Is Kedsimba te Menge Tumutuu
2
Ne iyan idhuna ku idhangyù is:
kinahanglan he vuyua te menge tumutuu is egkinehenglanen dan diyà te Megbevayà.
Kinahanglan he iampù dan is langun he menge etew wey peselemati zan te Megbevayà is gaǥew zin kandan.
2 Iampù dan daan is menge hadì wey is minsan hentei he zuen din keǥehem su wey mebmelinew is ked-ubpè tew wey wazà samuk te kebpurungi tew kedtumana te egkesuatan te Megbevayà wey te hustu he ulaula.
3 Umba idhangyù ku heini su meupiya is ked-ampù he iring kayi.
Iyan heini igkesuat te Megbevayà he Menluluwas tew
4 su iyan din egkesuatan is wey melibri te silut is tivuuk he menusiyà ne wey zan daan metueni is tutuu he tuluuwen.
5 Sebsevaha zà is Megbevayà,
ne sebsevaha zà daan is datù diyà te teliwazà te Megbevayà wey menge etew,
ne iyan datù tew is etew he si Jesu Kristu.
6 Imbelavag din is untung din ne mibpehimatey su wey zin mevelukasi is langun he menge etew.
Ne pinaaǥi kayi,
dutun te hustu he timpu,
impeehè din he egkesuatan te Megbevayà he melibri te silut is tivuuk he menusiyà.
7 Ne tenged kayi intezù e zin he epustul ne midsuǥù e zin wey ku ipenurù heini.
Kenà tarù heini is egkeǥiyen ku,
kekenà,
tutuu.
Midtezù e zin wey ku mepenurù is menge etew he kenà Hudiyu su wey zan meketuu te tutuu he tuluuwen.
8 Ne tenged kayi,
is menge maama ziyà te langun he menge inged he meheǥet is ked-engkezi zan te mezaat he ulaula,
egkesuatan ku he med-ampù dan diyà te Megbevayà.
Kinahanglan he wazà pauk dan te menge zuma zan wey wazè dan keduwazuwa.
9 Ne is menge vahi zaan,
kinahanglan he hustu is kegemita zan te ugelingen dan.
Kenè dan ipezalig,
kekenà,
kinahanglan he metau sikandan he egkeeled.
Kenà utew subra is kebmekempeta zan te ulu zan pinaaǥi te vulvul zan.
Kenè dan megamit te menge mahal iring te vulawan wey menge velieg he pirlas wey menge mahal he ugelingen,
10 kekenà,
kinahanglan he iyan ideliǥa kandan is menge meupiya he ulaula.
Iyan heini zait he ed-ul-ulahan te vahi he egkaǥi he ed-azap sikandin te Megbevayà.
11 Kinahanglan is menge vahi he mebpurung dan mebpemineg te penurù kandan he kenè dan megkaǥikaǥi wey kinahanglan he layun mebpezumazuma sikandan te menge egalen dan.
12 Kenè ku idtuǥut he iyan ebpenurù is bahi.
Kenè ku zaan idtuǥut he ebayàbayà is bahi te maama.
Mebpemineg dà sikandin,
13 su iyan nehuna he nelimbag si Adan ne human si Ibà.
14 Ne kenà iyan si Adan neekalan ni Setanas,
kekenà,
iyan si Ibà neekalan ne tenged dutun nekesupak sikandin te intelaan kandan.
15 Ne minsan pa te iyan haazà,
egkelibri ǥihapun is menge vahi te silut pinaaǥi te ked-anak te vatà ke kenè dan edlekaan is kedtuu zan,
wey is kebmahala zan te menge zuma zan wey is menge ulaula zan he igkesuat te Megbevayà wey is ked-erengana zan te langun he ed-ul-ulahan dan.