Berakat he ikeǥaǥew ka wey kehizuwi ka te Amey tew he Megbevayà wey te Nengazen tew he si Jesu Kristu wey veǥayi ke zan te melinawen he kebpekesavuk.

3 Ed-umanan ku egkeǥiya kenikew is sambag ku hein mid-awà a ziyan pehendiyà te Mesidunya.

Iyan is:

kenè ka med-awà diyan te Ipisu.

Iyan idsembaǥi ku kenikew su zuen menge etew ziyan he kinahanglan he zewaya nu.

Dewaya nu he med-engked dan te kebpenurù te menge sayep he tuluuwen

4 wey med-engked dan te ked-istudyu te menge sayep he menge ǥuǥud,

wey te menge meluǥayad he ǥuǥud te kepuun te menge etew.

Su emun iyan heini ed-istudyuwan dan ebpekidlewanè dan dà ke hengkey is hustu.

Kenà egkehimu he pinaaǥi kayi egketuenan ta is ibpesavut te Megbevayà pinaaǥi te kedtuu.

5 Ne kinahanglan he iyan ketezengan ke maan is idsuǥù nu kandan heini su wey zan mahala is menge zuma zan diyà te ǥehinawa zan.

Ne kenà egkehimu he hustu is kebmahala ta te menge zuma ta emun wazè ki melumpiyuwi te Megbevayà duen te menge salè ta.

Kinahanglan he iyan dà ed-ul-ulahan ta is netuenan ta he hustu ne kinahanglan daan he tutuu is kedtuu ta te tutuu he tuluuwen ne zutun human hustu is kebmahala ta te menge zuma ta.

6 Duen diyan menge etew he wazè dan meseǥipà heini.

Iyan dan impelavi is kebpekidlewanà mehitenged te wazè din pulus.

7 Su minsan pa te egkesuatan dan pezem he menge menunudlù sikandan te kesuǥuan he imbilinbilin ni Moises wazè dan hanew te egkeǥiyen dan wey wazè dan mesavut is tuluuwen dan he idteǥel zan diyà te zuma he menge etew.

8 Netuenan ta he meupiya is kesuǥuan he imbilinbilin ni Moises ke hustu is kegemita ta kayi.

9 Iyan,

wazà isuǥù heini su wey mezawey is menge metazeng he etew,

kekenà,

insuǥù heini su wey mezawey is menge mesinupaken,

menge kenà metinumanen,

menge kenà edtuu te Megbevayà,

menge selaan,

menge lalung wey menge kenà edtahud te Megbevayà,

menge ebunù te amey wey iney zan,

menge teremunù,

10 menge egkevut te kenè dan esawa,

menge maama he egkeeriǥan te iring dan he maama,

menge menggeǥebpà,

menge teruen,

menge ebpen-ulug te kewsa wey is minsan hentei he ebpekesupak is ulaula zin te hustu he tuluuwen.

11 Ne heini is hustu he tuluuwen,

ne ebpuun te Meupiya he Tudtulanen mehitenged te utew zekelà he ǥehem te Megbevayà.

Is Megbevayà he iyan dait he edeliǥen,

insarig din kedì heini is tudtulanen wey ku mesangyew.

12 Ebpeselematan ku is Nengazen tew he si Jesu Kristu su mibeǥayan e zin te zesen wey ku metuman heini is ebpeveelan din kedì.

Mid-isip e zin he metinumanen ne tenged kayi intezù e zin he suluǥuen din.

13 Dengan,

mezaat is menge lalag ku mehitenged kandin;

midrasey ku is menge sumusundan din ne midsumpalit ku sikandin.

Ne minsan pa zutun,

nehizuwan e zin su nehimu ku is menge mezaat he vaal ku tenged te wazè ku pa metueni is tutuu he tuluuwen wey wazè ku pa sikandin tuuwi.

14 Ne kenà dutun dà taman su utew ad ingkeǥaǥew te Megbevayà ne ǥuntaan neketuu ad ki Jesu Kristu ne utew en sikandin mahal zini te ǥehinawa ku.

15 Duen erubasa he utew tutuu ne kinahanglan he tuuwi te minsan hentei;

ne iyan is:

“Midhendini si Jesu Kristu te kelibutan wey zin libriya te silut is menge mekesesalà.”

Ne siak,

iyan a tuwas he lalung te langun kandan.

16 Ne minsan pa zutun,

nehizuwan a ǥihapun te Megbevayà su wey pinaaǥi te kebpelevaya zin kedì te utew lalung,

ikepezayag ni Jesu Kristu he utew mepelevayen sikandin.

Impezayag din heini su wey mesavut heini te langun he menge etew he edtuu kandin keuzemà ne ebeǥayan din te untung he wazà pidtemanan.

17 Kes sebsevaha zà he Megbevayà,

kenà egkeahà.

Iyan sikandin hadì te minsan hengkey ne wazè din kemetayen;

berakat he tehuza wey zeliǥa sikandin te wazè din pidtemanan.

18 Ne sikew,

Timoteo he anak ku,

edteleenan ku sikew he ipenurù nu te menge etew heini is migkaǥi ku.

Sungkad heini te netagnà dengan mehitenged kenikew.

Ne idtelaan ku zaan he sumalà haazà is netagnà,

pekezesen ka te kedsundaru nu tenged ki Jesu Kristu.

19 Iyan gumaan nu is kedtuu nu te tutuu he tuluuwen wey is kedtumana nu te langun he netuenan nu he hustu.

Duen menge etew he wazè dan tumana is netuenan dan he hustu ne tenged kayi nezeetan en is kedtuu zan te Megbevayà.

20 Duma kayi si Himinyu wey si Alejandro.

Impevayàbayè ku si Setanas kandan wey ikepenurù kandan he kenè dan sumpelita is Megbevayà.