Is Ulaula te Tumutuu
2
Ne sikew mulà,
kinahanglan he kenà ebpekesuwey is ibpenurù nu zuen te tutuu he tuluuwen.
2 Is menge meǥurang en he maama,
ne iyan ipenurù nu kandan is:
kinahanglan he metau sikandan he ed-eǥen te menge suat te lawa zan;
kinahanglan he zait sikandan he edtehuzen tenged te menge ulaula zan he meupiya;
kinahanglan he metau zan he ed-isip te hustu.
Meheǥet is kedtuu zan te Megbevayà,
ebmahalen dan diyà te ǥehinawa zan is menge zuma zan,
wey meinentusen sikandan.
3 Ne iring ded daan dutun is penurù nu ziyà te menge meǥurang en he vahi.
Kinahanglan he layun igkesuat te Megbevayà is menge ulaula zan.
Kenà sikandan pereituk,
kenà sikandan pereinum te vinu.
Kinahanglan he layun dan ipenurù is meupiya he ulaula
4 su wey zan ikepenurù diyà te menge menguhed he vahi is kebmahala zan te menge esawa zan wey menge anak dan,
5 ne wey zan daan ikepenurù kandan is ked-isip te hustu,
is kedlikayi te meremerik he ulaula,
wey is kebpurungi zan te menge vaal zan.
Kinahanglan he ebpemineǥen dan is suǥù te esawa zan.
Ne emun iring dutun is menge ulaula te menge vahi wazà minsan hentei he ebpekekaǥi he mezaat is ibpenurù ta zutun te Lalag te Megbevayà.
6 Ne iring din daan dutun is penurù nu ziyà te menge menguhed he maama.
Kinahanglan he ipenurù nu kandan he purungi zan tengkai is menge ulaula zan.
7 Sikew zaan,
kinahanglan he layun meupiya is kenikew he ulaula su wey iyan ka meiringi te menge zuma nu.
Ne emun ebpenurù ka,
kinahanglan he hustu is tuyù nu wey sungkad te Lalag te Megbevayà is paaǥi nu te kebpenurù.
8 Is minsan hengkey he ibpenurù nu,
ne kinahanglan he zutun ebpuun te hustu he tuluuwen su wey kenà egkekaǥi he sayep ne zutun wazà igkesudii kenita te menge kuntada ta,
kekenà,
egkeeled dan.
9 Penurua nu is menge tumutuu he suluǥuen he pemineǥa zan is suǥù te menge egalen dan su wey ikesuat te menge egalen is menge vaal zan.
Kinahanglan he kenè dan medsukul,
10 ne kenè dan mebpenakew,
kekenà,
ipeehè dan he egkeseriǥan sikandan te egalen dan.
Emun iyan haazà ulaula te menge suluǥuen he tumutuu egkesavut te menge etew he utew tutuu is tuluuwen he ibpenurù ta mehitenged te Megbevayà he iyan menluluwas tew.
11 Impeǥawaǥawa en guntaan is gaǥew te Megbevayà su wey mehimu he melibri te silut is tivuuk he menusiyà.
12 Ne pinaaǥi zutun te ǥaǥew egkesavut ta he kinahanglan he meengkezi ta is menge ulaula he kenà igkesuat te Megbevayà wey is kedtumana ta te menge suat te lawa ta zini te kelibutan.
Kinahanglan he ed-eǥenen ta is menge kebayà ta he mezaat.
Kinahanglan daan he metazeng wey igkesuat te Megbevayà is menge ulaula ta te zini ki pa ed-ubpà te kelibutan.
13 Su zuen edteǥazan ta he andew he zutun ibpeǥawaǥawa is lavew he Megbevayà he iyan Menluluwas tew he si Jesu Kristu he utew zekelà is gehem din.
Iyan sikandin ebperetengen ta.
14 Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge ǥaked din he etew he nelumpiyuwan he utew en egkengesuat he ed-ulaula te meupiya.
15 Ne heini is langun he migkaǥi ku,
ipenurù nu ziyà te menge etew ziyan.
Gemita nu is keǥehem nu te kebayàbayà kandan.
Sembaǥi nu wey dewaya nu sikandan.
Kinahanglan he kenè ka lulupiǥan te minsan hentei.