Is Surat Ni Epustul Pablo Ziyà Te Ki
Tito
1
1-4 Sikew,
Tito,
ebpesuratan ku sikew.
Iring ka te tutuu he anak ku su is kedtuu nu te Nengazen,
ne iring daan te kedì he kedtuu kandin.
Berakat he ikeǥaǥew ka te Megbevayà wey te Menluluwas tew he si Jesu Kristu wey veǥayi ke zan te melinawen he kebpekesavuk.
Iyan a si Pablo is suluǥuen te Megbevayà wey is epustul,
he ke và dà egkeǥiya,
suǥù ni Jesu Kristu.
Iyan insuǥua zin kedì su wey ku meheǥet is kedtuu te menge etew he pinilì te Megbevayà,
ne wey ku zaan meheǥet is kedsavut dan te tutuu he tuluuwen he iyan edtuuwan ta.
Elin daan insuǥua zin kedì is wey zan mesavut he ebpekeperateng dan te untung he wazà pidtemanan.
Dengan te wazè pa limbaǥa is minsan hengkey,
migkaǥi te Megbevayà he ibeǥey zin kenitew heini is untung ne netuenan ta he kenà egkehimu he kenè din edtumanen is egkeǥiyen din.
Ne ǥuntaan iyan en timpu te kebpetueni zin kayi te untung pinaaǥi te Meupiya he Tudtulanen.
Ne heini he tudtulanen,
insarig kediey te Megbevayà he menluluwas tew.
Is Baal ni Tito Ziyà te Krita
5 Iyan inteǥaka ku kenikew ziyan te Krita is wey nu mehimasad is menge vaal he wazè ta mepasad,
ne wey nu zaan mepilì diyà te kada inged is menge ebmeǥurangen he egkeseriǥan te menge tumutuu.
Emun ebpilien nu is menge ebmeǥurangen,
ul-ulaha nu is intelaan ku kenikew.
6 Is ebmeǥurangen,
kinahanglan he wazà supak din,
sevaha zà is esawa zin,
ne kenè din selselai.
Kinahanglan he menge tumutuu is menge anak din,
ne kenà sikandan ed-isipen te menge etew he iyan dan dà ebpen-ahaan is kelibutanen he kelipey.
Kinahanglan he metinumanen sikandan te menge idsuǥù kandan.
7 Ne ǥeina te insarig kandin te Megbevayà is kedumala te menge tumutuu,
kinahanglan he wazà supak din.
Kenà sikandin mebmandarmandar zà;
kenà sikandin eengeren.
Kinahanglan he kenà sikandin lelenguten,
kenà sikandin ebpemeǥespeǥes ne kenà iyan dekelà diyà te ǥehinawa zin is selapì.
8 Kinahanglan he meelima sikandin te menge meǥeliyug din ne kinahanglan daan he iyan utew zin egkesuati is kedtevangi zin te menge etew.
Metau sikandin he ed-isip te hustu.
Metazeng sikandin he etew wey igkesuat te Megbevayà is menge ulaula zin.
Metau zaan sikandin he ed-eǥen te menge suat te lawa zin.
9 Kinahanglan he zutun te kebpenurù din,
kenè din suwayi is tutuu he tuluuwen he iyan impenurù ta.
Su emun iyan ibpenurù din is tutuu he tuluuwen,
egkeheǥet is kedtuu te ebpememineg kandin ne igkepesavut din he utew nengesayep is edsumpalit te penurù din.
10 Umba egkeǥiyen ku heini su zuen mezakel he menge zuma niyu ziyan he edsumpalit te hustu he penurù.
Iyan is menge Hudiyu he tumutuu en ki Kristu.
Wazà pulus te egkeǥiyen dan wey tarù is ibpenurù dan.
11 Kinahanglan he ibpeengkezan nu kandan is kebpenurù dan su ke zuen sevaha he egketazin is isip din pinaaǥi te kedtuuwi zin kayi he penurù egkesemukan is kebpekid-upakat din te menge zuma zin dutun te pemilya zin.
Iyan dà ibpenurua zan dutun te kenà hustu he ibpenurù is wey zan mekepenapì.
12 Duen nevantug he menenagnà he zuma zan he tigKrita he migkaǥi te,
“Teruen wey utew lalung is menge etew zini te Krita.
Utew zan egkeepesi is kedterebahu,
iyan,
utew zan egkesuati is kegkaan.”
13 Ne utew venar is migkaǥi zin.
Tenged dutun kinahanglan he pekezeseni nu sikandan te edawey wey mehustu is kedtuu zan
14 ne wey zan meengkezi is kedtuu zan te menge tetezemen te menge Hudiyu wey te menge kelibutanen dà he suǥù he mibeelan te menge etew he edsumpalit te tutuu he tuluuwen.
15 Ke zuen etew he nelumpiyuwan te Megbevayà,
wazà minsan hengkey he ibmeremerik din.
Iyan,
ke zuen etew he wazà melumpiyuwi te Megbevayà,
wazà minsan hengkey pa he paaǥi he igkelumpiyu kandin su kenè sikandin edtuu ne nelalung utew is isip din wey ǥehinawa zin.
16 Duen menge etew he egkeǥiyen dan he emiǥu sikandan te Megbevayà,
iyan,
pinaaǥi te menge ulaula zan egketuusan ta he kuntada sikandan te Megbevayà.
Utew zin sikandan egkeepesi su kenè dan ebpememineg te tutuu he tuluuwen.
Ne tenged dutun kenè dan dait he ibpeulaula zin te minsan hengkey he meupiya.