4
Duen idtelaan ku kenikew,
ne is Megbevayà wey si Jesu Kristu,
iyan ebpeketistiǥus kayi te menge lalag ku.
Netuenan ta he edlikù si Jesus su iyan sikandin hadì ne iyan sikandin edsusi keuzemà te nengeulaula te minsan hentei,
se uuyag pa wey is nemematey en.
2 Ne tenged kayi iyan idtelaan ku kenikew is:
ipesavut nu is Lalag te Megbevayà.
Kinahanglan he layun ka andam te kebpesevuta te lalag din te minsan keenu he timpu ke zuen egkesuat he ebpemineg wey ke wazà.
Dewaya nu is menge etew,
sembaǥi nu he med-iniyug dan te mezaat he ulaula.
Hengyui nu sikandan.
Kinahanglan he layun ka mepelevayen is ebpenurù kandan.
3 Umba idtelaan ku heini kenikew su egkeuma keuzemà is timpu he kenà edewaten te menge etew is tutuu he tuluuwen,
kekenà,
iyan dan edsunuzen is menge mezaat he kebayè dan.
Ebpemepenurù dan te mezakel he menge menenudlù.
Ne iyan ibpenurù kayi is tuluuwen he utew zan egkesuati te ebpemineg.
4 Kenè dan ebpemineǥen is tutuu,
kekenà,
iyan dan edtuuwan is menge tarù he ǥuǥud.
5 Iyan,
sikew mulà,
tengkai nu is ed-ul-ulahan nu te minsan keenu he timpu.
Entusa nu is kemereǥenan.
Peniguduwi nu te edsangyew is Meupiya he Tudtulanen.
Purungi nu tumana is langun he ebpeveelan kenikew te Megbevayà.
6 Siak mulà,
meǥaan en egkeepus is umur ku;
meǥaan en egkeuma is kebpatey ku.
7 Nepasad ku en is kebenggaa kedì te Megbevayà;
nekeuma ad te edungguan te edlumbà.
Hustu is ked-ikula ku te tutuu he tuluuwen.
8 Ne ǥuntaan inteǥana en kedì te Nengazen is suhul he iyan ibeǥey zin diyà te langun he memetazeng he etew.
Ibeǥey zin heini keuzemà te andew te kedsusiya zin te nengeulaula te tivuuk he menusiyà.
Iyan sikandin kes metazeng is kedsusi zin.
Ne kenà iyan e zà midteǥenahan din te suhul,
kekenà,
midteǥenahan din daan is langun he utew egkeǥalew ke ebpekelikù sikandin.
Is Insuǥù ki Timoteo
9 Himuwa nu is taman te egkehimu nu wey ka meǥaan mekehendini
10 su mid-ewaan a ni Dimas tenged te iyan egkenuǥunan din is untung din dini te kelibutan.
Midhendiyà sikandin te Tiselunika.
Ne si Krisinti,
midhendiyà te Gelasya,
ne si Tito zaan,
midhendiyà te Delmasya.
11 Iyan dà duma ku kayi,
si Lucas.
Tuluya nu si Marcos ne zumaha nu zini su zekelà is tavang din kedì te langun he ed-ul-ulahan ku kayi.
12 Midsuǥù ku si Tikiku ziyà te inged he Ipisu.
13 Sikan is kumbalè ku he intaǥak ku ziyà te ki Karpu he ziyà te Truwas,
meupiya ke ed-uwiten nu zini.
Uwita nu zaan sikan is midlulun he menge libru,
lavew en sikan is diyà isurat te lundis.
14 Utew mezaat is mid-ulaula kedì ni Alejandro,
sikan is pandey te tumbaǥa.
Iyan ebales kandin is Nengazen.
15 Endami nu sikandin su utew mezesen is kedsumpelita zin te tuluuwen he ibpenurù ta.
16 Dutun te nehuna he ked-imbistiga kedì wazà minsan hentei he midtavang mebpenistiǥus kediey su mid-ewaan a zuen te langun.
Id-ampù ku he mepesaylu sikandan te Megbevayà.
17 Minsan pa zutun midtevangan a te Nengazen ne midlig-enan e zin ne tenged dutun nepurungan ku te edsangyew is Meupiya he Tudtulanen diyà te langun he menge etew zutun he kenà menge Hudiyu.
Ne tenged dutun nelibri a ne wazà a mehimetayi.
18 Ne kenà dutun dà taman su edlibriyen e pa te Nengazen te minsan hengkey he ebpekekaid kedì ne edlig-enan e zin taman te ed-uwiten e zin dutun te ǥinhedian din diyà te langit.
Berakat he zeliǥa sikandin te wazà pidtemanan.
19 Ipengemusta a ki Priscila,
ki Ekilu,
wey ki Unisipuru wey is pemilya zin.
20 Mibpetaǥak si Irastu ziyà te Kurintu ne intaǥak ku si Trupimu ziyà te Militu su nezeruwan.
21 Gaanggaan ka hendini te kenè pa tipenguzan.
Ebpengemusta kenikew ensi Yubulu,
si Pudinti,
si Linu,
si Claudia,
wey is langun he menge tumutuu zini.
22 Berakat he zumahi kew te Nengazen.
Ikeǥaǥew kew zin is langun.
Iyan a si Pablo.