Meǥurang en si Pablo hein insurat din heini. Pinirisu sikandin tenged te kedsangyew zin mehitenged ki Kristu ne netuenan din he meǥaan en sikandin edhimetayi. Ne layun din egketenuzi is mehitenged te menge etew ziyà te nekedseselekawà he menge lugar he nengepenurù din wey is menge pengulu zan dutun te kedtuu zan. Ne utew sikandan egkengereǥeni. Iyan neisip din is: ebpekehimu ve vuwa sikandan te kebpedayun kebpenurù mehitenged te tutuu he tuluuwen dutun he timpu te utew man mahabet is menge etew he ebpenigudu edtazin kandan?

Kemulu si Pablo ziyà te pirisuwan hein impeuwit din heini is surat diyà te ki Timoteo, ne iyan en buwa heini kinehuziyanan he surat din dutun te wazè pa sikandin himetayi. Nekaǥi zin kayi te surat is kebulunga zin ki Timoteo te mid-isip din he anak din. Maandew wey mezukilem id-ampù din si Timoteo. Ne ebperateng daan sikandin he mekehendiyà pezem si Timoteo te Ruma su wey mekepenumbaley ziyà te kandin.

Kayi he surat, duen mahabet he insuǥù ni Pablo ki Timoteo. Mibpehinumduman din si Timoteo mehitenged te kedumelaha te menge etew he insarig te Megbevayà diyà te kandin. Meveǥat heini he terebahu. Umba kinahanglan he meheǥet is kedsarig din ki Jesu Kristu su para kenà sikandin mezaag te menge etew he edsupak te penurù din. Utew kinahanglan he kenè din ed-engkezan is kedwali wey kebpenurù te Meupiya he Tudtulanen mehitenged ki Jesu Kristu he nezineg din diyà te ki Pablo wey kenà sikandin medtampu te kedhisgut duen te wazè din pulus he menge hilisgutan su ebpekesamuk dà heini. Kinahanglan he iyan din ipenurù sikan is diyà ebpuun te insurat he lalag te Megbevayà su heeyan he penurù tutuu he ziyà ebpuun te Megbevayà ne zekelà is pulus din su pinaaǥi kayi egkehimanan is menge tumutuu te langun he meupiya he menge vaal.

Mereǥen is kebpekesavuk ni Pablo, iyan, melipayen gihapun su netuenan din he nekepenilbi sikandin te Megbevayà te taman te egkehimu zin. Wey netuenan din daan he is menge pastur he iring ki Timoteo edleusen dan te ebaal is baal te Megbevayà he mibpuunaan ni Pablo.