Is Ilengiten he Lawa Tew
5
Is lawa ta,
ne iring te valey he egkeubpaan ta.
Ne netuenan ta he ke egkerundus heini is baley,
duen baley he egkeubpaan ta ziyà te langit he iyan is beǥu he lawa he ibeǥey te Megbevayà.
Kandin he vaal heini ne wazè din pidtemanan.
2 Ne ǥeina te utew ki edlised te zini ki pa te kelibutan,
utew ta igkesuat he iveǥey en pezem kenita haazà is beǥu he lawa ta he ziyà te langit.
3 Su zutun te kebenhawa kenita keuzemà,
kinahanglan he zuen lawa ta.
4 Su sikita is tumutuu he uuyag pa zini te kelibutan,
edlised ki su neveǥatan ki kayi te menge kemereǥenan he egkeantus kayi te kelibutanen he lawa ta,
asal kenè ta iyan egkesuatan he meewai ta heini is lawa ta,
kekenà,
iyan egkesuatan ta is wey meveǥayi ki en pezem guntaan dutun te veǥu he lawa he ebpuun diyà te langit,
ne zutun egkeilisan is lawa he zuen din kemetayen te lawa he zuen din untung he wazà pidtemanan.
5 Is Megbevayà,
daan ki zin he mid-andam su wey meulaula heini kenita keuzemà,
ne mibeǥayan ki zin daan te Waǥas he Mulin-ulin he iyan tuus he edtumanen din heini.
6 Tenged dutun,
layun meheǥet is kedsarig dey te Nengazen.
Netuenan ta he te kemulu ki pa kayi te kelibutanen he lawa,
kenè ki pa ziyà te ed-ubpaan te Nengazen.
7 Su ibpeikul ta is ibayè ta zini te kelibutan pinaaǥi te kedsarig dà te Megbevayà su kenè te pa egkeahà is edungguan ta ziyà te langit.
8 Layun mezesen is kedsarig ta te Nengazen ne egkesuatan ta pezem he meewai ta heini is kelibutanen he lawa su wey ki mekeulì diyà te Nengazen.
9 Iyan,
ke minsan hendei ki,
ke zini ki te kelibutan wey ke ziyè ki ve te ed-ubpaan te Megbevayà,
iyan utew ta egkesuati is kedtumana ta te egkesuatan te Megbevayà.
10 Su is minsan hentei kenitew,
kinahanglan he ziyà ed-etuvang keuzemà te ki Kristu su edsusiyen din is menge ulaula tew su wey mezawat te kada sevaha kenitew is suhul he zait te langun he mid-ulaula zin dini te kelibutan ke meupiya ve wey ke wazè din menge pulus.
Is Kedepitè Tew Ziyà te Megbevayà
11 Ne ǥeina te netuenan dey he utew mekehandekhandek keuzemà haazà is kedsusiya te Nengazen te menge ulaula te menusiyà,
edhimuwen dey pezem is taman te egkehimu zey wey meketuu is menge etew.
Netuenan te Megbavayà he kenà mezaat is tuyù dey,
ne egkesuatan ku he metueni niw zaan heini.
12 Heini is menge lalag ku,
kenà iyan tuyù ku kayi is wey key keniyu mezeliǥi,
kekenà,
egkesuatan dey he metueni niw he hustu is tuyù dey su wey zuen ketezengan he igketavak niw zutun te menge etew he iyan dan ed-ahaan is paras te etew ne kenà is meupiya he ulaula zin.
13 Kunaan te zuma ke ebuneǥen key,
iyan,
umba henduen key te ebuneǥen su utew mezesen is kedtumana zey te ebpeveelan te Megbevayà.
Iyan,
ke ed-isipen niw he kenè key ebuneǥen,
netuenan niw he iyan ibpenigudu zey su wey kew mezeyzey.
14 Ne umba edhaǥù key su netuenan dey he mahal key ziyà te ǥehinawa ni Kristu.
Netuenan dey he midhimetayan sikandin is sebsevaha he elili te tivuuk he menusiyà ne tenged kayi henduen be te pudu en nekeaǥi te kemetayen is tivuuk he menusiyà.
15 Minatey sikandin he elili te tivuuk he menusiyà su wey sikandan is menge etew he uuyag pa,
kenè dan en maan med-ulaula te kandan he egkesuatan,
kekenà,
med-tuman dan en te egkesuatan ni Kristu he iyan midhimetayan wey nevanhew su wey melibri sikandan te silut.
16 Is paaǥi zey te ked-isipa te minsan hentei he etew,
ne kenà iyan is paaǥi he egemiten te menge etew he wazà medtuu.
Dengan,
iyan heini migamit dey he paaǥi su mid-isip dey he etew zà duen si Kristu,
iyan,
guntaan netuenan dey he kenà etew zà duen sikandin.
17 Ne sikan is etew he nekidsevaha en ki Kristu,
beǥu en sikandin he linimbag.
Nahanew en diyà te kandin is daan he netaǥù te isip din ne mid-ilisan en heini te veǥu.
18 Iyan midhimu kayi is Megbevayà su pinaaǥi ki Kristu midhimu kiw zin he menge emiǥu zin.
Ne mibpeveelan din daan kenami is kedhimuwa te zuma he etew he meemiǥu zin.
19 Iyan ibpesavut dey is:
pinaaǥi ki Kristu egkehimu he edhimuwen te Megbevayà is tivuuk he menusiyà he menge emiǥu zin.
Ne id-awè din diyà te isip din is menge mezaat he ulaula zan.
Ne sikami,
insarig din kenami is kedtudtula he egkehimu en he ebpekid-emiǥu te Megbevayà is menusiyà.
20 Umba midsuǥù key ni Kristu su wey pinaaǥi kenami ebpekehangyù keniyu is Megbevayà.
Ne tenged ki Kristu edhengyuan dey zaan sikiyu he ituǥut niw he himuwa kew te Megbevayà he menge emiǥu zin.
21 Wazà minsan hengkey he mezaat he ulaula ni Kristu,
iyan,
midhimu te Megbevayà he iyan sikandin midsilutan tenged te salè tew su wey pinaaǥi te kebpekidsevaha tew kandin,
egkehimu he ed-isipen kiw he metazeng te Megbevayà.