Is Kebeǥey te Tumutuu
8
Egkesuatan dey,
menge suled,
he metueni niw ke hengkey is nehimu tenged te ǥaǥew te Megbevayà diyà te menge tumutuu ziyà te Mesidunya.
2 Minsan dutun te nekeantus dan te utew mepait he kemeresayan,
ingkelipey zan utew ǥihapun ne tenged kayi minsan pa te utew zan egkengeayuayu,
utew zekelà is ingkeveǥey zan he tavang te menge zuma zan he tumutuu.
3 Ebpeketistiǥus a he midhimu zan is taman te egkehimu zan,
ne subra pa te egkehimu zan is imbeǥey zan he ebpuun te keputian te atey zan.
4 Su midhengyuan key zan he tuǥuti zey sikandan he mekeuǥup kenami te kebeǥey te tavang diyà te menge tumutuu ziyà te prubinsya he Hudiya.
5 Wazè dey peebuta he egkehimu zan is iring dutun.
Inhuna zan iveǥey is tivuuk he lawa zan wey ǥehinawa zan diyà te Megbevayà,
ne zutun,
tenged te edtumanen dan is egkesuatan te Megbevayà,
mibpevayàbayè dan daan kenami.
6 Ne ǥeina te iyan si Tito nemuunà te vaal ziyan te keniyu te kebpenguwaa te idtavang niw ziyà te menge tumutuu he tigHudiya,
midsembaǥan dey sikandin he ipelaus din en su wey kew zin metevangi te kedhimesaza kayi te ulaula mehitenged te ǥaǥew niw.
7 Netuenan ku he wazà kurang niw te langun he menge ketau wey ulaula he meupiya.
Dekelà is kedtuu niw;
metau kew he ebpenurù;
nesavut niw is tutuu he tuluuwen;
ebpetebtevangè kew layun;
ne zekelà is gaǥew niw kenami.
Tenged kayi egkesuatan dey he wazè niw zaan kurang kayi te kebpaahaa niw te ǥaǥew niw ziyà te menge tumutuu he tigHudiya.
8 Kenà heini kesuǥuan ku keniyu,
kekenà,
ibpesayud ku keniyu is dekelà he ǥustu te zuma he menge tumutuu te kedtavang te menge zuma zan.
Umba ibpesayud ku heini su wey niw meiringi.
Ne pinaaǥi kayi egketuenan ku ke tutuu ve is keniyu he ǥaǥew.
9 Netuenan ta ke hengkey is kezekelà te ǥaǥew kenita te Nengazen tew he si Jesu Kristu.
Su tenged te hizu zin kenita,
minsan te utew sikandin sepian diyà te langit,
midhimu zin he utew sikandin ayuayu pinaaǥi te kebpeetew zin wey kebpehimatey zin.
Ne tenged kayi te kegkeayuayu zin egkehimu ki he utew sepian.
10 Iyan sambag ku keniyu is:
himesaza niw haazà is kedtiǥuma niw te selapì he mibpuunan niw zutun te nehuna he tuig.
Iyan kew nehuna te kedtiǥum te selapì wey metevangi is menge tigHudiya,
ne kenà duen dà taman su heini he isip te kedtavang kandan,
ne ziyan ebpuun te keniyu.
11 Ne tenged kayi peniguduwi niw wey niw mepasad sumalà is egkehimu niw.
Kinahanglan he zekelà is gustu niw te kedhimesaza kayi te vaal iring te zekelà is gustu niw hein aney te kebpuuni kayi.
12 Su emun dekelà is gustu niw te kebeǥaya te tavang sumalà is egkehimu niw,
iyan heini igkesuat te Megbevayà su kenè din ebuyuen kenita is kenè ta igkeveǥey,
kekenà,
iyan ebuyuen din haazà is egkehimu ta he ibeǥey kandin.
13-14 Kenà iyan dini te isip ku is merasey kew su wey metevangi is duma he edlised,
kekenà,
egkesuatan ku he metevangi niw is menge tumutuu he edlised guntaan geina te sepian kew ǥuntaan.
Ne keuzemà,
emun iyan kew edlised ne iyan sikandan sepian,
egkehimu he edtevangan kew zan daan.
Pinaaǥi kayi ebpeked-iiring kew ne wazà edlised he tumutuu.
15 Iring heini te insurat dengan he Lalag te Megbevayà su edhenduen heini te,
“Haazà is etew he nekekuwa te zekelà,
wazà gihapun mesubrahi is nekuwa zin.
Ne haazà is etew he zeisek is nekuwa zin,
wazè din daan kurang.”
Si Tito wey Is Menge Zuma Zin
16 Dekelà is kebpeselemati zey te Megbevayà su imbeǥey zin ki Tito is dekelà he ǥustu te kedtavang keniyu iring te kenami zaan he ǥustu.
17 Ne hein mid-insaan dey sikandin ke egkesuatan din he edtavang keniyu utew sikandin nesuat.
Ne kenà duen dà taman su zaan sikandin egkesuat he edtavang keniyu.
Ne tenged kayi te suat din ed-isip edlikù diyan te keniyu.
18 Ibpezuma zey kandin is sevaha kayi te menge suled tew he tenged te kedhaǥù din te kedsengyawa te Meupiya he Tudtulanen,
utew sikandin telehuzen te menge tumutuu te langun he menge inged.
19 Ne kenà duen dà taman su nepilì sikandin te menge gurupu te menge tumutuu zini he iyan eduma kenami zutun te kedhated dey kayi te idtavang diyà te egkengeayuayu.
Umba iyan key edhated su wey mevantug is Nengazen ne wey zaan metueni he utew key egkesuat he edtavang.
20 Umba egkesuatan dey he eduma heini is suled tew su wey key kenà medudahi su kela ke zuen egkaǥi he ebpenggemiten dey heini is dekelà he selapì he idhated dey.
21 Su egkesuatan dey he hustu is ebeelan dey sumalà is ked-isipa kenami te Megbevayà ne kenà duen dà taman,
kekenà,
maahà daan te menge etew he metazeng is menge vaal zey.
22 Ne zuen pa suled tew he ibpezuma zey engki Tito.
Mibpurungan ku sikandin susiya ne utew zekelà is gustu zin te edtavang te menge tumutuu,
iyan,
tuwas pa zekelà is gustu zin te edtavang keniyu ǥeina te zekelà is kedsarig din keniyu.
23 Si Tito,
iyan timbang ku te kedhimuwa ku te kedtavang keniyu.
Ne heini is menge suled tew he zezuwa he eduma kandin pehendiyan,
menge suǥù sikandan te menge ǥurupu te tumutuu zini.
Pinaaǥi kandan egkevantug layun si Kristu ziyà te menge etew.
24 Ipeehè niw kandan is gaǥew niw su wey metueni te menge tumutuu ziyà te minsan hendei he inged he tutuu iyan is gaǥew niw te menge zuma niw,
ne zutun egketuenan dan he tutuu is migkaǥi zey he metinevangen kew.