Utew mereǥen is terebahu te etew he edumala te iglisya. Meveǥat is menge vaal he kinahanglan he ebeelan din. Iyan sikandin ebpenurù te menge etew he egketiǥum te ked-azap te Megbevayà wey iyan sikandin edsambag kandan. Kinahanglan daan he ebeelan din is kegiya wey kedsusi te zuma he ebpemenerebahu para zutun te iglisya.

Utew mahal si Timoteo ziyà te ǥehinawa ni Pablo ne mid-isip din heini he anak din. Tetelu he tuig is kedumdumaha ni Pablo ki Timoteo ziyà te mahabethabet he menge inged, ne hein nevansey en sikandin iyan sikandin impezumala te menge tumutuu ziyà te Ipisu.

Hein malù en netegteǥaad si Timoteo ziyà te Ipisu mibpesuratan sikandin ni Pablo te kedasig wey kedsambag kandin. Duen duma he menge etew zutun te Ipisu he ebpekesuwey te tutuu is kandan he penurù. Ne kinahanglan he edsewayen sikandan. Duen kenà hustu is baal zan emun edtiǥum is menge tumutuu. Kinahanglan he ibpaahà kandan is hustu he paaǥi te kedsimba. Duen kandan mibeǥayan te ketenged te kebpengulu te zuma zan he menge tumutuu. Ne kinahanglan he zait sikandan he edtehuzen wey kenà sikandan selewayen. Midsembaǥan daan ni Pablo si Timoteo mehitenged te kedtavang te menge valu he vahi he egkengereǥenan.

Mibpenurù din daan si Timoteo he hemeni zin is tutuu he ketudluanan su para kenà mahalin te zuma wey kinahanglan daan he kenà sikandin egkeremerikan su para meupiya sikandin he petug-iringan he egkesunud te zuma.