Is Ked-inempuey
3
Ne ǥuntaan,
menge suled,
iampù key keniyu wey meǥaan mekeeneb ne mezawat diyà te minsan hendei is kebpesevuta zey te Lalag te Nengazen iring te kegkezewata niw kayi ziyan te keniyu.
2 Iampù key zaan wey key mekeliyu te pesipala te menge kenà metazeng wey lalung he menge etew su mezakel is kenà edtuman te lalag din.
3 Iyan,
metinumanen mulà is Nengazen te lalag din,
ne iyan sikandin ebantey wey edlig-en keniyu wey kew kenà mekeizi ni Setanas.
4 Tenged te kedsarig dey te Nengazen,
netuenan dey he ebpenigudu kew pa edtuman te menge suǥù dey keniyu.
5 Berakat he ipesavut keniyu te Nengazen ke sengemenu kew zin kemahal ziyà te ǥehinawa te Megbevayà wey himuwa zin he veǥayi kew ni Kristu te kelig-en wey niw maantus is kemereǥenan.
Is Menge Peǥulen
6 Menge suled,
tenged te keǥehem te ngazan te Nengazen tew he si Jesu Kristu he imbeǥey kenami,
duen menge idsuǥù dey keniyu.
Iyan is:
kenè kew mebpekiduma te tumutuu he tepulen he kenà edsunud te impenurù dey keniyu.
7 Netuenan niw en is egkeveelan niw wey kew mekeiring te ebeelan dey.
Su hein diyan key te keniyu kenè key tepulen.
8 Wazè key mekevuyù te egkeenen dey ziyà te minsan hentei,
kekenà,
mibeyazan dey.
Maandew wey mezukilem midhaǥù key mebaal su wey kew kenà medlised tenged kenami.
9 Duen dey ketenged te kebpesuhul keniyu,
iyan,
wazè key mebpesuhul,
kekenà,
midterebahu key su wey zuen ulaula zey he egkeiringan niw.
10 Hein diyan key pa iyan penurù dey keniyu is:
sikan is kenà edterebahu,
kenà ipekaan.
11 Impenudtul kenami he zuen diyan menge zuma niw he menge tepulen.
Kenè dan kun edterebahu,
kekenà,
edsemuken dan is terebahu te menge zuma zan.
12 Tenged te keǥehem te Nengazen tew he si Jesu Kristu,
idsuǥù dey wey idhangyù dey kandan he kinahanglan he medterebahu zan ne kenè dan medsamuk su wey zan meketiǥayun te igkeuyag dan.
13 Ne sikiyu zaan,
menge suled,
kenè kew meevek te ked-ulaula te meupiya.
14 Ke zuen minsan hentei he tumutuu he kenà ebpemineg te menge suǥù he insurat dey kayi te surat,
kilelaa niw ne kenè kew mebpekiduma kandin su wey meeled sikandin,
15 iyan,
kenè niw isipa he kuntada niw,
kekenà,
penurua niw he iring te suled niw.
16 Berakat he iveǥey keniyu te Nengazen is melinawen he ǥehinawa te minsan keenu he timpu wey te minsan hengkey is kebpekesavuk niw.
Iyan sikandin ebeǥey te kelinew.
Dumahi kew is langun te Nengazen.
17 Iyan a si Pablo;
impirma ku kayi is ngazan ku.
Iyan heini tuus he idsavuk ku te langun he menge surat ku,
wey iyan heini paaǥi te kedsurat ku.
18 Sikiyu is langun,
ikeǥaǥew kew te Nengazen tew he si Jesu Kristu.