Is Beǥu he Paaǥi
8
Ne iyan kehuluǥan te langun he impesavut ku en keniyu is:
duen tew en lavew he memumuhat he iring kayi ne iyan si Jesus.
Impepinuu en sikandin diyà te utew lavew he pinuuwà su ziyà te zapit te egkekewanan te mekeǥeǥehem he Megbevayà diyà te langit.
2 Edtumanen din is kegkememumuhat din diyà te etuvangan te Megbevayà,
diyà te tutuu he valey he ed-ezapan he wazà beeli te etew,
kekenà,
mibeelan te Megbevayà su ziyà te langit.
3 Is lavew he memumuhat dini te kelibutan,
insuǥù kandin is kebpemuhata te menge ibpelengesa wey is kebeǥaya te menge halad diyà te Megbevayà.
Ne iring din ded daan kinahanglan he zuen daan ibpemuhat te kenitew he lavew he memumuhat.
4 Iyan,
dutun te kemulu pa sikandin dini te kelibutan,
kenà egkehimu he memumuhat sikandin su puun pa te zengan dà taman guntaan duen menge memumuhat he ebpemuhat sumalà is insuǥù kandan dutun te kesuǥuan he imbilinbilin ni Moises.
5 Alung dà is kandan he vaal su ed-iringan dan dà haazà is tutuu he ebpeiringan kandan he ziyà te langit.
Netuenan ta heini su zutun te kebeeli ni Moises te simbahan he terapal he iyan dengan baley te Megbevayà dini te kelibutan,
migkeǥiyan sikandin te Megbevayà te,
“Purungi nu te ed-iring is simbahan diyà te langit he impeehè ku kenikew ziyà te vuntud.
6 Ne is baal ni Jesus te memumuhat,
ne lavew pa utew he meupiya,
kenà is baal te menge memumuhat dini te kelibutan.
Ne iring din ded daan,
meupiya pa utew is beǥu he paaǥi he ed-ikulen din wey kiw mezawat te Megbevayà,
kenà is daan he paaǥi.
Su heini is beǥu,
ne neviǥeran te tuwas pa he meupiya he penaad te Megbevayà.
7 Haazà is nehuna he paaǥi,
ne kenà ebpeketavang kenitew.
Su ke neketavang haazà is nehuna kenè en kinahanglan he ed-ilisan pa maan te veǥu.
8 Iyan,
wazà mesuat is Megbevayà te menge ulaula te menge etew he nekesundan duen te nehuna he paaǥi su zuen insurat he Lalag te Nengazen he edhenduen te,
“Duen timpu keuzemà he zutun edhimuwen ku is beǥu en he paaǥi wey ku mezawat is langun he menge etew he kevuwazan ni Israyil.
9 Ne heini is beǥu he paaǥi,
ne kenà iring te nehuna he paaǥi he imbeǥey ku ziyà te menge lukes dan dengan te ked-eǥaka ku kandan dutun te kebpeewaa ku kandan dutun te tanà he Ihiptu.
Wazè dan tumana is menge suǥù ku zutun te nehuna he paaǥi ne tenged kayi mid-iniyuǥan ku sikandan,”
ke sikandin.
10 Ne mid-uman megkaǥi is Nengazen te,
“Is beǥu he paaǥi he edtukuzen ku wey ku mezawat is menge kevuwazan ni Israyil,
ne iyan heini:
is menge suǥù ku,
ne idsurat ku ziyà te ǥehinawa zan wey ziyà te isip dan ne egkesuatan dan human te edtuman heini.
Ne human a egkehimu he Megbevayà dan ne egkehimu sikandan he menge ǥaked ku.
11 Ne tenged kayi,
dutun he timpu keuzemà kenè en kinahanglan te minsan hentei he ebpepenurù te zuma zin mehitenged kedì,
ne kenè en daan kinahanglan dutun he zuen pa maan etew he edseysey ziyà te zuma zin ke hentei a is Megbevayà su zutun egketuenan te minsan hentei,
lavew se kenà lavew,
ke hentei a.
12 Ne egkehizuwan ku sikandan,
ne ebpeseyluwen ku sikandan te mezaat he mid-ulaula zan,
ne edlipatan ku en is menge salè dan,”
ke sikandin.
13 Ne ǥeina te migkaǥi te Megbevayà he zuen beǥu en he paaǥi,
egkesavut tew he kenè en ebpulus haazà is daan.
Ne ke zuen minsan hengkey he zaan en he kenè en egkeǥamit ne ed-engkezan en su ed-ilisan te veǥu.