Keenu edlikù si Jesus? Egkemenumenu heini? Egkemenumenu is duma tew he menge tumutuu he nemematey en, hengkey is egkehitavù kandan dutun te kedlikù ni Jesus? Egkengeliveǥan is menge tumutuu ziyà te Tiselunika. Netuenan dan he edlikù si Jesus su iyan heini impenurù ni Pablo kandan hein diyè pa sikandin te kandan.

Is menge tumutuu ziyà te Tiselunika mibpesipelahan tenged te kedtuu zan ki Jesu Kristu. Umba meinit is kebperetenga zan te kedlikù ni Jesus su egkesuat dan he metapus en is menge samuk dan su ed-uwiten en man sikandan diyà te langit. Ne zutun te kedtaǥad dan, kinahanglan gihapun he edesiǥen sikandan.

Ne utew nehizuwi ni Pablo is duma zin he menge tumutuu ziyà te Tiselunika. Iyan sikandin nehuna he nekepenurù kandan mehitenged ki Kristu, ne hein nemeketuu en sikandan mid-isip din sikandan he menge anak din. Iring sikandin te iney zan he mid-elima kandan wey iring daan sikandin te amey zan he midsambag kandan, midasig kandan wey nenurù kandan. Ne umba mibpesuratan din sikandan su edesiǥen din sikandan he mibpedayun dan he edsarig te Nengazen minsan pa ke egkeumahan sikandan te kemereǥenan. Ne is mehitenged duen te igkeliveǥi zan he kedlikù ni Jesus, ne nekaǥi ni Pablo he is menge sakup ni Jesus he nemematey en ebenhawen din dutun te kedlikù din ne is menge uuyag pa egkengevatun ne ebpeketelavuk ki Jesus diyà te zivavew. Nekaǥi zaan ni Pablo he utew kinahanglan is layun kebpengandam su wazà netau ke keenu edlikù si Jesus.

Ne zuen pa zuma he menge ulaula he ibpeulaula ni Pablo te menge tigTiselunika. Duen duma kandan he mid-engked en he edterebahu su egkeisip dan he hapit en daan edlikù si Jesus. Ne midsembaǥan din sikandan he mebpenigudu sikandan he edterebahu. Duen duma he netintal te kebaal te meremerik he menge vaal ne mibpetizeenan din sikandan he engkezi zan haazà. Midsuǥù din daan sikandan he kenè dan ewaa ziyà te ǥehinawa zan is kebminahalà su wey zan mebmelipayen wey kenè dan eǥena is baal te Waǥas he Mulin-ulin.

Is puunà te vaal ni Pablo ziyà te Tiselunika egkevasa ta ziyà te Nengeulaula 17:1-9.