Is Ikezuwa He Surat Ni Epustul Pablo Ziyà Te Menge
TigTiselunika
1
Sikami,
si Pablo,
si Silas,
wey si Timoteo,
ebpesuratan dey sikiyu is menge tigTiselunika he ǥaked te Amey tew he Megbevayà wey ǥaked te Nengazen tew he si Jesu Kristu.
2 Berakat he ikeǥaǥew kew te Amey tew he Megbevayà wey te Nengazen tew he si Jesu Kristu,
ne veǥayi kew zan te melinawen he kebpekesavuk.
Is Metazeng he Kedhukum
3 Menge suled,
kinahanglan he layun dekelà is kebpeselemati zey te Megbevayà tenged keniyu.
Ne hustu heini su layun dekelà is ked-uswag te kedtuu niw wey layun daan ed-iseg is kebmahala niw te uman sevaha he menge zuma niw ziyà te ǥehinawa niw.
4 Ne tenged kayi emun ebpenumbelayan dey is menge tumutuu te Megbevayà diyà te minsan hendei he inged,
ebentuǥen dey sikiyu tenged te kedsarig niw te Megbevayà wey tenged te kebmeinentusen niw te menge kemeresayan wey kemereǥenan he egkeseǥazan niw.
5 Heini is kedsarig niw wey ked-antus niw,
ne iyan tuus he metazeng is kukuman te Megbevayà su pinaaǥi te memerasey he egkeantus niw,
ibpeehè din he zait kew he idragkes dutun te menge etew he edhedian din.
6 Metazeng is menge ulaula te Megbevayà ne edresayen din keuzemà is menge etew he midrasey keniyu ǥuntaan.
7 Ke ibpeǥawaǥawa keuzemà is Nengazen tew he si Jesu Kristu he ebpuun te langit,
id-awè din diyan te keniyu wey zini zaan te kenami is kemeresayan he egkeantus tew ǥuntaan.
Egkukumbalà sikandin te iring te regreg wey edumahan te menge mekeǥeǥehem he menge velinsuǥuen din.
8 Dutun,
edsilutan din sikandan is wazà medtetenged te Megbevayà wey wazà mebpemineg te Meupiya he Tudtulanen te keaǥi te Nengazen tew he si Jesus.
9 Iyan silut din kandan is kemetayen he wazà pidtemanan.
Egkesuwey zan is Nengazen wey is mekeǥeǥehem he anlag din.
10 Egkehitavù heini keuzemà dutun te andew te kedlikù din.
Iyan idlikù din dini te kelibutan su wey mezalig sikandin te menge etew he mibpesakup kandin.
Dutun,
ne ebentuǥen sikandin te langun he menge tumutuu kandin wey sikiyu zaan su neketuu kew te impesavut dey keniyu.
11 Tenged kayi layun dey sikiyu id-ampù.
Ed-ampù key he himuwa te Megbevayà is menge ulaula niw he zait te kedtuu niw kandin.
Ed-ampù key he pinaaǥi te ǥehem din himuwa zin he tumana niw is minsan hengkey he meupiya he ulaula he iyan en tuyù niw tenged te midtuu kew kandin.
12 Ne pinaaǥi kayi egkezalig niw is Nengazen tew he si Jesus,
ne edeliǥen kew zin daan.
Egkehimu heini pinaaǥi zà te ǥaǥew te Megbevayè tew wey te Nengazen tew he si Jesu Kristu.