Mibpekeventayan be te menge tumutuu ziyà te Tiselunika is menge lalag ni Pablo zuen te nehuna he surat din he mezawat dan? Su maan is midlavey pa is pira he vulan ne mid-umanan en maan sikandan pesurati ni Pablo ne in-uman din kandan ipenurù sikan is impenurù din en kandan duen te nehuna he surat din. Mepelevayen si Pablo kandan umbe impenurù din en maan kandan sikan is ingkepenurù din en he kinahanglan he metueni zan. Mibpehinumduman din sikandan su wey mebmelig-en is kedtuu zan minsan pa te ebpesipelahan sikandan. Nekaǥi zin kandan he zuen tuyù dutun te kemeresayan dan su emun egkaahà te zuma he edsunud gihapun sikandan te Megbevayà minsan ke edlised dan ne egkehimu he iyan haazà ebpekehinggat te zuma wey zan iyan meseriǥi is Megbevayà ne wey zan mezalig sikandin. Ne egkeuma is timpu he edsilutan sikan is menge etew he ebpesipala kandan. Impetentenuzan daan ni Pablo te menge tigTiselunika he kenè dan engkezi te ebperateng si Jesus. Egketuenan dan he wazè pa sikandin medlikù su emun edlikù sikandin egkehuna egkehitavù is kedsukul te utew mahabet he menge etew ziyà te Megbevayà wey is kebpeǥawaǥawa zuen te etew he utew lavew he mekesesalà. Kayi he surat ni Pablo impesavut din en maan he ke zuen menge peǥulen su edtaǥad dà te kedlikù ni Jesus, kinahanglan he iringi zan sikandin wey is menge zuma zin he nenigudu wey zan mekuwa is menge kinahanglan dan su wey zan kenà mekesamuk te zuma.