5
Menge suled,
kenè en kinahanglan he edseysayen dey pa keniyu kayi te surat is menge andew wey menge timpu te kegketuman kayi te menge midtagnà.
2 Su netuenan niw en he iring te tekawen he ebpekeuma ke mezukilem is kegketuman te andew te kedlimas te Nengazen,
su egketingkemed is menusiyà.
3 Ne egkehitavù te timpu he kunaan te menge etew ke melinew is langun wey nelig-enan sikandan.
Ne segugunà dutun egkeǥerà sikandan.
Utew meǥaan;
iring te kedlepew te velilit diyà te ed-anak.
Ne wazà edresik dutun he minsan sevaha.
4 Ne sikiyu,
menge suled,
wazè kew mulà diyà te merusirem.
Kenè kew mulà egkengetingkemed te andew te kedlimas te Nengazen iring te egkengetingkemed is menge etew te tekawen.
Kenè kew iyan iring dutun.
5 Su sakup kew mulà te merayag wey te maandew,
he ke và dà egkeǥiya,
sakup kew te Megbevayà.
Su sikitew,
wazè tew kelavet te merusirem wey kezukileman.
6 Umba kinahanglan he kenà iring te kedlipezeng is ulaula tew su iring kayi is ulaula te zuma he etew he wazà meketuu.
Kinahanglan he ed-andam kiw ne ed-eǥenen tew is menge mezaat he suat tew.
7 Sikan is edlipezeng,
edlipezeng te mezukilem,
ne sikan is egkelangut,
egkelangut daan te mezukilem.
8 Iyan,
sikitew mulà is nesakup te maandew,
kinahanglan he ed-eǥenen tew is menge mezaat he suat tew.
Idsun-ud tew is limbutung he iyan is kedtuu tew te Megbevayà wey is kebmahala tew zini te ǥehinawa tew te menge zuma tew.
Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.
9 Su is Megbevayà,
wazè din ivanglis kenitew is silut,
kekenà,
midluwas kiw zin pinaaǥi te Nengazen tew he si Jesu Kristu.
10 Ne minsan ke uuyag kiw pa wey ke minatey kiw en be zutun te kedlikù ni Kristu,
duen tew en gihapun untung he wazà pidtemanan duma kandin su iyan heini ketezengan ke maan is mibpehimatey sikandin.
11 Ne ǥeina te netuenan niw en heini peliplipayè kew ne lig-eni niw is kedtuu te uman sevaha keniyu,
iring te neveelan niw en.
Menge Pengemusta
12 Ne menge suled,
sikan is edhaǥù te ked-uwit dan keniyu,
kes menge eǥalen niw he mibpilì te Nengazen wey sikandan is ebpenurù keniyu,
edhengyuan dey sikiyu he tehuza niw sikandan.
13 Kinahanglan he utew niw sikandan tehuza wey mahala tenged te menge vaal zan diyan te keniyu.
Ne kinahanglan he melinew is kedepitè niw te kada sevaha.
14 Ne iyan daan idhangyù dey keniyu,
menge suled,
is:
keǥiyi niw is menge peǥulen he medterebahu zan.
Sembaǥi niw is egkengehandek,
lig-eni niw is menge meǥuyà is kedtuu,
ne kinahanglan he mebmepelevayen kew te langun kandan.
15 Kenè niw ituǥut he zuen minsan hentei keniyu he ebales te mezaat,
kekenà,
mebpepurpurungè kew layun.
Purungi niw zaan is minsan hentei he etew.
16-18 Ne ǥeina te nekidsevaha kew ki Jesu Kristu,
iyan ebpeveelan keniyu te Megbevayà is:
layun kew medlipey,
layun kew med-ampù,
wey layun kew mebpeselamat te Megbevayà minsan hengkey is egkeulaula niw.
19 Kenè niw verawa is menge suǥù keniyu te Waǥas he Mulin-ulin.
20 Kenè niw pesegdana is menge lalag te mid-ulinan,
21 kekenà,
gezami niw is langun ne tipiǥi niw is meupiya.
22 Likayi niw is minsan hengkey he mezaat.
23 Is Megbevayà,
ne iyan ebeǥey te kelinew,
berakat he purungi zin lumpiyuwi is ulaula niw.
Lig-eni zin is tivuuk he ǥehinawa niw,
isip niw,
wey lawa niw su para wazà igkesewayi keniyu keuzemà te kedlikù te Nengazen tew he si Jesus.
24 Ne edhimuwen heini te Megbevayà su iyan sikandin midhimu keniyu he menge tumutuu kandin ne egkeseriǥan sikandin.
25 Menge suled,
iampù key zaan keniyu.
26 Pengemustaha niw te limù is langun he menge suled tew ziyan.
27 Ibeǥey ku keniyu is suǥù te Megbevayà he vesaha niw heini is surat diyà te langun he menge suled tew ziyan.
28 Ikeǥeǥawi kew te Nengazen tew he si Jesu Kristu.