Berakat he ikeǥaǥew kew te Megbevayà ne veǥayi kew zin te melinawen he kebpekesavuk.

2 Dekelà layun is kebpeselemati zey te Megbevayà tenged keniyu ne layun dey sikiyu id-ampù.

3 Su emun ed-ampù key te Megbevayà he Amey tew kenè dey egkelipatan is kedtuu niw,

wey is kebmahala niw,

wey is kebperateng niw te Nengazen tew he si Jesu Kristu.

Su egketuusan is kedtuu niw kandin pinaaǥi te ulaula niw,

ne pinaaǥi te kedhaǥù niw egketuusan daan is kebmahala niw kandin diyà te ǥehinawa niw.

Ne egketuusan daan is kebperateng niw kandin pinaaǥi te kebmeinentusen niw.

4 Ne menge suled he minahal te Megbevayà,

netuenan dey he pinilì kew zin

5 su impesavut dey keniyu is Meupiya he Tudtulanen,

kenà pinaaǥi te lalag dey zà,

kekenà,

pinaaǥi te ǥehem te Waǥas he Mulin-ulin.

Midheǥet te Megbevayà dutun is kedsevuta zey kayi.

Ne netuenan niw zaan ke hengkey is menge ulaula zey he meupiya wey kew mezeyzey hein diyan key te keniyu.

6 Ne sikiyu zaan,

mid-iringan niw is mid-ulaula zey wey is mid-ulaula zengan te Nengazen tew he si Jesus su midawat niw is Lalag te Megbevayà minsan nekeaǥi kew te kemeresayan tenged te kedawat niw.

Ne minsan pa te nerasey kew,

nelipey kew zed tenged te ked-ulini keniyu te Waǥas he Mulin-ulin.

7 Tenged kayi iyan kew ed-iringan te langun he menge zuma he tumutuu ziyan te prubinsya he Mesidunya wey ziyà daan te prubinsya he Gerisya.

8 Ebpuun diyan nekeeneb is Lalag te Nengazen,

kenà diyan dà te prubinsya he Mesidunya wey ziyà te prubinsya he Gerisya,

kekenà,

is menge etew ziyà te minsan hendei,

nezineg dan is tudtul mehitenged te kedtuu niw te Megbevayà.

Wazè en kinahanglan he ibpenudtul zey pa ziyà te menge etew is kedtuu niw.

9 Nezineg dan en ne iyan sikandan ebpenudtul mehitenged te kegelǥelawa niw kenami.

Ebpenudtul zan he mid-engkezan niw kes ked-azap te menge kenà tutuu he ed-ezapen.

Mid-engkezan niw kun wey kew mekeazap te tutuu he Megbevayà he wazè din kemetayen.

10 Su edteǥazan niw kun is kedlikù te Anak din he ebpuun te langit.

Iyan si Jesus he Anak te Megbevayà he mibanhew zin.

Iyan si Jesus he midlibri kenitew te silut wey kiw mekeliyu te ebpekeuma he kedlimasa te Megbevayà te menusiyà.