9
Wazà kinahanglan he idsurat ku keniyu ke hengkey is hustu he ed-ul-ulahan niw te kedtavang te menge tumutuu he egkengeayuayu
2 su netuenan ku he zekelà is gustu niw te kedtavang.
Migkeǥiyan ku is menge tumutuu he tigMesidunya he layun dekelà is gustu niw te kedtavang.
Migkaǥi ku kandan he puun pa zutun te nehuna he tuig daan naandam is gehinawa niw te menge tigGerisya te kebeǥey.
Ne is kezekelan kandan,
hein nezineg dan heini,
mid-iseg is gustu zan te kedtavang daan.
3 Ne ǥuntaan edsuǥuen ku ziyan heini is menge suled tew su wey kew zan metevangi te kedtumana te migkaǥi ku mehitenged keniyu su kela ke mehimu he lalag dà duen ne zutun dà taman.
Iyan,
netuenan ku he edtumanen niw ǥihapun ne edteǥenahan niw is idtavang niw sumalà is migkaǥi ku.
4 Su emun kenè niw edtumanen ne emun eduma kediey pehendiyan is menge tigMesidunya ne egkeehè dan he wazè niw teǥenaha is idtavang niw,
ne egkeeled key ne egkeeled kew zaan tenged te migkaǥi ku he naandam kew en.
5 Ne tenged kayi neisip ku he kinahanglan he ed-insaan ku heini is tetelu he menge suled tew ke egkehimu he edhuna zan kediey pehendiyan su wey kew zan metevangi te kedteǥenaha he zaan te idtavang he impenaad niw.
Ne zutun egkehimu he egketeǥane en haazà dutun te kebpekeuma ku ne egketuenan te langun he umba ebeǥey kew,
kenà tenged te ebpeǥesen kew,
kekenà,
tenged te ebpuun diyà te keputian te atey niw is kebeǥey niw.
Is Kegkekelelaǥan
6 Kenè niw lipati heini is sempità he emun deisek is ibpemula ta,
deisek daan is egkeraǥun ta,
ne emun dekelà is ibpemula ta,
dekelà daan is egkeraǥun ta.
7 Kinahanglan he ed-isipen te kada sevaha ke hengkey is egkesuatan din he ibeǥey ne iyan ibeǥey zin.
Kenè ta ibeǥey is kenè ta egkesuatan he ibeǥey,
ne kenè ta zaan ibeǥey emun egkeisip ta he inteǥel kenita is kebeǥaya ta,
su emun ebeǥey ki,
kinahanglan he ebpuun te keputian te atey ta is kebeǥaya ta zutun ne iyan haazà utew egkesuatan te Megbevayà.
8 Ne egkehimu te Megbevayà he ibeǥey zin kenita is subra pa zutun te egkinehenglanen ta,
su wey ta layun maazen is langun he menge kinahanglan ta wey zuen ta zaan subra he igketavang ta te zuma.
9 Ne zuen insurat he Lalag te Megbevayà he edhenduen te,
“Layun dekelà is ibeǥey te Megbevayà
diyà te egkengeayuayu ne kenà egkelipatan
te wazà pidtemanan is ketulanged din.”
10 Ne is Megbevayà,
iyan ebeǥey te venì diyà te ebpemula su wey zuen egkeenen.
Is idtavang ta te zuma ne iring te ibpemula.
Ibeǥey zin daan kenita is ibpemula,
he ke và dà egkeǥiya,
is igketavang ta te zuma,
su wey zuen dekelà he uzar ta he ebpuun te metazeng he ulaula ta ziyà te zuma.
11 Su edhimuwen din layun he kenè ki maalang-alang te selapì su wey ta meveǥayi is edlised.
Ne umba,
menge suled,
mezakel is ebpeselamat te Megbevayà tenged te tavang he ibpeuwit niw kenami.
12 Ne heini is ibeǥey niw,
kenà iyan dà pulus din is kegketavangi te menge tumutuu te Megbevayà,
kekenà,
pinaaǥi kayi utew mezakel he etew is ebpeselamat te Megbevayà.
13 Ne emun egketuenan te menge etew he utew kew metulanged,
ebentuǥen dan is Megbevayà tenged te kedtumana niw te menge suǥù din wey tenged te mezesen he kedtuu niw te Meupiya he Tudtulanen su midtevangan niw sikandan ne midtevangan niw zaan is duma.
14 Ne zutun id-ampù kew zan,
ne egkehimu he utew kew mahal ziyà te ǥehinawa zan tenged te zekelà he ǥagew niw kandan he imbeǥey keniyu te Megbevayà.
15 Ne tenged kayi ebpeselematan ta is Megbevayà tenged te kebeǥaya zin kenita te Anak din he wazà minsan hengkey he ebpekerepeng te kemahal zin.