Is menge etew ziyà te Krita kenà memetau he ebmansu te keugelingen dan. Is menge etew he ed-ubpà dutun he pulu, utew menge teruen wey menge peǥulen. Duen duma kandan he neketuu ki Jesu Kristu piru duwazuwa is kebpenilbi zan te Megbevayà. Ne wazà heeyan mekeeles ki Pablo umba midsuǥù din is egkeseriǥan he ebpekepengulu kandan he iyan si Tito su wey zin metevangi is menge tumutuu zutun su wey zan mekepenilbi te Megbevayà te paaǥi he ebpekepenunuat te Megbevayà.

Is egkehuna he ebeelan ni Tito zutun, ne iyan is kebpilì te menge etew he egkehimu he idsarig kandan is kebpengulu te zuma zan he menge tumutuu. Ne haazà sikandan kinahanglan he zait he edtehuzen wey kinahanglan daan he wazà egkesudii kandan.

Duen menge etew zutun te Krita he ebpemevayàbayà te mezaat he suat dan, kenè dan ebpemineg te tutuu he penurù su egkesuat sikandan he ebpekidibati. Ne midsuǥù ni Pablo si Tito he penurua zin haazà he menge etew he medtuu zan wey ipesungkad dan is kineiya zan te Lalag te Megbevayà. Kayi he surat, duen menge suǥù diyà te menge tumutuu he impemesungkad: duen menge suǥù he sungkad te meǥurang en he menge maama, sungkad te edliwezeenan en he menge vahi, sungkad te menguhed pa he menge maama wey menge vahi wey menge suǥù he sungkad te uripen.

Kayi he surat ibpekeǥiyan ki Tito is menge etew ziyà te Krita te minsan pa te kenà iyan igkelibriya te etew te silut is ked-ulaulaha zin te meupiya su iyan dà is hizu te Megbevayà pinaaǥi te kebpelisa zin te menge salà te etew wey tenged te kebeǥayi zin te etew te beǥu he untung pinaaǥi te Waǥas he Mulin-ulin. Piru kinahanglan gihapun he ibpehuna zan diyà te ǥehinawa zan is ked-ulaula te menge meupiya he menge vaal su wey zan mepenunuat is Megbevayà.