Is Kebmansuwa te Megbevayà te Menge Anak Din
12
Ne sikitew zaan,
menge suled,
kayi te kedtuu tew te Megbevayà,
ne iring kiw te ebpelumlumbeey.
Ne ǥeina te utew mezakel is menge tumutuu zengan he nekepaahà kenitew he metinumanen is Megbevayà,
kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula,
ne ebpekezesen kiw te ebpelelaǥuy taman te ebpekeuma kiw ziyà te edungguan tew.
2 Edhemenan ta is kedsarig ta ki Jesus su iyan sikandin puunà te kedtuu ta ne pinaaǥi zaan kandin egkeheǥet is kedtuu ta.
Mid-antus din is kedrensanga kandin dutun te krus.
Ne wazè din ikeeled haazà is kedhimetayi kandin,
kekenà,
mid-isip din he utew zin igkelipey is egkeulaula zin emun egkeipus haazà is ked-antus din.
Ne ǥuntaan mibpinuu en sikandin dutun te utew lavew he pinuuwà su ziyà te zapit te egkekewanan te Megbevayà.
3 Ne si Jesus,
ne utew merasey is impeseǥazan kandin tenged te kebpesipelahi kandin te menge lalung he etew.
Tenged kayi isipa niw layun sikandin su wey kenà maawà is kedhamen niw te kedsarig niw,
ne kenè kew edtepulen te ked-ulaula te meupiya.
4 Su netuenan niw he zutun te kedsukuli niw te mezaat he ulaula,
wazà minsan hentei keniyu he midhimetayan tenged te kedtuu zin.
5 Kela ke nelipatan niw en is sambag te Megbevayà diyà te keniyu te menge anak din su zuen insurat he Lalag te Megbevayà he edhenduen te,
“Sikew,
anak ku,
emun edsewayen ku sikew,
purungi nu susiya is menge ulaula nu.
Ne emun ebmensuwen ku sikew kinahanglan he kenà heini igkeawà te kedhamen nu kedsarig kediey.
6 Su is minsan hentei he mahal zini te ǥehinawa ku,
edsewayen ku,
ne is minsan hentei he ed-engkenen ku he anak ku,
ebpenuruen ku pinaaǥi te merasey wey sikandin memansu,”
ke sikandin.
7 Umba,
ke minsan hengkey is mereǥen he egkeulaula niw ǥuntaan,
entusa niw,
su pinaaǥi kayi ebpenuruen kew te Megbevayà su menge anak kew zin.
Ne wazà anak he kenà ebmensuwen te amey zin.
8 Emun kenè kew ebmensuwen te Megbevayà kenè kew tutuu he menge anak din,
kekenà,
iring kew te ingkeǥingey zà.
9 Su minsan is amey ta zini te kelibutan,
emun ebmensuwen ki zin ne ebpekepevayàbayè ki ǥihapun kandin,
wey pe be kenà mehimu he ebpekepevayàbayè ki zaan te Amey ta ziyà te langit?
Su pinaaǥi kayi egkeangken ta is untung he wazè din pidtemanan.
10 Is amey ta zini te kelibutan,
ne seled te mevavè dà he timpu is kebmensuwa zin kenita sumalà is neisip din he meupiya.
Ne,
is Amey ta ziyà te langit,
iyan ibmensuwa zin kenita su wey ki metevangi ne wey ki zaan mehimu he mebmetazeng he iring kandin.
11 Ne emun ebmensuwen ki te Megbevayà,
kenè ta egkesuatan su merasey is egkeulaula ta.
Iyan,
emun egkepasad haazà is kebmensuwa zin kenita,
ne pinaaǥi kayi nemansu ki en te Megbevayà,
ne metazeng en is menge ulaula ta,
ne zutun utew melinew is kebpekesavuk ta.
12 Umba,
menge suled,
heǥeta niw is kedsarig niw,
ne hemeni niw en is kedtuu niw.
13 Peniguduwi niw te ed-ikul is hustu he ibayà su wey kenà luyahi is menge zuma niw he mehugkà is kedtuu zan,
kekenà,
melig-eni is kedtuu zan.
Is Petizaan Mehitenged te Kedsupaka te Megbevayà
14 Himuwa niw is taman te egkehimu niw su wey melinew is kebpekidepitè niw te minsan hentei ne wey niw metuman is metazeng he ulaula su emun kenè ki metazeng kenè ta is Megbevayà egkeahà keuzemà.
15 Bantey kew su kela ke zuen duma keniyu he kenà edawat te ǥaǥew te Megbevayà.
Su is iring kayi he etew,
ne ebpekeiring te sagbet he ebpemeǥas te mepait he ebpekehilu.
Ebpekesamuk sikandin te menge tumutuu ne mezakel he etew is ebpekeiring kandin te ed-ulaula te mezaat.
16 Bantey kew su wey wazà minsan sevaha keniyu he meremerik is ulaula zin wey ke ed-iniyuǥan din be is Megbevayà su iring kayi si Esau zengan.
Is ketenged din te kegkekakey he anak,
inliwè din te keenen he sengepegkaan dà.
17 Ne neuǥet dutun neisip din he meupiya ke iyan sikandin is kakey penubtuvazi te amey zin wey metuvazi sikandin te Megbevayà,
iyan,
wazà mehimu su kenè en egkehimu he edhewien din pa maan is inliwè din en,
minsan pa te nekesineǥew sikandin is edhangyù.
18 Is paaǥi te ked-uvey ziyà te Megvevayà he impenurù kenitew,
ne kenè en iring te paaǥi te menge kevuwazan dengan ni Israyil.
Su iyan mid-uvayan dan is egkeehè dan su ziyà te vuntud he Siney he utew meregreg.
Merusirem dutun tenged te kivel ne utew mevendes is keramag.
19 Egkezineg dan is budyung wey is mezaǥing he laǥeng te Megbevayà.
Ne hein nezineg te menge etew haazà is laǥeng,
midhangyù dan he med-engked haazà is egkaǥi su utew mekehandekhandek.
20 Su utew zan ingkehandek is migkaǥi zin he ke sikandin te,
“Ke zuen minsan hentei,
minsan is ayam niw he ed-uvey pa kayi te vuntud,
ne kinahanglan he edhimetayan pinaaǥi te kedtulenga te vatu.”
21 Ne haazà is neehè dan dutun,
ne utew mekehandekhandek ne minsan si Moises,
nekaǥi zin he migkerker sikandin tenged te kegkehandek din.
22 Iyan,
sikitew mulà,
kenà iring dutun is ked-uvey tew te Megbevayà su iring te ed-uvayan tew is buntud he Siyun he zutun is inged te Megbevayà he wazè din kemetayen.
Iyan haazà kes inged he Hiruselim diyà te langit he zutun nengetiǥum is egkengelipey he edliblibuwen he menge velinsuǥuen te Megbevayà.
23 Iring te mid-uvayan tew en is pengenayan he menge anak te Megbevayà he inlista is menge ngazan dan diyà te langit.
Ne mid-uvayan tew en is Megbevayà he iyan edsusi te menge ulaula te tivuuk he menusiyà.
Mid-uvayan tew zaan is gimukud te langun he menge etew he menge metazeng he minatey en he netapus en is kedlibriya kandan te mezaat he ulaula.
24 Mid-uvayan tew zaan si Jesus he iyan datù tew he midhimu te veǥu en he paaǥi te kebpekidsevaha tew te Megbevayà.
Pinaaǥi te lengesa zin nengepelisan is menge salè tew.
Tuus is lengesa zin te ǥaǥew kenitew te Megbevayà he utew haazà meupiya kenà te lengesa ni Abel zengan su is lengesa ni Abel,
iyan tuus te silut te Megbevayà.
25 Umba,
purung kew pemineg te Lalag te Megbevayà ne kenè kew sukul.
Su is menge etew zengan he wazè dan pemineǥa is Lalag te Megbevayà he insuǥù kandan ni Moises dini te kelibutan,
emun wazà sikandan mekelikey te silut te Megbevayà,
iyan kew pe be mekelikey te silut emun kenè niw ebpemineǥen is egkeǥiyen din te ebpuun te langit.
26 Dengan,
migkerker is tanà tenged te utew mezaǥing he laǥeng te Megbevayà;
iyan,
migkaǥi zin he zuen timpu keuzemà he ed-umanan din ibpekerker,
kenà iyan dà is tanà,
kekenà,
ragkes is langit.
27 Ne iyan kehuluǥan kayi te menge lalag he edhenduen te,
“ed-umanan din ibpekerker” is:
id-awè din is minsan hengkey he egkewaleng su wey iyan dà metaǥak is minsan hengkey he kenà egkewaleng.
28 Umba,
kinahanglan he zekelà is kebpeselemati tew kandin su iyan kiw menge sakup te ǥinhedian din he kenà egkehanew te wazè din pidtemanan.
Kinahanglan he ed-azap kiw kandin te paaǥi he iyan egkesuatan din.
Ne edtehuzan tew sikandin duma is kegkehandek;
29 su is Megbevayè tew,
iring te utew meinit he hapuy is kedsilut din.