5
Su ke zuen etew he ebpilien he lavew he memumuhat,
idsarig kandin is ked-etuvang te Megbevayà ne iyan sikandin datù te menge etew.
Ne idsarig daan kandin is menge ibeǥey ziyà te Megbevayà wey is kebpemuhat wey mepelisi is menge etew te menge mezaat he ulaula.
2 Ne tenged te etew zà duen sikandin he layun egkesayep,
egkehimu he mepelevayen sikandin te menge zuma zin he etew he egkengesayep daan tenged te kenè dan ebpekesavut.
3 Ne tenged te zuen daan kandin he menge sayep,
kinahanglan he zuen ibpemuhat din tenged te kandin he menge mezaat he ulaula iring te zuen daan ibpemuhat din tenged te menge mezaat he ulaula te menge zuma zin he etew.
4 Utew telehuzen is lavew he memumuhat,
iyan,
wazà minsan hentei he ebpekehimu he ebpilì te keugelingen din wey mehimu sikandin he lavew he memumuhat su iyan ebpilì kandin is Megbevayà iring te mibpilì din dengan si Arun.
5 Ne iring din ded daan wazà iyan si Kristu mebpilì te keugelingen din wey mehimu sikandin he mekeǥeǥehem he lavew he memumuhat tew,
kekenà,
iyan is Megbevayà su migkaǥi kandin is Megbevayà te,
“Iyan ka Anak ku.
Ne egkeǥiyen ku he ǥuntaan ibpeehè ku
he Amey a kenikew.”
6 Ne zuen pa insurat he lalag din he edhenduen te,
“Iring ka ki Milkisidik he memumuhat dengan,
su wazà pidtemanan te kegkememumuhat nu.”
7 Ne hein kemulu pa si Jesus dini te kelibutan,
ne mibpeniǥis is luhè din ne nekelelendag sikandin tenged te utew meheǥet is kebuyù din wey ked-ampù din diyà te Megbevayà he iyan ebpekelibri kandin te kemetayen.
Ne tenged te zekelà is kedtahud din wey kedtumana zin te menge suǥù te Megbevayà,
midineg is ked-ampù din te Megbevayà.
8 Su minsan pa te Anak sikandin te Megbevayà,
ingkepenurù gihapun kandin is kebpeketuman te suǥù te Megbevayà pinaaǥi te menge kemereǥenan he nengeeǥiyan din.
9 Ne hein nepasad din en is langun he impetuman kandin te Megbevayà,
nehimu sikandin he Menluluwas te langun he ebpemineg kandin su wey meveǥayi sikandan te untung he wazè din pidtemanan.
10 Ne zutun,
is Megbevayà,
midlilaan din sikandin he lavew he memumuhat iring te memumuhat dengan he si Milkisidik.
Is Ked-engked te Kedtuu
11 Dekelè pa is ibpesavut ku pezem keniyu mehitenged te kegkememumuhat ni Milkisidik wey ni Jesus,
iyan,
mereǥen he edseysayen su kenè niw en egkesavut.
Henduen be te kenè en ed-uteng diyà te isip niw.
12 Neuǥet en is kebpeketuu niw ki Jesus,
ne engayan kew en pezem he menge menunudlù,
iyan,
kenà egkehimu su kinahanglan he ebpekepepenurù kew pa ebpekepeuman wey niw mesavut is menge melemu zà he tuluuwen he ebpuun te Lalag te Megbevayà.
Henduen te kemulu kew pa edsusu su kenè niw pa egkelutang te egkaan is mezesen he egkeenen,
he ke và dà egkeǥiya,
is menge mezalem he ebpuun te insurat he Lalag te Megbevayà.
13 Emun deisek ki pa he vatà ne iyan dà egkezawat ta is gatas,
he ke và dà egkeǥiya,
kenè te pa egketuenan is penurù mehitenged te metazeng he ulaula.
14 Ne emun meǥurang ki en ne egkesepè te en is mehunit he egkeenen,
he ke và dà egkeǥiya,
mezalem en is igkepenurù kenita ne metau ki en he ed-isip-isip,
ne egketuusan te en ke hengkey is meupiya wey ke hengkey is mezaat he ibayà.