4-6 Su penenglitan duen menge etew he neteyawan te Megbevayà is isip dan.

Nesavut dan en ke hengkey is ibeǥey kenitew ziyà te langit,

ne nekeambit dan en te ǥehem te Waǥas he Mulin-ulin,

ne netuenan dan en is meupiya he impesavut te Megbevayà,

ne neehè dan daan is egkehimu te ǥehem he ibpaahà te Megbevayà keuzemà te ketepusan he timpu.

Ne emun ed-iniyuǥan dan heini kenè en egkehimu he ibpelikù dan ibpeuman wey zan meiniyuǥi is mezaat he menge ulaula zan.

Henduen be te in-uman dan iransang diyà te krus is Anak te Megbevayà ne edhimuwen dan he sumpelita sikandin te menge etew.

7 Su sikitew is menusiyà,

ne iring kiw te tanà.

Ne is tanà he layun ed-uzani ne memelambeg is menge pinemula zuen,

ne zekelà is pulus kayi ziyà te teǥitanà.

Ne is etew he iring dutun te tanà,

edtuvazan sikandin te Megbevayà.

8 Iyan,

ke zuen tanà he iyan dà ebpeketuvù duen is menge zuǥiyen he sagbet wey menge hilemunen,

ne wazè din pulus,

ne ed-engkezan,

ne ebinsulan te teǥitanà.

Ne iring din ded daan is etew he iring kayi te tanà su edsilutan te Megbevayà.

9 Na,

menge minahal ku he menge suled,

minsan pa te iring kayi is menge lalag ku keniyu,

netuenan ku he meupiya pa mulà is egkezungguan niw su netuenan ku he zekelà is pulus te kedlibriya keniyu te Megbevayà.

10 Su kenà egkehimu he kenà metazeng is kedsusiya keniyu te Megbevayà;

su kenà egkehimu he egkelipatan din is langun he meupiya he mid-ulaula niw tenged te mahal sikandin diyà te ǥehinawa niw su midtevangan niw is menge zuma tew he tumutuu ne minsan guntaan wazè niw engkezi is kedtevangi niw kandan.

11 Ne is kada sevaha keniyu,

egkesuatan dey he kenè niw zaan engkezi is kedhaǥù niw taman te kedlikù ni Jesus dutun te ketepusan he timpu keuzemà su wey zutun metuman diyan te keniyu is langun he meupiya he ebpeebuten tew.

12 Kinahanglan he kenè kew mebpetetapul,

kekenà,

iringi niw is menge etew he meinentusen he edtuu te Megbevayà su tenged kayi egkezawat dan is impenaad te Megbevayà.

13 Isipa niw si Abraham.

Dutun te kebpenaazi kandin te Megbevayà,

is Megbevayà,

ne wazà duma he ngazan he neǥamit din te kedlig-eni zin te penaad din,

kekenà,

migamit din is kandin he keugelingen he ngazan su wazà lavew kandin.

14 Ne pinaaǥi te kandin he ngazan migkaǥi sikandin diyà te ki Abraham te,

“Kenè en ebperis he edtuvazan ku sikew te meupiya ne ebmezakel utew is menge kevuwazan nu.”

15 Ne si Abraham,

utew sikandin meinentusen he edsarig te Megbevayà taman te netuman te Megbevayà is penaad din kandin.

16 Ne emun duen penaad te etew zà duen,

iyan idlig-en din te penaad din is:

duen lavew kandin he ibpepirma zin zutun te penaad din.

Ne emun iyan heini ed-ul-ulahan din dutun te husayen,

ebpeketuu te lalag din is ebpemineg dutun te penaad din.

17 Ne egkesuatan dengan te Megbevayà he mesavut te menge etew he mibpenaazan din he kenà duwazuwa he edtumanen din is penaad din kandan,

ne tenged kayi midlig-enan din is penaad din.

18 Ne zuen dezuwa he ulaula te Megbevayà he kenà egkehalin te minsan hentei.

Is sevaha,

ne iyan is penaad din,

ne is sevaha,

ne iyan is kedlig-eni zin te penaad din.

Ne pinaaǥi kayi te zezuwa egkesavut ta he kenà egkehimu he kenè din edtumanen is penaad din.

Ne tenged kayi,

sikitew is nemekeaput diyà te kandin,

utew meheǥet is kedsarig tew kandin ne tenged kayi edhemenan tew is kebpeebuta tew te langun he meupiya he impenaad din kenitew.

19-20 Ne utew mezesen wey nelig-enan heini is kebpeebuta tew he edtumanen te Megbevayà is penaad din su iyan edseriǥan tew is Megbevayà.

Ne si Jesus,

ne nehimu en sikandin he zatù tew ne ziyè en sikandin te etuvangan te Megbevayà.

Ne nehimu en si Jesus he lavew he memumuhat tew he wazè din pidtemanan he iring te memumuhat dengan he si Milkisidik.