyu.
Iyan hustu he ibmelig-en te kedtuu tew is kedtevangi kenitew te Megbevayà,
ne kenà iyan is kedlikayi te menge egkeenen he indawey te kesuǥuan su wazà heini ikezeyzey te menge etew he ebantey kayi.
10 Sikitew is menge tumutuu ki Kristu,
duen tew en ingkepemuhat,
iyan,
haazà is menge memumuhat he Hudiyu he ziyà ebpemuhat te simbahan he ziyà te Hiruselim,
wazè dan ketenged te kegkaan kayi.
11 Netuenan niw he emun duen ibpemuhat te menge Hudiyu su ebpelisan dan is menge salè dan,
ne is lengesa te ibpemuhat,
ed-uwiten te lavew he memumuhat diyà te seled te utew mahal he ruǥu zutun te simbahan,
iyan,
is lawa te ibpemuhat ne ed-uwiten dan pehendiyà te ǥawas te inged ne zutun dan edtutunga.
12 Iring din ded daan is neulaula ki Jesus su midhimetayan sikandin diyà te ǥawas te inged ne nehimu is lengesa zin he ibpalis te menge salè tew te menusiyà.
13 Umba,
menge suled,
egawas kiw zaan te inged ne edhendiyè kiw en te kandin,
he ke và dà egkeǥiya,
kenè tew en edseriǥan is kedtumana te menge tuluuwen te menge Hudiyu,
kekenà,
iyan dà edseriǥan tew si Jesus.
Edsundanan tew sikandin ne kenè tew igkehandek is ked-entusa tew te kedsudia kenitew tenged te kedtuu tew kandin.
14 Su kenà ebpedayun is kebpekeubpè tew kayi te kelibutan,
kekenà,
ebperetengen tew pa is tutuu he inged tew keuzemà he iyan ed-ubpaan tew te wazè din pidtemanan.
15 Ne tenged dutun kinahanglan he pinaaǥi ki Jesus he memumuhat tew,
iyan tew layun ibpemuhat diyà te Megbevayà is kedeliǥa tew kandin.
Layun tew ibpaahà diyà te Megbevayà is kebpeselamati tew kandin.
16 Kenè niw lipati is kebpurung niw te minsan hentei he zuma niw,
ne mebpetebtevangè kew su is ulaula he iring kayi,
ne iring te pemuhat he egkesuatan te Megbevayà.
17 Tumana niw is suǥù te menge egalen niw te menge tumutuu ne ipeehè niw is kedtehuza niw kandan su iyan sikandan ed-elima keniyu te edtuu,
ne zuen timpu keuzemà he edsusiyen te Megbevayà ke metinumanen dan be is ed-elima keniyu.
Emun ebpemineǥen niw is suǥù dan,
utew ibmeupiya te ǥehinawa zan is baal zan.
Ne emun kenè kew ebpemineg,
utew mereǥen is baal zan ne egkehimu zaan heini he idlised niw.
18 Menge suled,
iampù key layun keniyu.
Netuenan dey he wazà igkesawey te menge ulaula zey su iyan dà egkesuatan dey he meveeli zey is layun meupiya.
19 Ne iampù a zaan keniyu wey a meǥaan ipeulì te Megbevayà diyan te keniyu.
20 Is Megbevayà,
mibanhew zin is Nengazen tew he si Jesus.
Midtiǥis is lengesa zin he iyan tuus te veǥu wey wazà pidtemanan he paaǥi te kebpekidsevaha tew te Megbevayà.
Ne tenged dutun nehimu si Jesus he mekeǥeǥehem he ed-elima kenitew te menge kerehidu zin.
21 Berakat he pinaaǥi ki Jesu Kristu,
is Megbevayà he ebeǥey te kelinew,
beǥayi kew zin te minsan hengkey he tavang wey niw tumana is egkesuatan din.
Berakat daan he himuwa kiw zin he menge etew he utew zin egkesuati is menge ulaula.
Edeliǥen tew si Jesu Kristu te wazà pidtemanan.
22 Menge suled,
edhengyuan ku sikiyu he entusa niw is kebpemineg kayi te langun he menge lalag ku keniyu su kenà utew meluǥayad heini is insurat ku.
23 Iyan daan tudtul ku keniyu is:
impeǥawas en te pirisuwan is suled tew he si Timoteo.
Emun petuluy ebpekeuma sikandin dini edumahan ku ke ebpekehendiyan a.
24 Ipengemusta a keniyu te langun he menge egalen niw wey te langun he menge sakup te Megbevayà diyan.
Is menge suled tew zini te Italya,
ne ebpengemusta zaan sikandan keniyu.
25 Berakat he ikeǥaǥew kew is langun te Megbevayà.